Jeremaya 8
8
1<< <Dila po, Juda nalimaŋa ale kpaga koba, kaabteerɔba ale biisiteerɔba ale Jerusalem nuruma koba ale yeeri ba boositaŋa po. Naawen ale weeni. 2Ba le za ka jassi a te wenbinni ale chiika ale wenzukku chiŋmarisaŋa, ate ba a yaali ale tom a te ale va ale a kpesi wie ba jigi ale puusi a te la. Ba kan gu ba, alege ba le chim ka yaata a doa tɛŋka. 3Juijui meena ate mi a yiak ba la, tɛŋ bioku de baai meena ale a vuuk la ale yaali kum a gaam nyuvuri. Naawen Dii Ale A Dɛ Tugurik Tɔŋdɔma Niŋ La ale weeni.>
4<<Weeni ba ayen, <Naawen ale weeni diila ale nna: Nuruba a dan lo, ba kan yiti? Nuru a dan cheem cheŋ, wa kan ŋmani? 5Ka boa abe le soa ate nuruma de a cheem a cheŋŋi? Ka boa ale soa ate Jerusalem a kasim cheem a cheŋŋi? Ba yik ka pimpaasima a ta. Ba zɛri kama a kan ŋmani. 6Mi kpesi a wom kama, alege ba kan weeni dii ale magsi la. Waai a kan laŋ nyeka ale wa gaasa, a weeni ayen, <<Ka boa ate m nye?>> Waai meena a va ka wadek suik ase wusum ale zeenti a jo kpaliŋ po la. 7Jumbaliiruku ale bo wenzukku a poom seba ku daaŋa kama, ale nangbaŋka ale takaribaleeŋ ale yiila nuim a kpesi daa ŋaai ate si cheŋ tɛŋ yoŋ la kama. Alege mi nuruma a zɛ Naawen ale a yaali wa ŋaai la.
8<< <Ni nye ka sɛ a weeni ayen, <<Tama a ta yam kama, diila ti ta Naawen sinsaŋŋa kama,>> ale wensie chekki sinsak ŋmarisidoama venta ja ŋmarisimu a nye di ale venta? 9Yam nyama ale jo chivie po. Ku le cha ba ate ba bari yik ba. Ba le toalim zɛri Naawen wanni la. Ka boan jaab yam choa ate ba ta? 10Dila nyiŋ m le pai ba pooma a te nidoa yonta ale ba laŋsaŋa a te nuru paalisa ate ba soa. A zaani baai ale fiisa a ga paari baai ale zuak, ba meena a ta ka butuem a yaali nyuenta a te badek. Biisiteerɔba ale kaabteerɔba meena wayeŋ a nye gaasa. 11Ba a pobi mi nuruma mulaŋa ase ku daa wari la. Ba weeni ayen, <<Suiyɔgni, suiyɔgni,>> alege suiyɔgni a karo. 12Ba a chali chivie ale ba nyeela ŋaai ate mi kisa la? Aaya, ba kan chali chivie bola. Ba poom zɛ chivie bo ba nina po. Dila ba le lo baai ale lo la po. M dan namsi ba ba le siŋ tɛŋ. Naawen ale weeni.
13<< <M le pai ba ŋancheentaŋa a ta cheŋ. Naawen ale weeni. Yɔna a kan bo naŋsaŋa nyiŋŋa. Kinkama a kan bo kinkaŋsaŋa zuwa, ate si vaataŋa a wiiri. Jabuui ate m te ba la, m le tuesi ba jigi.> >>
14Wen nuruma a bek ayen, <<Ka boa ate ti kali dela? Ni tigsi chaab. Ni basi ate ti chali cheŋ tɛŋ pagrisaŋa a kpi dula. Diila Naawen ti Wenni a pai ti a te ka kum a te ti choŋ nyiam ayen ti nyu dii nyiŋla ti tom kaasi wa kama. 15Ti a yiili ka suiyɔgni alege wamaŋ an jam ya, a magsi tebika dai, alege ka kpazinagsuk nyiini. 16Dachiaka wusumaŋa siŋtika a wom a nyini Dan. Ba wusum doataŋa kumsa a basi ate tɛŋka meena a choa. Ŋa jam ŋade tɛŋka ale jaab meena ale bo ka po la, tɛŋka ale baai meena ale boro la.>>
17<<Nya, m le tom waapiisa ate si cheŋ ba suŋsuŋ, waab piŋesɔba ate ŋa ka baliŋ ka ate ŋa dom ba.>> Naawen ale weeni.
18M Suiyɔgni Nyɔnɔwa a bo suipuurum po, m suinummu a fuŋti kama. 19Wom m nuruma kumsa a nyini tɛŋ kaai ale yalima la. <<Naawen an bo Zayon? Naawa a ŋman ka dula? Ka boa ate ba nye ate mi sui a puuri ale ba ŋanmɛɛntaŋa, ale ba bɔgluk chaŋ sii ale kan ta kiri la?>>
20Wen nuruba weeni ayen, <<Cheka a taam kama, fanɔnni a kpeglim ya, ate tama a ka varibasika.>>
21Mi nuruma ale ŋɔriŋ la, mi ŋɔriŋ kama. Mi kum kama, ate yɔgsum a yik mu. 22Kpaam a ka Gilead po? Tebirɔ a ka dula? Ka boa abe le soa ate tebika a karo a te m nuruma mulaŋa?
Currently Selected:
Jeremaya 8: BWU
Highlight
Share
Compare
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
