Jeremaya 10
10
1Izirali yeri yaa, wom Naawen ale ta dii ayen wa weeni fu la. 2Naawen ale weeni diila ale nna: <<Ni kan zamsi tɛŋsaŋa wieŋa yaase ni kpaziim a nak ale daani ŋaai ale bo wenzukku la, tɛŋsaŋa kpaziim a poom a nak ale ba kama. 3Nuruma korom wieŋa a ka kiriya. Ba gebi ka tiib tiisaŋa po ate peesirɔ a peesi ale liak. 4Ba gobi ku ale kpana ale ligmɔniŋ. Ba pai piema ale janakferim a nak yik chaab dila ate ku kan kpeeri. 5Ase jaab ate ba ti zaani ŋan kpaanta po a yiak nuinsa, ba ka bɔgluk tii ale kaa biisi, ku a fɛ ayen ba ji a ta cheŋ dii nyiŋla ti an baga a cheŋ. Ni kan chali ti. Ti an baga a nye biem yaase ti nye wamaŋŋa.>>
6Naawen yaa, waai karo a nye ase fi la, fi zuak kama, ate fi yuenni a chim yuei kpienni ale pagrim. 7Ka wana ale kan wa chali fu, tɛŋsa Naaba? Ka fi ale magsi diila ale la. Yam nyama meena ale bo tɛŋsaŋa po la ale ba naataŋa meena po la, waai karo ase fi la. 8Ba meena a ka yammoa ale chim betta. Daata bɔgluk tii ale kan ta kiri la ale sak ba. 9Kpana ŋaai ate ba kuri la a nyini ka Tarsis ate ligmɔniŋka a nyini Ufaz. Peesirɔwa ale choakudɔwa ale nye jabuui la ba jo wa ale ka garuk sobluk ale garuk mɔnuŋ. Ba meena ka baai ale seba ŋanta nyeka la ale nye. 10Alege Naawen ale wensie Wenni, wa ale Wen dii ale vua la, taam wuu Naawa. Wa sui a dan puuri, tɛŋka a kpiŋsi kama. Tɛŋsaŋa an baga a pik wa suipuurumu.
11<<Weeni ba nna: <Wenaŋa de, ŋaai ale kan nye wenzukku ale tɛŋka la ale bɛ tɛŋzuk ale tɛŋka meena.> >>
12Alege Wen ale nye tɛŋka ale wa pagrim, wa dueni tɛŋka ale wa yam ale dari wenŋmazukku ale wa miŋka. 13Wa dan na nanpaniŋ, nyaataŋa ale bo wenŋmazukku la a wuuri kama, wa basi ate chiŋma a yiti tɛŋka kpeglimka jiga. Wa a tom nyaksika ale ŋmoruk ale ta viok a nyini wa kɔlima yeeŋa po a nyini.
14Waai meena a kan poli ale zɛ jaaboa, ligmɔniŋ kuridɔ meena chivie ale ta wa ale wa bɔgtaŋa. Wa ŋan mɛɛntaŋa ka varuk. Ba ka vuusum ba po. 15Ba ka kiri ya, ŋan baai ale ka ŋan laanta. Ba buusaŋa a dan jam, ba le kpi. 16Jekob Wenni daa nna, diila wa ale jaab meena Nyeerɔ, a maa gum Izirali du, wa nitalim buuni. Naawen Dii Ale A Dɛ Tugurik Tɔŋdɔma Niŋ La ale wa yuenni.
17Ni tigsi ŋan baai ate ni soa la a basi tɛŋka, nama baai ate ba lik ni a ta la. 18Diila Naawen ale weeni diila ale nna: <<Nnala nna Naawen ale yuk baai ale bo tɛŋka de po la a basi. M le ta daanika a jam ba jigi ate dila ba yik ba.>>
19Ku ale tua a te mu m kɔnika nyiŋ. M le kɔni diila a ka tebika. Alege mi weeni mi dek ayen, <<M nyiŋtuilaŋa ale nna, ate ku a fɛ ayen m pik.>> 20Mi viuku a kaasi kama. Ku miisaŋa meena ba chiak kama. M nidoabilisaŋa a cheŋ alege mu ba ŋman ka. Waai an ŋman tali ayen wa ti m viuku yaase wa ti m kusuŋku. 21Naapeerisaŋa a kan poli, ba abe kan kpesi a nyini Naawen jigi ya, dila nyiŋ ba kan nya ba dega ate ba piisaŋa meena a waaŋ. 22Ni wom, tontomiŋka cheena, butimka yega ale nyini wiiluk geŋka tɛŋka a cheena. Ku le nye ate Juda tɛŋ ninaŋa a doa koruta, suemkpatta boka jigi.
23Naawen yaa, mi seba ayen nurubiik nyuvuri daa wadek ale soa. Daa nurubiik dek ale a dak wa chelimu. 24Sak mu, Naawen yaa, alege nye ale nyemagsika daa suipuurummoa, kan daa di fi le nye ate m chim jaab kama. 25Kpiiri fi suipuurumu a basi tɛŋsaŋa zuk sii ale kan siak a te fu la, baai ale kaa wi fi yuenni la. Diila ba ko Jekob kama. Ba ko wa ka chessi a kaasi wa tɛŋka meena.
Currently Selected:
Jeremaya 10: BWU
Highlight
Share
Compare
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
