Joel 3

1<<Da ŋala ale va ŋala po, ate m le ŋman pai Juda ale Jerusalem paaruŋku a te ba. 2M le tigsi tɛŋ kpieŋsaŋa meena a ta si a siŋ jam Jeyosafat viaka po. Dula ate m yaa le bo ba buusa a va m nuruma Izirali ale ka m nitalim la, diila ba jam kati m nuruma kama a waaŋ tɛŋ kpieŋsa po ale lab m tɛŋka a te chaab. 3Ba nakka gbaŋ m nuruma nyiŋ ale pai nidoabilisa a da te taabuksa ale pai nipokbilisa a da daam nyiŋ ayen ba nyu.

4<<Taaya ale Saidon ale Filistia tɛŋsaŋa meena, yɔgyɔgla de ka boan wari ate ni pai a ta chaab ale mi? Ka wari ate m pai nye ni ate ni a tuni mu? Ase ni dan a tuni dii ate m pai nye ni la nyiŋ, m le ŋmeriŋ nna nwuli ŋman siŋ nidek zuk dii ate ni jam pai nye mi la. 5Diila ni jam pai ka m kpanaŋa ale m ligmɔniŋka ale ŋman ji m jigsika ŋantaŋa a ta cheŋ ni puusika yieŋa. 6Ni jam pai Juda ale Jerusalem demma a da te Girik demma, ayen ni nye ate ba yalima ale ba tɛŋka.

7<<Ni nya, m za m te ba nyini ka juijui ate ni pai ba a da la a jam ate ba jam ni zuk a nye ni dii ate ni jam pai nye ba la. 8Naawen a weeni kama ayen, <<M le pai ni nidoabilisaŋa ale ni liema a da te Juda demma, ate ba mɛ a pai ba a da te Siiba demma, tɛŋ kaai ale yalima.>>

9Mooli nya kude tɛŋ kpieŋsaŋa po ayen, Gomsi a magsi kpaliŋ! Gomsi tugurik tɔŋdɔma! Basi ate nuru baai ale a kpaliŋ la meena a forisi paari a siti. 10Ni kuri ni niiga kuoŋa a nye gebik woŋsa abe ni pai ŋan baai ate ni pai a yoarisi tiisa la a nye gbatta. Te ate waai ale wobsa la a weeni ayen m pagra kama!>> 11Tɛŋ kpieŋsaŋa meena ale bo jigi meena la a jam nwuli a tigsi chaab dula. Naawen yaa, ta fi tugurik tɔŋdɔma a jam!

12<<Te ate tɛŋ kpieŋsa a gomsi. Te ate ba cheŋ paari Jeyosafat dii nyiŋla m za m kali ka dula a bo tɛŋ kpieŋsaŋa meena ale bo jigi meena la buusa. 13Yulum goatuku dii nyiŋla ŋantaŋa ŋarika a paari kama, abe fi tabi yɔnaŋa dii nyiŋla daamu ŋmiaka jigi a sueri kama ate samɔnsaŋa a sueri a waaŋ. Ba gaasaŋa mɛ a zuak ka dila!>> 14Nuru boari, nuru boari ale bo popola luerika viaka po! Naawen danni a moata kama popola luerika viaka po. 15Wenbinni ale chiika ale sobri ate chiŋmarisaŋa a kan ŋman nyaksi. 16Naawen ale wuuri a nyini Zayon abe wa ŋman na a nyini Jerusalem. Tɛŋzuk ale chiŋmaaŋa ale choa. Alege Naawen ale chim ka sukka jigi a te wa nuruma ale yie pagrik a te wa nuruma Izirali.

17<<Ate ni yaa ale miŋ ayen Mi Naawen ka ni Wen a bo Zayon, m tuilum guuku. Jerusalem ale ta tuilum, ate nicham a kan ŋman vari jɔ ka po.

18<<Dai dila danni da paalik ale nyini guutaŋa zuk a siŋ ate biisim ale nyini gu fiisaŋa po a nyini. Nyiam ale chali va Juda beli naŋsaŋa meena, nyiam ale buli a nyini Naawen yenni po a zaŋti Sittim ale bo viaka po la. 19Alege Ejipiti ale kaasi, ate Edom ale chim tɛŋ kayiok, dii nyiŋla wɔkwɔk kaai ate ba jam pai nye Juda demma la. Baai tɛŋ po ate ba jam ko nuru baai ale kan nye wari a kaasi la. 20Juda ale boro taam wuu ate Jerusalem ale kasim boro gaŋsa meena po. 21Ba nuruma ko ka ale te ate ba nye foolaa ate mi ale kan vɔŋ a te ba la, m yaa le vɔŋ a te ba.>> Naawen a bo ka Zayon.

Currently Selected:

Joel 3: BWU

Highlight

Copy

Compare