Josua 18

1Izirali tigsuŋku meena a jam tigsi Siilo tɛŋka a ti Tuka Viuku dula. Izirali demma a jam nya pagrim tɛŋka zuk kama 2alege Izirali buuni diina buyopɔi ale jam tali an diem nya charukwa.

3Dila Josua yaa weeni Izirali demma ayen, <<Nama a yaa ayen ni limisi a paari ka disa po a bi ni ga tuesi tɛŋ kaai ate Naawen ni koma Wenni a te ni la? 4Ni lueri nuruba bata a ta nyini dɔk meena po. Mi ale tom ba ate ba cheŋ ga kpesi nya tɛŋka abe ba ŋmarisi a magsi ka wie ale ka diila, a ta va waai meena charuk ale ka diila. Ba le ŋman pilim jam mi jigi. 5Nama ale labi tɛŋka ka buyopɔi. Juda ale wari ka wa tɛŋka yeseoku geŋsa abe Josefi yenni demma a bo ba tɛŋka wiilukku geŋsa. 6Ase ni dan ŋmarisi a magsi tɛŋka labika buyopɔiwa dɛ wie, dila ŋaaŋnyiŋ, ni ta ba a jam te mu ate m nak gbaŋ a te Naawen ti Wenni niŋ. 7Livaima a kan nya jigiya a nyini ni po, dii nyiŋla kaabteka tuini ate ba tom a te Naawen la ale ba charuku. Gad ale Aruben ale Manasa dɔkku geli a poom nya ba charuku ka Jodan benni kori geŋsa. Ka Moosis Naawen tomteerɔwa ale te ba.>>

8Ase nuruma ale piilim a bo ba suiku po ayen ba kpesi nya tɛŋka la, Josua a jam sak ba kama ayen, <<Ga kpesi nya tɛŋka a ŋmarisi a magsi ka wie, abe ni ŋman jam mi jigi, ate mi ale nak gbaŋsa dela Siilo po Naawen niŋ.>> 9Dila nuruma a yaa basi dula ale cheŋ tɛŋka meena. Ba jam ŋmarisi ka wie a basi ka gbaŋ po, tɛŋ kpieŋ meena wie ba jam ŋmarisi a paari ka buyopɔi ale ŋmani pilim cheŋ Josua jigi Siilo. 10Josua yaa nak gbaŋ Naawen niŋ, dula jigini wa yaa chari tɛŋka a te Izirali diinaŋa labka ale ka diila.

11Gbaŋka yaa jam lo Benjamin dɔkku, yezuk yezuk meena zuk. Ba charuku tɛŋka banni a jam bo ka Juda ale Josefi diinaŋa suŋsuŋka po.

12A nyini wiilukku geŋ tɛŋka banni a piilim nyini ka Jodan benni a churinti va Jeriko wiilukku geŋsa a ga va tɛŋ kaai ate guuta a bo ka po la yeniŋ geŋsa a ga paari Bet Aven gɔnni po. 13A nyini dula di jam va ka Luz a cheŋ Betel a ga va Atarot Addar guuku zuk yeseok geŋ a siŋ Bet Yoron.

14A nyini guuku ale tuk Bet Yoron la yeseoku geŋ tɛŋ banni a tulim va ka yeseok a cheŋ yeniŋ geŋ a ga vuri nyini Kiriat Baal yaase Kiriat Jearim. Ka de ka Juda demma tɛŋ. Kude a jam ka yeniŋ geŋsa.

15Yeseoku geŋsaŋa a piilim nyini ka Kiriat Jearim nakpiaka yeniŋ geŋ, ate tɛŋ banni a jam nyini bulik sii ale bo Neftoa tɛŋka la. 16Tɛŋ banni a va ka guuku zuk a tuk Bet Yinnom Viaka, Arefaim Viaka wiiluk geŋ. Di zaan dula a va ka Yinnom Viaka yeseok geŋsa Jebus tɛŋ kpieŋka a ga paari En Arogel. 17Di ŋman tulim wiilukku geŋ a va ka En Sɛmes a tom du a cheŋ Gelilot ale tuk Adummim la, a ga va Boyan Piuŋku jigini la. Boyan jam ka Aruben nidoabili. 18Di ga va ka wiilukku geŋ Bet Araba churinti a cheŋ Araba. 19Di jam ga va ka Bet Yogla wiilukku geŋsa churintika a jam nyini Yesa Nyakpiemu wiiluk geŋ, a ga kpeglim Jodan benni nɔi yeseoku geŋ. Kude a jam le yeseoku geŋsa tɛŋ banni.

20Jodan benni ale jam chim kori geŋsa tɛŋ banni. Ŋade a jam le tɛŋ banaŋa a labi Benjamin yezuimaŋa kabitaŋa meena la.

21Benjamin dɔkku yezuk yezuk ale jam soa tɛŋ sii la ale nna. Jeriko ale Bet Yogla ale Emek Keziz, 22ale Bet Araba ale Zemaraim ale Betel ale 23Avvim ale Para ale Ofra ale 24Kefar Ammoni ale Ofni ale Geba. Si jam ka tɛŋsa pi ale siye ale si tɛŋ kpaŋsa.

25Gibeon ale Arama ale Beerot ale 26Mizpa ale Kefira ale Mozaya ale 27Arekem ale Irpeel ale Tarala ale 28Zela ale Ya Elef ale Jebus demma tɛŋka Jerusalem ale Gibea ale Kiriat Jearim. Tɛŋsa pi ale sinaansi ale si tɛŋ kpaŋsa ale kala gilim ba. Si de a jam le Benjamin charuku a te wa yezuimaŋa.

Currently Selected:

Josua 18: BWU

Highlight

Copy

Compare