Niŋdeerɔba 1
1
1Josua kummu ŋaaŋnyiŋ, Izirali demma a yaa bek Naawen ayen, <<Ka wana ale wa dɛ niŋ a ga kpaliŋ ale Keenan demma a te ti?>>
2Naawen a yaa tulisi ayen, <<Juda ale wa cheŋ, M pai tɛŋka a nyo ba nisima po kama.>>
3Juda demma a yaa weeni Simeyon demma ba suataŋa ayen, <<Ni jueli jam de ale ti, tɛŋka kauk kuui ate ba pai a te la, ate ti nye kpaliŋ ale Keenan demma. Tama mɛ ale va ni a cheŋ juijui ate ba le pai a te ni la.>> Simeyon demma a yaa jam va ba cheŋ.
4Juda demma ale jam nye kpaliŋka la, Naawen a yaa pai Keenan ale Perizzi a nyo ba nisima po ate ba ko nuruba tusa pi (10,000) Bezek tɛŋka po. 5Ka dula jigini ate ba jam nya Adoni Bezek a nye kpaliŋ ale wa a nya pagrim Keenan ale Perizzi demma zuk. 6Adoni Bezek a jam yiti chali kama, alege ba vi yik wa kama a gebi wa naŋsaŋa ale wa nisimaŋa nandub doataŋa a basi.
7Ate Adoni Bezek a weeni ayen, <<Yɔgyɔgla de Naawen a tuni mu mi ale jam nye mbala diila kama ate nalima pisiyopɔiwa naŋsa ale nisima nandub doata ba gebi a le pai ŋandiin tala mi jazaanimu tɛŋ a dɛ.>> Ba jam ta wa jam ka Jerusalem ate wa kpi dula.
8Juda demma a jam siti Jerusalem mɛ a tuesi ka. Ba jam ko tɛŋka demma kama ale juka ale bolim.
9Dila ŋaaŋnyiŋ, Juda demma a yaa cheŋ ayen ba nye kpaliŋ ale Keenan demma ale bo guuku zuk la Negev ale guutaŋa chiak yeniŋ geŋ la. 10Ba jam nya pagrim Keenan demma ale bo Yebron ate ba jam a te ka yuei ayen Kiriat Arba la ale nak yiak Sesai ale Ayiman ale Talmai.
11A nyini dula ba jam kasim nya ka pagrim nuru baai ale jam bo Debir po ate ba jam a te ka yuei ayen Kiriat Sefer la. 12Ate Kaleb weeni ayen, <<M le pai m liewa Aksa a te nuru waai ale wa nye kpaliŋ a nya pagrim Kiriat Sefer zuk la.>> 13Kenaz nidoabinni Otniel, Kaleb yuawa a yaa nak yik ka, ate Kaleb a pai wa liewa Aksa a yalisi wa.
14Yalika danni Otniel a yaa weeni liewa ayen wa bek wa kowa ate wa te wa tɛŋ. Wa yaa nyini wa bonika zuk a siŋ, ate Kaleb a yaa bek wa ayen, <<Ka boa ate fi a yaali?>> 15Ate liewa a tulisi ayen, <<Sak jiirim ale mu, ase fi ale te mu tɛŋ Negev po la, be te mu bulik kaai ale ta nyiam la mɛ.>> Kaleb yaa te wa bulik sii ale bo pimpitini zuk ale viaka po la.
16Moosis ŋachobwa Ken denɔwa ŋaaŋbisaŋa yaa basi Kpinkpatta Tɛŋka ale Juda nuruma a ga bo ale Juda Gɔnni nuruma Negev po a moata Arad.
17Juda nuruma a jam va Simeyon demma ba suataŋa a ga nye kpaliŋ ale Keenan demma ale bo Zefat la ale kaasi tɛŋka meena. Dila nyiŋla ka yuei jam le Yorma. 18Juda demma a jam maa tuesi ka Gaza ale Askelon ale Ekron, tɛŋ meena ale ka tɛŋbain.
19Naawen a jam bo ale Juda demma kama. Ba jam tuesi tɛŋ kaai ale bo guuku zuk la kama, alege ba an jam baga a yiak nuru baai ale bo peelimmu po la a basi ya, dii nyiŋla ba jam ta ka kuta torokoba. 20Ase Moosis ale puulim la, ba jam pai Yebron tɛŋka te ka Kaleb waai ale yiak Anak bisa batawa a basi la. 21Benjamin buuni an jam baga yiak Jebus demma baai ale jam bo Jerusalem po la a basi kama, ale jinla de Jebus demma a diem bo ale ka Benjamin demma.
22Josefi yenni demma mɛ a jam nye kpaliŋ ale Betel tɛŋka ate Naawen a bo ale ba. 23Ba le jam tom nuruba ayen ba ga kpesi nya Betel ate ka yuei a chim Luz la, 24kpesi nyaarɔma yaa nya nuru ale wa nyini tɛŋka po a nyini ate ba yaa weeni wa ayen, <<Sak ti tama ale ti nye dii a jo tɛŋka po la, ti le nya fi zuk nalimnyiini.>> 25Ate wa yaa sak ba, ate ba ko tɛŋka nuruma ale gebik alege basi nuruwa ale wa dɔkdemma meena. 26Ate wa yaa cheŋ Yit demma tɛŋka po, dula jigini wa jam sɛ ka tɛŋ ka yuei jam le Luz, ka yuei diem ale la a ta jam paari jinla danni.
27Alege Manasa demma an jam yiak Bet San yaase Taanak yaase Dor yaase Ibleam yaase Megiddo tɛŋsaŋa ale baai ale kali gilim ba la a basi ya, dii nyiŋla Keenan demma a jaa yaali ba bo ka tɛŋ kala po. 28Ase Izirali demma ale jam nya pagrim la, ba yaa namsi Keenan demma ale fifiok tuima alege an yiak ba a basi ya. 29Ɛfraim demma mɛ an jam yiak Keenan demma ale jam bo Gaza la, Keenan demma a diem jam bo ka dula ale ba. 30Zebulun demma an jam yiak Keenan demma ale bo Kitron yaase Nayalol po la, baai ale tali bo ale ba la a basi ya, alege ba an jam a basi ate ba a tom fifiok tuima. 31Yaase Asɛ demma a yiak baai ale bo Akko la yaase Saidon la yaase Alab la yaase Akzib la yaase Yelba yaase Afek la yaase Areyob la a basi ya, 32dila nyiŋla Asɛ demma a yaa jam bo ale Keenan demma. 33Nafitali demma mɛ an jam yiak baai ale bo Bet Sɛmes la yaase Bet Anat la a basi ya, alege Nafitali demma mɛ a jam bo Keenan demma tɛŋka po, ate baai ale bo Bet Sɛmes ale Bet Anat la a yaa jam chim fifiok tomteerɔba a te ba. 34Amori demma a jam kasi Dan demma a basi ka tɛŋ kaai ale ta guutaŋa la po, a kan basi ate ba siŋ jam tɛŋka peelimmu po. 35Amori demma mɛ a jam a yaali ba nyini Yeres Guuku ale Aijalon ale Saalbim a siŋ kama, alege Josefi yenni pagrimu ale jam gum du la, ba jam fɛ ba mɛ kama a te ba fifiok tuima. 36Amori demma tɛŋ banni a jam nyini ka Nueoŋ Guuku a ga va Sela a siŋ a cheŋ.
Currently Selected:
Niŋdeerɔba 1: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
