Josua 22
22
1Ate Josua a tigsi Aruben demma ale Gad demma ale Manasa dɔkku kauk 2a yaa weeni ba ayen, <<Nama a nye dii meena ate Naawen tomteerɔwa Moosis a weeni ni la kama ale siak dii meena ate mi mɛ a weeni ni la 3ku beni kama yɔgyɔgla de nama an zɛri ni suataŋa, alege ni nye dii ate Naawen ni Wenni weeni la kama. 4Ase Naawen ni Wenni ale basi ate ni suataŋa a vuusi ase wa le jam puulim dii ale ni la, ni ŋmani a kuli ni yeeŋa tɛŋ kaai po ate Naawen tomteerɔwa Moosis a pai te ni ate ka bo Jodan benni kauk m kula la. 5Alege ni abe kpesi nidek a ta wieŋa ale sinsaŋŋa ŋaai ate Naawen tomteerɔwa Moosis a te ni la, ate ni a yaali Naawen ni Wenni, abe ni a va wa suitaŋa meena abe ni va wa wieŋa abe ni chiib va wa nalimnyiini a tom a te wa ale ni suiniima meena ale ni chiisa meena.>>
6Josua a yaa niak ba ale basi ba ate ba a cheŋ ba yeeŋa 7Manasa dɔkku kauk Moosis a jam te ba ka tɛŋ Basan po alege dɔkku kauk m kula Josua a jam te ba mɛ ka tɛŋ ate ka bo Jodan benni yeniŋ geŋsa ale ba suataŋa, ase Josua ale jam basi ate ba kuli la, wa yaa niak ba, 8ayen, <<Ni cheŋ ni yeeŋa ale ni jigsika ale ni duŋsaŋa ale ni kpanaŋa ale ni ligmɔniŋka ale ni kutuk mɔnuŋku ale ni kutaŋa ale gattaŋa ale piisi la, a lab ŋan baai ate ni nya a ta nyini ni dachaasaŋa jigi la a chari ni suataŋa.>>
9Dila Aruben demma ale Gad demma ale Manasa dɔkku geli a yaa basi Izirali demma Siilo ale bo Keenan po la a ŋmani cheŋ Gilead badek tɛŋka, kauk kuui ate ba jam soa ase Naawen ale weeni Moosis diila.
10Ase ba le jam paari Gelilot ale moata Jodan benni ale bo Keenan po la, Aruben demma ale Gad demma ale Manasa dɔkku geli a yaa jam sɛ kuŋkuŋ kpioŋ dula a moata Jodan benni. 11Ase Izirali demma ale ga wom ayen ba sɛka kuŋkuŋ Keenan tɛŋ banni ale bo Gelilot a moata Jodan benni Izirali demma geŋka la, 12Izirali tigsuŋku meena a yaa tigsi jigi yeŋ Siilo tɛŋka po ayen ba ga nye kpaliŋ ale ba.
13Dila Izirali demma a yaa jam tom kaabteerɔwa Eleaza nidoabinni Fineyas Gilead tɛŋka, Aruben demma ale Gad demma ale Manasa dɔkku genni jigi. 14Baai ale jam va wa cheŋ la ka nuru zuima pi. Izirali buuni diina piwa meena a jam te ka nuru yeŋ waai ale ka yeri nyɔnɔ Izirali labika yezuimaŋa po la. 15Ase ba le jam cheŋ Gilead tɛŋka po, Aruben dɔkku ale Gad dɔkku ale Manasa dɔkku genni jigi la, ba yaa weeni ba ayen, 16<<Naawen tigsuŋku meena ayen, ku le nye kase ate ni basi siaka ale Izirali Wenni ase nna la la? Ni le nye kase a ŋmani Naawen ŋaaŋ a sɛ kuŋkuŋ a te nidek abe ni zɛri wa? 17A ta jam paari jinla de tama a diem nye cheri a nyini biem bula po, nyiŋtuilaŋa ale a jam Naawen naakuuni po la meena. 18Ate nama a yaali ni basi Naawen vaka? <<Ni dan zɛri Naawen jinla, chum wa sui ale puuri ale Izirali naakuuni meena. 19Ase tɛŋ kaai ate nama a tuesi la a dan taŋ, ni jam Naawen tɛŋka po. Kauk kuui ate Naawen viuku a za la a maa boro ale tama. Alege ni abe kan ni zɛri Naawen yaase tama nɔi abe ni sɛ kuŋkuŋ a te ni dega a ŋman gum Naawen ti Wenni kuŋkuŋku po. 20Ase Zera nidoabinni Achan ale jam kan ta wensie a pai ŋan baai ate Wen ayen ba kaasi la, suipuurum an jam Izirali naakuuni meena jigi ya? Daa wala nyiini ale jam kpi wa biemu nyiŋŋa.>>
21Ate Aruben dɔkku ale Gad dɔkku ale Manasa dɔkku geli a yaa tulisi Izirali yezuimaŋa nyama ayen, 22<<Tanjaŋini Wen, Naawen! Tanjaŋini Wen, Naawen! Wa ale seba, ale basi ate Izirali a seba. Ase kude a dan ka tukpari yaase zɛrika a te Naawen, kan basi ti jinla de. 23Ase tama a dan sɛ tidek kuŋkuŋ ayen ti basi Naawen vaka, ayen ti nye juka tiirim yaase ŋandiinta tiirim yaase ti nye suiyɔgni tiirita kaabka ku zuk, Naawen dek abe dari ti tue.
24<<Aaya! Ti nye kude ale ka yɔgsum ayen dai dii dai ni ŋaaŋbisaŋa ale weeni tama ŋaaŋbisaŋa ayen, <Boan jaa wari ate nama a ta a nye ale Naawen Izirali Wenni? 25Naawen a basi ate ka Jodan benni a chim ban a bo tama ale nama Aruben demma ale Gad demma suŋsuŋ po. Ni ka charuk a nyini Naawen jigi ya.> Ni ŋaaŋbisaŋa ale nye ate tama ŋaaŋbisaŋa a basi Naawen yɔgsum chalika.
26<<Dila ale soa ate tama a weeni ayen, <Ni basi ate ti gomsi a sɛ kuŋkuŋ alege daa juka tiirim yaase kaabka kuŋkuŋoa.> 27Ku abe le chim ka seerɔ a te tama ale nama ale gaŋ sii ale bo ŋaaŋ a vi ti la, ayen ti le kasim a puusi Naawen ka wa viuku po ale ti juka tiiritaŋa ale kaabsaŋa ale suiyɔgni tiiritaŋa, ate chum po ni ŋaaŋbisaŋa a kan baga a weeni tama ŋaaŋbisaŋa ayen, Ni ka wari a nye ale Naawen ya.
28<<Ate tama weeni ayen, <Ase ba dan weeni kude a te tama yaase ti ŋaaŋbisaŋa, ti le tulisi ayen, <<Ni nya Naawen kuŋkuŋku, kuui ate tama koma a sɛ la, a daa juka tiirita yaase kaabsa, alege ku ka seerɔ tama ale nama suŋsuŋ.
29Ku abe yalima ale tama ate tama a kan nye tukpari ale Naawen a basi wa vaka abe ti sɛ kuŋkuŋ a magsi juka tiirita yaase ŋanbie tiirita ale kaabsa a gum Naawen ti Wenni kuŋkuŋku ale za viuku po la.>>
30Ase kaabteerɔwa Fineyas ale niŋdeerɔma naakuuni po, Izirali yezuimaŋa nyama ale ga wom dii ate Aruben demma ale Gad demma ale Manasa demma a weeni la, ba sue yaa jam peenti. 31Kaabteerɔwa Eleaza nidoabinni Fineyas a yaa weeni Aruben ale Gad ale Manasa ayen, <<Jinla de tama seba ayen Naawen a bo le ti kama, dii nyiŋla nama an zɛri wensie ale Naawen vaka kude nyiŋŋa. Yɔgyɔgla de ni vari Izirali demma Naawen nisima po a basi kama.>>
32Kaabteerɔwa Eleaza nidoabinni Fineyas ale niŋdeerɔma a yaa ŋmani cheŋ Keenan tɛŋka ba le ga tu chaab ale Aruben demma ale Gad demma Gilead po, a weeni sak Izirali demma ba ale zɔk diila. 33Ba sue a jam peenti kama ase ba le jam wom dii ale nye la a yaa pak Naawen ku nyiŋ. Ba an jam ŋman biisi kpaliŋ wie ayen ba ga kaasi ba tɛŋka juijui ate Aruben demma ale Gad demma a jam boro la.
34Aruben demma ale Gad demma a jam te kuŋkuŋku ka yuenni de, ayen Seerɔ Tama Suŋsuŋ ayen Naawen ka Wen.
Currently Selected:
Josua 22: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
