Josua 23
23
1Ku le jam beni alege ate Naawen a basi ate Izirali demma a nya vuusum a ta nyini ba dachaasaŋa meena ale gilim ba jigi la, Josua a jam kpaŋ kama ate wa benaŋa mɛ a piisi. 2Josua yaa tigsi Izirali demma meena, ba nisɔmma ale niŋdeerɔma ale buusa boorisaŋa ale kpaŋŋa a weeni ba ayen, <<Mi yaa kpaŋ kama ate m benaŋa mɛ a piisi. 3Nama dek a nya dii meena ate Naawen ni Wenni a nye tɛŋsaŋa de meena ni nyiŋla kama, ku jam ka Naawen ni Wenni ale kpaliŋ te ni. 4Ni teeri m le nye dii a chari tɛŋ kaai ale tali la a te ni buuni po meena la, tɛŋ sii ate mi a nya pagri si zuk Jodan Benni ale Nyakpiemu suŋsuŋ yeniŋ geŋ la. 5Naawen ni Wenni dek ale yiak ba a basi te ni, wa le namsi ba a te ni, ate nama ale tuesi ba tɛŋka ase Naawen ni Wenni ale puulim diila.>>
6<<Ni be pagra, abe ni kpesi a siak dii meena ale ŋmarisi Moosis Sinsaŋŋa Gbaŋka po la, abe ni kan viriŋ juga yaase gala. 7Ni kan pai nidek a gum chaab ale tɛŋsaŋa de ale tali a bo ni po la. Ni kan wi ba wenaŋa yue yaase ni a pɛ ŋa nyiŋŋa. Ku a fɛ ate ni kan kaab ŋa yaase ni koori tɛŋ a zuli ŋa. 8Alege ku a magsi ka ni ŋmasi va Naawen ni Wenni ase ni le nye dii a jam paari yɔgyɔgla de la.
9<<Naawen a yiak ka tɛŋ sii ale zuek ale pagra la a basi te ni; a ta jam paari jinla de tɛŋ karo a baga a zaani ale ni. 10Ni wanyi a nya pagrim tusidi zuk, dii nyiŋla ka Naawen ni Wenni ale kpaliŋ a te ni ase wa le puulim diila. 11Dila ni abe kpesi nidek a yaali Naawen ni Wenni. 12Alege ni dan viriŋ a pai nidek a maŋ baai ale tali vua a bo tɛŋsaŋa de po la ale a faari chaab lieba ale pai nidek a maŋ ba, 13ni abe seba chak ayen Naawen ni Wenni a kan ŋman yiak nuruma de a basi te ni. Alege ba le chim ka barukta a te ni, ba le chim finsa a bo ni ŋaaŋsaŋa abe ba chim munsa ni nimbieŋa po a ta ga paari diipo ate nama ale kpi tɛŋ maŋka de po, kaai ate Naawen ni Wenni a te ni la po.
14<<Yɔgyɔgla de mi a yaa moata ka kum. Ni seba kama ale ni suiniima ale ni chiisa meena ayen pumpuulim maŋ sii meena ate Naawen ni Wenni a weeni la wa an jam tali dinyi mɛ la a basi ya. 15Alege ase pumpuulim maŋ sii ate Naawen ni Wenni a weeni la ale jam chim wensie la, dila Naawen ale ta biem buui meena ate wa nyigsi ayen wa le ta jam ni zuk la, ate wa ga kaasi ni meena tɛŋ maŋka de po ate wa te ni la. 16Ase nama a dan zɛri Naawen ni Wenni nɔiyeŋka, kaai ate wa weeni la ale ga kaab wen yona a koori tɛŋ ŋa niŋ, Naawen sui ale puuri ale ni ate ni le kpi nwuli tɛŋ maŋ kaai ate wa te ni la po.>>
Currently Selected:
Josua 23: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
