Joel 2

1Peeri damuniŋka Zayon po. Te ate ba choa chioku m tuilum guuku zuk. Basi ate baai meena ale bo tɛŋka zuk la kpaziita a nak ale Naawen danni a cheena. Ku moata kama. 2Di ale chim ka legi ale sui kaasuŋ dai, di ale chim ka chiŋma ale sobluk dai. Tugurik tɔŋdɔba ale piisi a nyini peelim ase varivientidi ale a lik guuta diila. Ate wa dila choa an diem a nye nya ya yaase di choa a poom za di nye a nya.

3Bolim ale bo ba niŋ a dɛ ate bu choa mɛ a bo ba ŋaaŋ a dɛ. Ba niŋ nyiŋ tɛŋka a nye ase ka Eden kadukka la. Ba ŋaaŋnyiŋ ka gɔi kayiok. Jaab an baga a suk wadek ale ba. 4Ba a nye ase ka wusuma ale laari a tabi ase ŋa a cheŋ kpaliŋ nyeka la. 5Ba va guutaŋa a taam ate ku a nye ase wusuma torokoba ale a taam la ale a nye ase bolim ale a dɛ wuuk diila ale a nye ase tugurik tɔŋdɔba ale yiti a cheŋ kpaliŋ po diila.

6Tɛŋ kpieŋsa a nya kama ate ba kpaziita a nak. Ate waai meena a nya wadek nna fii fiiga. 7Ba gomsi ale a jueli saasa ase ka tugurik tɔŋdɔba la. Ba meena a va ka chaab a gɔk santiri a taam ate waai a kan muriŋ a bɛ. 8Ba kan cheŋ a tusi chaaba. Waai meena a va ka suiku yɔrr a cheŋ wa niŋ nyiŋ. Ba seba baai ale chim kpaga ba zuk la kama a kan nye a kaasi kpaŋta. 9Ba a yeenti kama a cheŋ tɛŋka po. Ba chali va ka siaka zuk. Ba meli kama a jo yieŋa po. Ba va tuokpattaŋa a jo nna se zueba la.

10Tɛŋzuk de a choa kama ate wenzukku a choa, ate wenbinni ale chiika a sobri, ate chiŋmarisaŋa a kan ŋman a nyaksi ba niŋŋa. 11Naawen a na wa tugurik tɔŋdɔma kpagni kama. Wa tugurik tɔŋdɔma a piisi ka nna yegayega ate baai ale a wom wa la a zuak nna yega. Naawen danni a zuak kama ale ŋman pagra. Ka wana ale wa baga a pigi?

12Naawen weeni ayen, <<Yɔgyɔgla de, ŋman pilim jam mi jigi ale ni suiniima meena ale nɔi bobika ale kumsa. 13Ni dari ni suiniimaŋa a cheeri alege daa ni gattaŋa. Ni ŋman pilim cheŋ Naawen ni Wenni jigi, diila wa ka waai ale a yaali teka ale ŋman ta jiirim, ate wa sui a kan kpabi a puuri ale ta ŋmanteka nna yegayega ale a tagri a kan ta biem a jam. 14Ka wana ale seba? Da dii dai wa ale cheem a ta ŋmantiik abe wa basi niauŋ ŋaaŋ ale ŋanbie ale nyuka tiirita a te Naawen fi Wenni. 15Peeri damuniŋka Zayon po abe fi weeni ate ba nye weleŋsa nɔi bobika, abe nuruma a jam jigi yeŋ. 16Tigsi nuruma abe fi gomsi ba. Ta nisɔmma a jam jigi yeŋ, abe fi tigsi bisaŋa ale biluak tii ale diem a ŋoosi la. Basi ate nidoa waai ale diem faari nipok la a basi wa dɔkku. 17Basi ate kaabteerɔma ale bo Naawen yenni nansuiŋku ale kuŋkuŋku suŋsuŋ a tom la a kum. Basi ate ba weeni ayen, <<Naawen yaa, <Pai fi nuruma a basi. Kan nye ate ba pai fi nuruma a chim laata tɛŋ kpieŋsaŋa po. Boan nyiŋ ate ba ale weeni nuruma suŋsuŋ po ayen, ba Wenni a bo ka bɛ?> >>

18Ate Naawen yaa le ta nyuri ale wa tɛŋka a sak jiirim ale wa nuruma.

19Naawen yaa le tulisi ba ayen, <<M ta ŋanbie ale da paalik ale kpaam a cheena ayen m te ate ku paari ni. M kan ŋman nye ate tɛŋ kpieŋsa a nye ni a la.

20M le yiak wiiluk geŋsaŋa tugurik tɔŋdɔma ate ba yalima ale ni. M le tusi ba a basi tɛŋ kosik ale tɛŋ kaai ale kan nye jaab la po. Ate ka niŋka jigini a cheŋ nyakpiemu kori geŋsa. Ate baai ale bo ŋaaŋka la a basi yeniŋ geŋsa. Ate bu nyummu ale kasim a nyuŋ yegayega.>> Chekki wa sum nye wakpiema kama. 21Tɛŋ demma, ni kan yɔksa. Ni sue a peenti abe ni a dɛ masim. Chekki Naawen a nye ka wakpiema. 22Gɔi duŋsaa, ni kan yɔksa, diila wuuk tii ale bo peelim la a boro a sobri kama. Tiisaŋa a yɔni. Kiŋkaŋka ale ti buui ale a melim la mɛ a yɔni si yɔnaŋa kama. 23Zayon demma, ni te ate ni sue a peenti, abe ni dɛ masim ale Naawen ni Wenni, diila wa te ni tɛŋsik ŋmoruk kama wayɔrisima nyiŋ. Wa basi kama ate ŋmoruk a ni nna yegayega yoenni po meena ase dila po wa la. 24Fɔbika dabaasaŋa ale sueri ale ŋanbie. Samɔnsaŋa ale sueri ale da paalik ale kpaam a waaŋ.

25<<Mi ale ŋman pilim a tuni ni bena ŋaai meena ate tintueŋa a dɛ ni ŋantaŋa la. M le tuni tintue kpiemaŋa ale tintue fiisaŋa ale jam dɛ ŋan baai meena la. Tintue m ŋala ale tintue boanni ale dɛ ŋan baai la, m le tuni. M le jam tom m tugurik tɔŋdɔ baai nna yegayekka a basi ni po la. 26Ni ale ta nna yegayega a magsi dɛka, ate ni yaa le pak Naawen ni Wenni, dii ale tom wakinkagla a te ni la. M nuruma a kan ŋman nya chivie. 27Ate ni yaa le miŋ ayen m bo Izirali abe ni ŋman miŋ ayen Mi ale Naawen ni Wenni, ate waai a ŋman karo a gum mi po. M nuruma a kan ŋman nya chivie.

28<<Ate kula ŋaaŋnyiŋ, m le pai M Chiika a nyo nuru meena po. Ni nidoabilisaŋa ale ni liema ale mooli Wen wie. Ni nuru kpagsaŋa ale gɔdaasim, ate ni nuru paalukku ale nya gɔdaasima po wie. 29Nidoa baai ale nipok baai ale tom a te mu da ŋala po la, m le pai M Chiika a nyo ba mɛ po ate ba biisi chum po wie ase Biisiteerɔba la. 30M le sak wakinkagla wenŋmazukku ate ziim ale bolim ale nyuisa ale bo tɛŋzuk de. 31Ate Naawen Dakpienni ale da pagrika danni a jam la, wenbinni ale chimka legi ate chiika a chim ziim. 32Ate waai meena ale a wi Naawen la ale nya varibasika. Diila a nyini Zayon Guuku zuk ale Jerusalem po ate varibasika ale boro ase Naawen ale jam weeni diila ayen, a nyini ŋanvutaŋa la po ate Naawen a wi.

Currently Selected:

Joel 2: BWU

Highlight

Copy

Compare