Yosea 14

1Izirali, ŋman pilim cheŋ Naawen ni Wenni jigi. Ni wabaataŋa ale ta ni luetaŋa a jam. 2Pai wie a nyo fi nyiŋ po a ŋman cheŋ Naawen jigi. A weeni wa ayen, <<Vɔŋ ti wabaataŋa meena a te ti abe fi tuesi ti nalimnyiini, ate ti pai pimpauk a te fu ase ti ale puulim diila. 3Assiria an baga a vari ti a basi. Ti a kan zaani wusuma a magsi kpaliŋŋa. Ti kan ŋman weeni ayen, <Ti wenaŋa> a te ŋan baai ate ti pai ti nisa a nye la, diila ka fi jigi ate baai ale kan ta koba la a nya jiirim.>>

4<<M le tebi ba tukpanni abe m yaali ba nna fasiyaa, diila m suipuurumu a basi ba kama. 5Mi ale nye ase ka maglim la a te Izirali. Wa ale busum ase puuta la. Ase Lebanon nyunyoŋ la wa tɛŋ naŋsaŋa ale siŋ tɛŋ a feri paari. 6Wa naŋ bulaŋa ale pusi a chim. Wa nalimu ale nye ase ka kpaam tiib la. Wa nyummu ale nye ase ka Lebanon nyunyoŋ la. 7Nidoaba ale ŋman bo wa yɔgsummu po. Wa ale piisi ase ŋanbie la. Wa ale chim ase tiib la, ate wa yuei ale yiti ase Lebanon daam la. 8Ɛfraim, mi ale ŋman ta ka boan wari a nye ale bɔgta? M le tulisi wa abe m nya wa zuk. Mi a nye ase dapeelita tiib ale ta vaata la. Fi yɔna nyeka a nyini ka mi jigi.>>

9Ka wana ale ta yammoa? Wa ale nya ŋantaŋa de kiri. Ka wana ale a miŋi? Wa ale miŋ ŋa kiri. Naawen suitaŋa ka wensie. Wayɔrisima nyama a cheŋ ka ti po, alege tukpari nyama a nak ka naŋsa ti po.

Currently Selected:

Yosea 14: BWU

Highlight

Copy

Compare