Josua 24

1Josua a yaa jam tigsi Izirali buuni meena Sikiim po. Wa weeni nisɔmma ale niŋdeerɔma ale baai ale a bo buusa la ale kpaŋŋa ate ba ta badek jam Wen niŋ.

2Josua a weeni nuruma meena ayen, <<Dii ate Naawen, Izirali Wenni a weeni la ale nna. Ku beni kama ni kokpieŋsaŋa, a maa gum Tɛra Abrayam ale Nayo kowa a jam gaam Benni a taam kama a kala a kaab wen yona. 3Alege mi Wen a jam yeeri ni kowa Abrayam a ta nyini tɛŋka ale gaam Benaŋka la a ta cheŋ Keenan a te wa ŋaaŋbi boari. Mi te wa Aizik, 4a te Aizik mɛ Jekob ale Iisɔ. Mi yaa pai Seir tɛŋka ale ta guuta la a te Iisɔ, alege Jekob ale wa nidoabilisaŋa a jam cheŋ ka Ejipiti.

5<<Mi yaa tom Moosis ale Aaron, ate mi a basi ate ku jo Ejipiti demma nyiŋ ale dii ate mi nye dula la, ale ta ni a nyini. 6Ase mi ale ta ni koma a nyini Ejipiti po a nyini la, nama a jam paari ka nyakpiemu ate Ejipiti demma a jam a vi ba ale kpaliŋ torokoba ale wusum duerisa a ga paari Nyakpiem Mɔnuŋku. 7Alege ba jam kaari a te Naawen a yaali maarika ate wa yaa basi ate legi a bo nama ale Ejipiti demma suŋsuŋ, wa jam basi ate ba wari nyiamu po. Nama nya kama ale nidek nina m le nye Ejipiti demma diila. Ni jam bo gɔnni po ate ku beni kama.

8<<Mi ta ni jam Amori demma tɛŋka po baai ale bo Jodan benni kori geŋsa la. Ba jam kpaliŋ ale ni alege mi pai ba a nyo ka ni nisima po. Mi jam ko ba kama ate ni tuesi ba tɛŋka. 9Ase Zippor nidoabinni Belak, Moab naawa ale jam gomsi ayen wa nye kpaliŋ ale Izirali demma la, wa jam tom weeni ka Biio nidoabinni Balaam ayen wa ka kikaasa a te ni. 10Alege mi an jam wom Balaam ale a weeni diila, wa goanti jam a niak ni kama m jam vari ni a ta nyini wa nisima po a nyini kama.

11<<Ni lo Jodan benni a jueli kama a jam Jeriko tɛŋka po. Ate Jeriko demma a nye kpaliŋ ale ni ase Amori ale Perizzi ale Keenan ale Yit ale Girgas ale Yivi ale Jebus demma ale jam kpaliŋ ale ni dii alege ate mi a jam pai ba a nyo ni nisima po la. 12Mi jam tom zirima ate ŋa de ni niŋ, ŋaai ale jam yiak ba a basi te ni la. Amori demma nalima ŋayewa mɛ a jam boro kama. Nama an jam nye kude ale ka nidek gebik ale tommoa. 13Dila mi te ni ka tɛŋ kaai ate nama an namu ka nyiŋŋa ale tɛŋ kpieŋsa ate nama an sɛ si la, ate ni bo si po a dɛ ŋan baai ate nama an bori ba la.>

14<<Yɔgyɔgla de ni abe a chali Naawen abe ni puusi a te wa ale wensie. Ni yuk wena ŋaai ate ni kokpieŋsaŋa a jam a kaab ate ŋa gaam Benaŋka taam la ale ŋaai ale bo Ejipiti po la abe ni puusi a te Naawen. 15Alege Naawen puusi teka a dan kan nala a te ni, bi lueri a te nidek jinla danni waai ate ni a yaali ni puusi a te la, ka wen ŋaai ate ni kokpieŋsaŋa a jam a kaab ate ŋa gaam Benaŋka a taam la yaase ka Amori demma wenaŋa baai tɛŋka po ate ni boro la. Alege mi ale m yenni demma meena, tama ale puusi a te ka Naawen.>>

16Ate nuruma a yaa tulisi ayen, <<Ku abe yalima ale ti ate tama a zɛri Naawen abe ti kaab wen yona. 17Ku ka Naawen ti Wenni dek ale ta tama ale ti koma a nyini Ejipiti po, a nyini tɛŋ kaai ale ka yɔntidi la po, a tom wakinkaglaŋa de tama dek nina po. Wa jam kasi ti kama ti chelimu meena po ale tɛŋ sii meena po ate tama va si po a taam la. 18Naawen ale yiak tɛŋsaŋa de meena a basi a te ti a maa gum Amori demma baai ale jam bo tɛŋka po la. Tama mɛ ale puusi a te Naawen dii nyiŋla wa ka ti Wen.>>

19Josua a yaa weeni nuruma ayen, <<Nama an baga a puusi a te Naawen ya. Wa ka weleŋsa Naawen. Wa ka nyuri dɛka Wen. Wa kan vɔŋ a te ni, ni tukpanni ale ni biemu nyiŋŋa. 20Ase ni dan zɛri Naawen ale kaab tɛŋ yoŋta wena, wa le basi ate kaasuŋ jam ni jigi ate dila a basi ate ni kpeglim, wa le jam chim Naawen maŋ ate ni la ŋaaŋnyiŋ.>>

21Alege nuruma a yaa weeni Josua ayen, <<Aaya, ti le puusi a te ka Naawen.>> 22Ate Josua a yaa weeni ba ayen, <<Nama dek ka seerɔba a te nidek ayen ni a yaali ni puusi a te ka Naawen.>> Ba yaa tulisa ayen, <<Mm ti le weeni diila a ni la.>> 23Josua a yaa weeni ba ayen, <<Ni yuk ni wen yonaŋa ate ni ta la a basi abe ni pai ni suiniimaŋa a te Naawen, Izirali Wenni.>> 24Ate nuruma a yaa weeni Josua ayen, <<Ti le puusi a te Naawen ti Wenni abe ti a wom wa.>>

25A nyini dai dila danni Josua a jam nye ka nɔiyeŋ pumpuulima a te nuruma, dula jigini Sikiim tɛŋka po wa yaa ŋmarisi sinsaga ale wie te ba. 26Ate Josua yaa jam ŋmarisi wieŋa de meena a nyo Wen sinsaŋŋa gbaŋka po. Wa jam pai ka tintain kpienni a feri kinkaŋ peruk tɛŋ a moata Naawen weleŋsa jigini. 27Wa ya weeni nuruma meena ayen, <<Nya de, tintanni de ale chim ka seerɔ a te ni. Di wom dii meena ate Naawen a weeni ti la kama. Di le chim ka seerɔ a bo mini ni ase ni dan kan ta wensie ale ni Wenni.>> 28Josua a yaa jam basi ate nuruma meena a kuli ba yeeŋa.

29Wieŋa de meena ŋaaŋnyiŋ Naawen tomteerɔwa Nun nidoabinni Josua a yaa kpi. Wa jam taka bena kook ale pi. 30Ate ba yaa gu wa kauk kuui ate wa jam boro la, Timnat Seraya po Ɛfraim tɛŋka ate guutaŋa a bo ka po Gaas guuku wiiluk geŋsa. 31Izirali demma a puusi a te Naawen kama diipo ate Josua ale nisɔmma a jam vua la ale baai ale jam kpiem wa ale nya dii meena ate Naawen a jam nye te Izirali demma la.

32Ate Josefi kobaŋa ŋaai ate Izirali demma a ta nyini Ejipiti a jam la ba yaa jam gu ŋa tɛŋ kala po kaa ate Jekob a jam da ale ligbie kook a nyini Ayaamo nidoabilisaŋa jigi, Sikiim ko a jam le la. Kude a yaa jam chim ka Josefi ŋaaŋbisaŋa nitalim.

33Ate Aaron nidoabinni Eleaza a yaa jam kpi ate ba gu wa Gibea tɛŋka po, dula jigini ka wa nidoabinni Fineyas ale jam soa. Ka jam boka Ɛfraim tɛŋka ate guutaŋa a bo ka po la.

Currently Selected:

Josua 24: BWU

Highlight

Copy

Compare