Kumsa 3
3
1Mi ka nuru waai ale nya ninam ale bu nyini Naawen jigi a cheena wa suinni ale a puuri la nyiŋ. 2Wa ta mu jo legi po, daa juijui ale a nya. 3Wa teeri ka nisa a kasim ta chaab ale mu daa meena. 4Wa basi kama ate m nyiŋka buk ate m koba a nye nna ase ŋa wɛ la. 5Wa wi mu kama ale sui kaasuŋ a ta chaab ale mu ale suipuurum. 6Naawen basi kama ate m kali legi po ase baai ale kpi dipo dipo la. 7Wa lik mu kama tapi ate mi an baga a nyini, ale pai chɔrin kpiema a vi m zuk.
8Ate mi a kaari a saalim a yaali maarika, alege wa zɛri m puusaŋa. 9Wa lik m suiku ale ka tintana parik ate m va suik kuui ale kan magsi la. 10Naawen a nye ase ka piuk ale gomsi ku yik mu la, nna ase gbeŋli ale suk doa a limisi mu la. 11Wa ta mu va ka suik kaasuŋku ate m bɛ ate wa yaa basi mu m ka maarɔ. 12Wa gomsi kama ayen wa tɔŋ wa tommu. Wa tuk wa peeŋa ka m nyiŋ. 13Wa yeeri wa peemaŋa ka pakka po a tɔŋ m zuzugtaŋa.
14Mi yaa chim laata a te nuruma. Ate ba a yi yiila a nye mu a la daaŋa meena. 15Naawen basi kama ate niniga a jo mu. Wa basi kama ate m buk ale ninam. 16Wa voori m nyina ale ziŋa ale tabi mu a feri daŋta po. 17M ŋman ka suiyɔgni. M baŋ jabuui ate ba a wi ayen suipeentik la kama. 18Mi yaa weeni ayen, <<M pagrimu a cheŋ ya, ate m ŋman ka yiila ale Naawen.>>
19Mi a teeri m ninammu ale m niniŋŋa ale m suipuurumu ale daanika. 20Mi a saalim teeri m wie abe fi poli m wie. 21Alege m ta yiila kama ase m nin poli nna. 22Naawen ŋmanteka kan kpegli, wa jiirimu mɛ kan kpegli. 23Ŋa ka wa paala saluik meena. Fi wensieŋa zuak ka yega.
24Mi yaa weeni m dek ayen, <<Naawen ka mi ale soa, m ta yiila ale wa. 25Naawen a nala te baai yiila ale bo ale wa ale a gisi wa la. 26Ku nala kama ale fi le nye nna chim a limisi ate Naawen a vari fu basi. 27Ku nala kama ate nuru a dan diem paala wa a tom nalimnyiini. 28Wa kali tɛŋ nna chim, Naawen a te wa ka tuim pagra ayen wa tom. 29Wa koori tɛŋ, da di dai yiila diem boro. 30Wa basi ate waai a fɔbi wa tapiaka. Wa basi ate chivie yik wa.
31Nyɔnɔwa a kan zɛri wa nuruma taam wuu. 32Wa dan poom ta suipuurum jam ni jigi, wa ta jiirim ale ŋmanteka kama. 33Wa kan yaali nuruba namsika yaase wa nye ate ba sue a kaasi. 34Wa a nya kama ase tɛŋka zuk ba nin ŋɔriŋ ligrɔ a basi wa naŋsa po. 35Wa a nya kama ase ba nin kan nye waai a magsi wa Wen Dii Ale Bo Wenŋmazuk La niŋŋa. 36Nyɔnɔwa a nya kama ase waai a nin ta wensie alege ate ba bo mini wa biisa dɔkku. 37Nuru karo a biisi ate wari a nye se ka Nyɔnɔwa a nin te suik. 38Wabaata ale wamaŋsa meena ka Wen Dii Ale Bo Wenŋmazuk La ale te suik ate ŋa a jam.
39Wa dan namsi waai wa wabaata nyiŋ wa kan fɔbili. 40Ni basi ate ti kpesi nya ti le tom diila abe ti ŋman jam Naawen jigi. 41Ni te ti zak nisa wen a puusi a nyini ti suiniima po a te Wen dii ale bo wenŋmazuk la. 42Ti tom ka wabaata ale kisi fu ate fi an vɔŋ a te ti. 43Fi din lik fidek ale ka suipuurum a vi ti. A ko ti alege an sak jiirim ale ti. 44Fi din lik fidek ale ka chiŋmari ate ti puusa an baga a paari fu. 45Fi nye kama ate tama ŋman ka kiri tɛŋ yonsa po.
46Ti dachaasaŋa meena a lak ba noa a biisi ti a kaasi. 47Yɔgsum yaa le yik ti, kaasuŋ yega a paari ti. 48M ninyaata kasim a siŋ, dii nyiŋla fi kaasi m nuruma kama. 49M ninyaata kasim a siŋ ka daa meena a kan basi, 50se ka Naawen wenŋmazuk po a nin chui nya. 51M sui kaasi ka yega m ni nya dii ale nye tɛŋka nipok paalukku la.
52Baai ale ka mi dachaasa alege daa wari nyiŋla a va mu kama ase nuim la. 53Ba pai mu nyo goluk po a pai tana a lɔnsi m zuk. 54Ate nyiam chali va mi zuk, ti mi yen mi za m kpi kama! 55Naawen yaa, mi kaari wi fu golukku po. 56Fi wom mi le a wi la. Kan lik fi tueŋa abe fi zɛri m kaari wi ka. 57Fi jam moata m le wi la, ate fi yaa weeni ayen, <<Kaa chali yɔgsummoa.>>
58Nyɔnɔ, fi nya m wanni zuk kama, fi da tuesi m nyuvunni kama. 59Naawen yaa, fi nya ba le nye mu dii a kaasi la kama. Yɔgyɔgla de bo m biika a te mu. 60Fi nya m dachaasaŋa ale zɔk dii dueni a te mu la kama. 61Naawen yaa, fi wom ba leetaŋa ale ba le zɔk biem buui a te mu la kama. 62M dachaasaŋa a kasim za ka mi ka zaka ale ba wie ale ba popola. 63Nya, wari meena ti ba a nye la, ba a yi ka yiila a nye mu a la. 64Biem buui meena ate ba tom la. Naawen yaa, tuni ba. 65Basi ate ba ta tukpari abe fi yaa ka basi ba zuk. 66Naawen yaa, pai fi suipuurumu a vi ba a kaasi ba meena tɛŋzuk de.
Currently Selected:
Kumsa 3: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
