Jeremaya 9
9
1Mi zukku a dan poom ka bulik nyiam ate mi ninaŋa a chim ninyaata bulik m ti le kum kantueŋ ale yok a te m nuruma koka. 2Mi dan poom ta ka duaka jigi gɔnni po a te nyeendɔba, m ti le basi m nuruma abe m cheŋ diila ba meena ka kaboŋ nyeerisa ale a ka wensie nuru boari.
3<<Ba gomsi ba giŋgeluŋtaŋa kama ase tima la, ayen ba tɔŋ venta. Ku daa wensie nyiŋ ate ba nya pagrim tɛŋka po. Ba nyini ka wabiok kunyi a cheŋ m ku. Ba kan siak mi.>> Naawen ale weeni.
4<<Seba fi doama wari. Kan ta sebchakka ale fi suataŋa. Diila suok meena ka pimpaasirɔ, ate doa meena yik kaasirɔ. 5Doa a paasi doa, ate waai a kan biisi wensie. Ba sak ba giŋgeluŋtaŋa ayen ti a velim. A jiak badek ale wabaata nyeka. 6Fi bo ka pimpaasima suŋsuŋ. Ba pimpaasimaŋa po ba zɛri kama an siak te mi.>> Naawen ale weeni.
7Dila nyiŋ Naawen Dii Ale A Dɛ Tugurik Tɔŋdɔma Niŋ La ale weeni diila ale nna: <<Nya, m le soti ba abe m chamsi ba, diila mi ale ŋman nye ka sɛ m nuruma wabaataŋa nyiŋŋa? 8Ba giŋgeluŋtaŋa ka pein yaani, ti a biisi ka venta. Ale wa nɔnni waai meena biisi ka yaalika a te wa vaanchoa, alege wa suinummu po wa bari baruk a limisi wa. 9M kan namsi ba kude nyiŋŋa? M kan zɛri m dek nyiŋ a namsi tɛŋka de choa?>> Naawen ale weeni.
10M le kum abe m wooli a te guutaŋa abe m pai kumsa a su a magsi chaab ale gɔnni wuuku. Ti doa ka koruk ate waai an nyiem du, ate niiga ŋuuniŋ an wom du. Wenzuk nuinsaŋa a yiti cheŋ ate duŋsaŋa a cheŋ.
11Naawen a weeni ayen, <<M le basi ate Jerusalem a duak guura a vi chaab ale suemkpatta boka jigi abe m basi ate Juda tɛŋsaŋa a dua kinla ate nuru a kan baga a boro.>>
12Ka nuru boa ale ta yam zuak a baga a miŋ kude? Ka wana ate Naawen a sak ate wa baga a weeni kude kiri ya? Ka boa ate tɛŋka a kaasi a doa kinla ase gɔi la ate waai an baga a va du a taamu?
13Naawen a weeni ayen, <<Ka ba le zɛri mi sinsaŋŋa ate mi a pai dueni ba niŋ la nyiŋ, ba an zuli mi yaase ba va m sinsaŋŋa. 14Ba goanti va ka badek tuikpari ale ba suiniima ale a yaali diila. Ba va ka Baal bɔgtaŋa ase ba koma ale sak ba diila.>> 15Dila Naawen Dii Ale A Dɛ Tugurik Tɔŋdɔma Niŋ La, Izirali Wenni ale weeni diila ale nna: <<Nya, m le basi ate nuruma de a de ŋandiin tuasa abe ba nyu choŋ nyiam. 16M le kati ba waaŋ tɛŋsa po ate ba yaase ba koma a zɛ la, ate m yaa vi ba ale gebik ate m ga ko ba.>>
17Naawen Dii Ale A Dɛ Tugurik Tɔŋdɔma Niŋ La ale weeni diila ale nna: <<Poli yɔgyɔgla! Wi nipok baai ale a wooli la ate ba jam. Tom wi baai ale seba nna yega. 18Basi ate ba jam mwuli a kum ti zuk ate ti ninaŋa a ga chali ale ninyaata ate ninyaata a kpiiri a zi. 19Woolika ale wom a nyini Zayon: <Ti le kaasi soa dii! Ti chivieŋa ale zuak soa dii! Ku a fɛ ate ti basi ti tɛŋka dii nyiŋla ti yieŋa a dua ga guura.> >>
20Yɔgyɔgla de nipooba, ni wom Naawen wanni, ni lak ni tueŋa a wom wa nɔnni wieŋa. Ni sak ni liema ba le ba wooli diila, ni sak chaab kumsa. 21Kum a meli va ka ti tuokpattaŋa a jo ti yie pagrisaŋa po, a yaa gebi ti bisaŋa suitaŋa po ale ti nidoa paalukku yabaŋa po.
22Weeni ayen, <<Naawen ale weeni diila ale nna: <Kpieba nyiŋsa ale duak ase tampoi la peelimmu po, ase ŋanbie ate ŋaridɔ a ŋari dueni wa ŋaaŋ la, ate waai karo a tigsi.> >>
23Naawen ale weeni diila ale nna: <<Yam nyɔnɔwa a kaa kuulim wa yammu nyiŋŋa yaase pagrɔwa a kuulim wa pagrimu nyiŋŋa yaase jigsirɔwa a kuulim wa jigsika nyiŋŋa, 24alege basi ate waai ale a kuulim la a kuulim nna: Ayen wa a miŋ ale seba mi, ayen Mi ale Naawen, waai ale a sak ŋmanteka ale nyemagsika ale wayɔrisima tɛŋzuk de, diila mi mariŋ ka ŋade.>> Naawen ale weeni.
25Naawen ale weeni diila ale nna: <<Daaŋa a cheena ate m le namsi baai meena ale gebi ba yua nyiini nyiŋ lammu po la, 26Ejipiti ale Juda ale Edom ale Ammon ale Moab ale baai meena ale bo gɔnni po niŋniŋ jiga la. Diila tɛŋsaŋa de meena an sum gebi ya, ate Izirali yenni meena an poom gebi ba suiniima po.>>
Currently Selected:
Jeremaya 9: BWU
Highlight
Share
Compare
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
