Joel 1

1Naawen wanni ale jan jam Petuel nidoabinni Joel jigi la.

2Nama nisɔmma, ni abe wom nya kude. Baai meena ale bo tɛŋka po la abe wom. Wanni de choa a diem nye ni daaŋa po a nya, yaase ni kokpieŋsaŋa daaŋa po? 3Weeni sak ni nidoabilisaŋa, ate ni nidoabilisaŋa a weeni sak ba mɛ nidoabilisaŋa, ate ba mɛ nidoabilisaŋa a weeni sak ŋaaŋnyiŋ gaŋka. 4Tintueŋa ale tali ŋan baai la, tintue kpiemaŋa a dɛ kama. Tintue kpiemaŋa ale tali ŋan baai la, tintue fiisaŋa a dɛ kama. Tintue fiisaŋa ale tali ŋan baai la, tintue ŋa chaab a dɛ ŋa kama. 5Nama danyuirisa, ni yiti zaani a kum! Nama danyuirisa meena ni kum. Ni kum dapaalika nyiŋ, dii nyiŋla ba chiak bu a nyini ni nɔngbanvaataŋa po kama. 6Tɛŋ ale jam vari jo m tɛŋka po, ka be pagra kama ale piisi. Ka ta ka gbeŋli nyina ale gbeŋ nubi nyina. 7Ka nye kama ate kadukka a doa kinla ale kaasi m kinkaŋsaŋa. Ka lati si paktaŋa kama a yuk basi ale ge peeluk.

8Kum ase nipok kaliak ale jo boorisa garuk a kum wa chorɔ paalik nyiŋla. 9Ŋanbie tiirita ale nyuka tiirita a ŋman ka Naawen yenni po. Kaabteerɔ baai ale tom a te Naawen la a kum kama. 10Laŋsaŋa a kaasi kama, ate tɛŋka a kɔ. Ŋanbieŋa a kaasi kama. Da paalika a kpeeri kama, ate kpaamu a karo. 11Nama kpaarɔba, ni be jɔk yiila, nama baai ale a nya tiisa zuk la, ni be kaari. Ni kum ŋankpaantaŋa nyiŋ, dii nyiŋla kaduksaŋa ate ba a che ŋantaŋa du la a kaasi kama. 12Talimu a kɔ kama ate kiŋkaŋka a kpi. Ti yɔnsaŋa ale tiisaŋa meena ale bo kadukka po la a kpi kama. Nurubiik masimu a muriŋ bɛ kama.

13Kaabteerɔma, ni jɔ boorisa gatta abe ni kum. Nama baai ale a tom kuŋkuŋku niŋ la, ni kum. Nama baai ale tom a te mi Wenni la ni jam jɔ boorisa gatta yokku po. Dii nyiŋla ba peri ŋanbie ale nyuka tiiritaŋa a ta kama ni Wen yenni po. 14Weeni ate nuruma a bobi nɔi. Wi ate ba jam jigi yeŋ. Te nisɔmma ale nuruma meena ale bo tɛŋka zuk la a cheŋ Naawen fi Wenni yenni a kaari wi Naawen.

15Niniga ale chim dai dila danni! Dii nyiŋla Naawen danni a moata kama. Di ale jam ase ka kaasuŋ la a nyini Wen Dii Ale A Niak La jigi. 16Ba an pai ŋandiinta a nyini ti nina po ale ŋman yeeri masim ale suipeentik nyini ti Wen yenni po? 17Bieŋa a kpi kama tɛŋ kosikka po. Duenika yieŋa a kaasi kama. Booŋa a lo dii nyiŋla ŋanbie karo a dueni ŋa po. 18Nya niiŋa ale a ŋuuni dii ya! Ate duŋsa a butim dii nyiŋla wuyɔgsuk karo a te si. Piisa mɛ a poom a nam.

19Naawen yaa, ka fi ate mi a wi, diila bolim ale dɛ wuyɔgsuku ale bo peelim la ate bolim ŋiak a dɛ tiisaŋa meena ale bo kaduksaŋa po la. 20Gɔi duŋsaŋa mɛ a poom lak ka nɔi a yaali fu. Beli naŋsaŋa nyaataŋa a kpeeri kama ate bolim a dɛ wuyɔgsuku ale bo peelim la.

Currently Selected:

Joel 1: BWU

Highlight

Copy

Compare