Josua 17

1Kude a jam le charuk a te Manasa ase Josefi bikpagi la, dila abe le Makir, Manasa bikpagni a soa. Makir jam ka Gilead demma ko kpieŋ, baai ale jam tuesi Gilead ale Basan la dii nyiŋla, Makir demma jam ka tugurik tɔŋdɔ kpienta. 2Dila charuku de jam ka Manasa nuru mbala ale soa, yezuimaŋa ale Abiezer ale Yelek ale Asriel ale Sikiim ale Yefer ale Sɛmida. Manasa, Josefi nidoabinni ŋaaŋbisa ba chaama ale jam ka nidoabilisa la yezuimaŋa ale nna.

3Manasa nidoabinni Makir ate wa mɛ nidoabili a chim Gilead la, ate wa mɛ nidoabili a chim Yefer la te wa mɛ nidoabili a chim Zelofehad la. Zelofehad wade a jam ka nidoabilisa ka lieba nyiini, ba yue jam le Mala ale Nowa ale Yogla ale Milka ale Tirza. 4Liema de yaa jam cheŋ kaabteerɔwa Eleaza ale Josua Nun nidoabinni ale niŋdeerɔma jigi a weeni ba ayen, <<Naawen a weeni Moosis kama ayen wa te tama mɛ nitalim ate tama a tanla ase wa le te nidoama nitalim diila.>> Ase Naawen ale jam weeni diila ba mɛ a jam nya nitalim kama ase nidoama la. 5Manasa charuku jam ka tɛŋsa pi a gum chaab ale Gilead ale Basan Jodan benni kori geŋka la, 6dii nyiŋla Manasa dɔkku liema a tuesi nitalim kama a ta nyini nidoabilisaŋa po. Gilead tɛŋka jam ka Manasa ŋaaŋbi sinsila ale soa.

7Manasa jigini a jam paari ka Asɛ ale Mikmetat Sikiim kori geŋsa. Tɛŋ banni yaa va yeseok geŋsa a ga paari nuru baai ale bo En Tappua la a gum du. 8Manasa ale jam soa Tappua tɛŋka, alege Tappua dek ale jam bo Manasa tɛŋ banni po la ka Ɛfraim demma ale soa. 9Tɛŋka banni yaa va yeseok geŋ a ga paari Kanaya Vooliŋka. Tɛŋsa ale jam boro ate Ɛfraim a soa ate si bo Manasa tɛŋsaŋa suŋsuŋ, alege Manasa tɛŋ banni jam le vooliŋka Wiiluk geŋ a ga kpeglim Nyakpiemu nɔi. 10Yeseoku geŋ tɛŋka ka Ɛfraim ale soa, wiilukku geŋ ka Manasa ale soa. Manasa tɛŋka a jam paari ka nyakpiemu a nye bain ale Asɛ dɔkku wiiluk geŋ ale nye bain ale Isaka dɔkku kori geŋ.

11Isaka ale Asɛ po, Manasa a jam maa soa ka Bet San ale Ibleam ale nuruma ale bo Dor ale Endor ale Taanak ale Megiddo la a gum chaab ale ba tɛŋ kpaŋsaŋa ale kali gilim ba la. Buta nyɔnɔwa a nyini Nafot po.

12Manasa demma an jam taari lik tɛŋsaŋa de, ate Keenan demma a diem bo dula. 13Alege Izirali demma ale ga nya pagrim la, ba yaa basi ate Keenan demma a tom fifiok tuima ale an yiak ba a basi ya.

14Josefi ŋaaŋbisaŋa yaa weeni Josua ayen, <<Ka boa ate fi a te tama charuk yeŋ ale nitalim yeŋ nyiini? Tama a piisi kama dii nyiŋla Naawen a niak ti kama nna yegayega.>> 15Josua a yaa tulisi ayen, <<Ase nama a dan piisi a te Ɛfraim tɛŋka ate guuta a bo ka po la a pɔsima a te ni, ni ga che peelim a te nidek Perizzi ale Arefa demma tɛŋsaŋa sagni po a tanla.>>

16Josefi ŋaaŋbisaŋa a yaa tulisi ayen, <<Tɛŋ kaai ate guutaŋa a bo ka po la an soa dii a te tama, Keenan demma meena baai ale bo Bet San ale ka tɛŋ kpaŋsaŋa po la ale baai ale bo Jezreel Viaka po la a ta ka kuta torokoba.>>

17Alege Josua a yaa weeni Josefi yenni demma Ɛfraim ale Manasa ayen, <<Nama a piisi kama ale pagra. Ni kan ta charuk yeŋ dekki 18alege sagni tɛŋka kaai ate guutaŋa a bo ka po la ka nama ale ni soa. Ni che tiisaŋa meena ate ka le lagri a soa diila meena ka nama ale soa. Keenan demma a ta ka kuta torokoba ale pagra, nama baga a yiak ba kama.>>

Currently Selected:

Josua 17: BWU

Highlight

Copy

Compare