Josua 21

1Livaima diinaŋa kpaŋŋa a yaa cheŋ kaabteerɔwa Eleaza ale Nun nidoabinni Josua ale Izirali buura m ŋala diinaŋa kpaŋŋa jigi. 2Siilo ale bo Keenan tɛŋka po la a weeni ba ayen, <<Naawen a jam biisi kama ale Moosis ayen ni te ti tɛŋsa ate si ta wuuk ate tama a bo dula ale ti duŋsaŋa.>> 3Dila ase Naawen ale weeni diila Izirali demma a yaa jam te Livaima tɛŋsaŋa de ase wuuk jigi la a ta nyini ba charuku po.

4Gbaŋ kaai ale dɛ niŋ la a jam lo ka Koyat dɔkku yezuk yezuk zuk. Livaima baai ale ka kaabteerɔwa Aaron ŋaaŋbisa la a jam nya ka tɛŋsa pi ale sita a nyini Juda ale Simeyon ale Benjamin diinaŋa jigi. 5Koyat ŋaaŋbi sinsila a jam nya ka tɛŋsa pi a ta nyini Ɛfraim ale Dan dɔkku yezuimaŋa ale Manasa dɔkku yezuimaŋa kauk.

6Gerson ŋaaŋbisaŋa a jam nya ka tɛŋsa pi ale sita a ta nyini Isaka ale Asɛ ale Nafitali diinaŋa yezuk yezuk jigi ale Manasa dɔkku yezuk geli ale bo Basan po la.

7Merari ŋaaŋbisaŋa yezuk yezuk a jam nya ka tɛŋsa pi ale siye a ta nyini Aruben ale Gad ale Zebulun diinaŋa jigi.

8Dila Izirali demma a jam te Livaima ka tɛŋsaŋa de ale si wuuku ase Naawen ale jam weeni Moosis diila.

9A nyini Juda ale Simeyon diinaŋa, ba jam te ka tɛŋsaŋa de, sila yue abe le nna, 10tɛŋsaŋa de ba jam pai te ka Aaron ŋaaŋbisaŋa baai ale nyini Koyat yezuimaŋa ale ka Livaima la jigi, dii nyiŋla gbaŋ kaai ale dɛ niŋka a nak la a lo ka ba zuk. 11Ba jam te ba ka Kiriat Arba yaase Yebron ate wuuk a gilim ka la, Juda ate guutaŋa a bo ka po la. Arba jam ka Anak ko kpieŋ. 12Alege tattaŋa ale tɛŋ kpaŋsaŋa ale gilim tɛŋ kpieŋka la, ba jam pai dula a te ka Kaleb Jefunne nidoabinni ayen wa mɛ a tanla. 13Dila kaabteerɔwa Aaron ŋaaŋbisaŋa, ba jam te ba ka Yebron sukka tɛŋ ate waai a dan ko nuru ate ba a ŋma wa abe wa chali ga bo dula, sila abe le Libna 14ale Jattir ale Estemoa 15ale Yolon ale Debir ale 16Ain ale Jutta ale Bet Sɛmes a gum chaab ale si wuuku tɛŋsaŋa meena ka neok a nyini diina buyewa de jigi. 17Benjamin dɔkku a jam te ba ka Gibeon ale Geba ale 18Anatot ale Almon, si meena ka tɛŋsa sinaansi ate wuuk a bo si po. 19Tɛŋ sii meena ate ba jam te kaabteerɔma, Aaron ŋaaŋbisaŋa la, ka pi ale sita ate si ta wuuk a magsi ba duŋsaŋa dɛka.

20Koyat yezuima m ŋala baai ale ka Livaima la a jam nya tɛŋsa a nyini ka Ɛfraim dɔkku. 21Ɛfraim tɛŋka ate guutaŋa a bo ka po la, ba jam te ba ka Sikiim sukka tɛŋ ate waai ate ba a ŋma ayen wa ko nuru la ale Gezer ale 22Kibzaim ale Bet Yoron. Si jam ka tɛŋsa sinaansi ale ta wuuk a magsi ba duŋsaŋa dɛka.

23A ŋman nyini Dan dɔkku ba jam nya ka Elteke ale Gibbeton ale 24Aijalon ale Gat Arimmon. Si jam ka tɛŋsa sinaansi ale wuuk a magsi ba duŋsaŋa dɛka. 25A nyini Manasa dɔkku kauk ba jam te ba ka, Taanak ale Gat Arimmon. Si ka tɛŋsa siye ale ta wuuk a magsi ba duŋsaŋa dɛka. 26Tɛŋsa piika de ale si wuuku ba jam pai te ka Koyat yezuimaŋa.

27Livai yezuimaŋa ale nyini Gerson dɔkku la ba jam te ba kama. A nyini Manasa dɔkku kauk ba te ba ka Golan ale bo Basan po la, sukka tɛŋ a te waai ate ba a ŋma ayen wa ko nuru la, ale Be Estara. Si jam ka tɛŋsa siye ale ta wuuk a magsi ba duŋsaŋa dɛka. 28Isaka dɔkku ba jam te ba ka Kision ale Daberat ale 29Jarmut ale En Gannim. Si jam ka tɛŋsa sinaansi ale ta wuuk a magsi ba duŋsaŋa dɛka. 30Asɛ dɔkku ba jam te ba ka Misal ale Abdon ale 31Yelkat ale Areyob. Si ka tɛŋsa sinaansi ale ta wuuk a magsi ba duŋsaŋa dɛka. 32A nyini Nafitali dɔkku ba jam te ba ka Kedes ale bo Galili tɛŋka po la, sukka tɛŋ ate waai ate ba a ŋma ayen wa ko nuru la, ale Yammot Dor ale Kartan. Tɛŋsaŋa de sitawa a jam taka wuuk a magsi ba duŋsaŋa dɛka. 33Gerson kabini tɛŋsaŋa meena a jam ka tɛŋsa pi ale sita ale wuuk a magsi ba duŋsaŋa dɛka.

34Merari yezuimaŋa yaase Livaima mbala ba jam te ba kama. A nyini Zebulun dɔkku ba jam te ba ka Jokneam ale Karta ale 35Dimna ale Nayalal. Si ka tɛŋsa sinaansi ale wuuk a magsi ba duŋsaŋa dɛka. 36A nyini Aruben dɔkku ba jam te ba ka Bezer ale Jayaz ale 37Kedemot ale Mefaat. Tɛŋsa sinaansi ale wuuk a magsi ba duŋsaŋa dɛka. 38A nyini Gad dɔkku ba jam te ba ka Aramat ale bo Gilead tɛŋka po la, sukka tɛŋ a te waai ate ba a ŋma ayen wa ko nuru la, ale Mayanaim 39ale Yesbon ale Jazer. Si ka sinaansi a ta wuuk a magsi ba duŋsaŋa dɛka. 40Tɛŋ sii meena ate ba jam te Merari yezuimaŋa la yaase Livaima mbala la, jam ka pi ale siye. 41Livaima tɛŋsaŋa ale jam bo Izirali demma tɛŋsaŋa po ate ba ta la, a jam ka tɛŋsa pisinaansi ale naaniŋ a ta wuuk a magsi ba duŋsaŋa dɛka. 42Tɛŋsaŋa de kanyi kanyi meena a jam taka wuuk a gilim si. Dii meena ate ti wom a ta va tɛŋsaŋa de la ka wensie.

43Dila Naawen a te Izirali demma tɛŋka meena ate wa jam pɛ ayen wa pai te ba kokpieŋsaŋa la, ate ba tuesi a kala dula. 44Naawen a yaa jam te ba vuusum jigi meena, ase wa le jam pɛ dii ale ba kokpieŋsaŋa la. Ba dachaasaŋa an jam baga a zaani ale ba. Naawen a jam pai ba dachaasaŋa meena a te ba kama. 45Naawen an jam gaam pumpuulim maŋsaŋa ŋaai ate wa jam nye ale Izirali yenni demma la a basi ya, wa jam nye ŋa meena kama.

Currently Selected:

Josua 21: BWU

Highlight

Copy

Compare