Amos 1

1Amos waai ale jam ka Tekoa pawuurɔma po wanyi la wieŋa ale nna. Wa ale jam nya diila ale nna a ta va Izirali ku bena ŋaye, ale ge ate tɛŋka choaka a jam, diipo ate Yuzaya a jam chim Juda naab la ate Joas nidoabinni Jeroboam a jam chim Izirali naab. 2Wa jam weeni kama ayen, <<Naawen a wuuri a nyini Zayon ale a na a nyini Jerusalem. Naapeerisaŋa wuyɔgsuku a ko kama, ate Karmel tɛŋka guuku wuutaŋa a kpi.>>

3Naawen ale weeni diila ale nna: <<Damasikus demma wabaataŋa a dan ka tita yaase tinaansi, mi kan basi m suipuurumu ale ba. Dii nyiŋla ba jam a namsi Gilead tɛŋka demma ase ka ba ale a fɔbi zaa diila. 4Mi ale basi ate bolim a chɔgsi Yazael yenni abe bu maa dɛ Ben Yadad yie pagrika mɛ. 5Mi ale wɛ tuok kpioŋku ate ba pai a lik Damasikus tɛŋka la a lɔnsi abe m kaasi naab waai ale bo Aven Viaka po la, ale waai ale ta Bet Eden tɛŋka naamu tachekka la. Araam tɛŋka demma ba ale yik ba a ta cheŋ Kir tɛŋka.>> Naawen ale weeni.

6Naawen ale weeni diila ale nna: <<Gaza tɛŋka wabaataŋa dan poom ka tita yaase tinaansi mi kan vɔŋ a te ba. Dii nyiŋla, ba pai ka tɛŋ pumi dem a da te Edom demma. 7Mi ale basi ate bolim a chɔgsi Gaza tɛŋka parisaŋa abe bu dɛ ba yie pagrisaŋa a kaasi. 8Mi ale kaasi Asdod naawa ale waai ale ta Askelon naamu tachekka la. Mi ale pai m pagrimu a kaasi Ekron a ga paari diipo ate mi ale ko Filistia demma meena la.>> Nyɔnɔwa Naawen ale weeni.

9Dii ate Naawen weeni la ale nna: <<Taaya a dan poom ta wabaata tita yaase tinaansi mi kan vɔŋ a te ba. Dii nyiŋla ba pai ka tɛŋsa nuruba a da te Edom demma ale basi mabinni nɔiyeŋ kaai ate ba ta ale chaab la. 10Mi ale basi ate bolim a chɔgsi Taaya tɛŋka parisaŋa abe bu dɛ ba yie pagrisaŋa.>>

11Naawen ale weeni diila ale nna: <<Edom a dan poom ta wabaata tita yaase tinaansi, mi kan vɔŋ a te ba. Dii nyiŋla, ba vi ba suataŋa Izirali demma ale ka gebik ale poom ka jiirim ale ba. Ba sueŋa a kasim a puuri kama ale ba, ate wa suinni a kasim a dɛ ale kan yɔgi. 12Mi ale basi ate bolim a chɔgsi Teman tɛŋka abe bu dɛ Bozra tɛŋka yie pagrisaŋa a kaasi.>>

13Naawen ale weeni diila ale nna: <<Ammon demma wabaataŋa dan poom ka tita yaase tinaansi, mi kan basi m suipuurumu ale ba. Dii nyiŋla ba mobi nipok puusaŋa ale bo Gilead tɛŋka la. Ba a nye dila kama ayen ba lagri ba tɛŋka banaŋa. 14M le basi ate bolim a chɔgsi Arabba parisaŋa abe bu dɛ ka yie pagrisaŋa. Kpaliŋ kumsa ale boro kpaliŋ dai, ate wɔkwɔk viok ale boro va pagrika danni. 15Tɛŋka naawa ale wa kpaŋŋa ba za ba fɛ ba kama ta ba a ga basi tɛŋ yoŋ po.>> Naawen ale weeni.

Currently Selected:

Amos 1: BWU

Highlight

Copy

Compare