Jeremaya 7
7
1Wa dii ale jam nyini Naawen jigi a jam Jeremaya jigi la ale nna: 2<<Zaani Naawen yenni nansuiŋku nɔi a mooli wanni de: <Nama Juda dem baai meena ale va nansuiŋtaŋa a jam a puusi Naawen la a wom Naawen wanni. 3Dii ate Naawen Dii Ale A Dɛ Tugurik Tɔŋdɔma Niŋ La, Izirali Wenni a weeni la ale nna: Ni tagri ni suitaŋa ale ni nyeelaŋa, ate m basi ate ni bo dela. 4Ni kan pai sebchakka a basi pimpaasima wie po a weeni ayen, <<Naawen yenni ale nna, Naawen yenni, Naawen yenni!>> 5Ni dan sum tagri ni suitaŋa ale ni nyeelaŋa ale nye chaab a magsi, 6ni dan kan namsi nichamma ale kpiŋsaŋa yaase pukɔga ale m basi ate ni an ko baai ale kan nye wari kaasi la, ate ni an va wen yona a ta nidek a jo biem po, 7m le te ni bo dela, tɛŋ kaai ate m te ni kokpieŋsaŋa taam wuu la. 8Alege nya, ni a pai ni sebchakka a basi ka pimpaasima wie ŋaai ale kan ta kiri la.
9<< <Fi le zu ale ko, a nye kaboŋsa ale velim, a ju ŋan baai nyum ale masa a te Baal ale va wen yona ate fi zɛ, 10abe fi jam za mi niŋ yenni de po, dii ale ta mi Yuenni, abe fi weeni ayen, <<Wari kan nye tama,>> tidek a baga a nye kisika wieŋa de meena? 11Yenni de ale ta mi Yuenni la a yaa chim ka zueba boka jigi a te ni? Alege mi a nya kama. Naawen ale weeni.
12<< <Yɔgyɔgla de cheŋ juijui ale bo Siilo la juijui ate mi liŋ nyeboka jigi m Yuenni nyiŋla, a nya m le nye jigini dii, m nuruma Izirali gaasaŋa nyiŋla. 13Ni le diem a nye wieŋa de meena la, Naawen ale weeni, mi biisi ale ni kama a tulim, alege ni an wom ya. M wi ni kama alege ni an tulisi ya. 14Dila nyiŋ, m le nye Siilo diila yɔgyɔgla de m le nye yeri dii ale ta m Yuenni la, yeri dii ate ni ta sebchakka, juijui ate m pai te ni ale ni koma la. 15M le tusi ni mi jigi a basi, ase m ni nye ni suataŋa, Ɛfraim demma meena diila.>
16<<Dila kan puusi nuruma de yaase fi saalim te ba. Kan saalim mi, diila m kan wom fu. 17Fi kan nya ba le a nye dii Juda tɛŋsaŋa po ale Jerusalem suitaŋa po la? 18Bisaŋa a tigsi daata, ate koma a cheem bolim ate nipooma a kaali zom a nye boroborok a te bɔgluk nipowa ate ba a wi ayen Wenŋmazuk Nipok Naawa. Ba kpiiri nyuka tiirim a te wen yona a nye ate mi sui a puuri. 19Alege ka mi ate ba nye ate mi sui a puuri? Naawen ale weeni. Ba an goanti a nye daa badek biemmoa, a te badek chivie?
20<< <Dila la, Nyɔnɔwa Naawen ale biisi diila ale nna, M le kpiiri m suipuurumu ale suidomsika dela jigini zuk ale nurubiik ale duŋ zuk ale laŋka tiisa zuk ale tɛŋka yɔna zuk, ate bu de a kan kpimsi.
21<< <Naawen Dii Ale A Dɛ Tugurik Tɔŋdɔma Niŋ La, Izirali Wenni, ale weeni diila ale nna: Ni nye a cheŋ, ni gum ni juka tiiritaŋa ni kaab sinsila po a ŋɔbi ni lantaŋa nidek. 22Diila mi ale jam ta ni kokpieŋsaŋa a nyini Ejipiti la, mi an te ba daa sinsaga a magsi ale juka tiirita ale kaabsa nyiini, 23alege mi te ka sinsaŋŋa de: Ni a zuli mu, ate m chim ni Wen ate nama a chim m nuruba. Ni a cheŋ sui tii meena ate m weeni ni la po, ate ku cheŋ nalimnyiini ale ni. 24Alege ba an wom ya yaase ba popola a boro, ba goanti va ka badek tuikpanni ale ba popola baataŋa ale a yaali diila. Ba cheŋ ka ŋaaŋnyiŋ alege daa niŋ nyiŋŋa. 25A nyini diipo ate ni kokpieŋsaŋa a basi Ejipiti la a jam paari yɔgyɔgla daa meena mi jam tom mi tomteerɔma ale biisiteerɔma a tulim kama. 26Alege ba an wom mi yaase ba popola a boro. Ba suiniimaŋa a jam lik kama ate ba nye biem a gaam ba kokpieŋsaŋa.>
27<<Fi dan weeni ba kude meena ba kan wom fu, fi dan wi ba, ba kan tulisi. 28Dila nyiŋ weeni ba ayen, <Tɛŋka de ale kan zuli Naawen ka Wenni yaase ba siak sinsaga. Wensie a bɛ kama, ŋa muriŋ bɛ ba noaŋa po kama. 29Che fi zuisaŋa a yuk basi, abe fi pai kumsa a su a kum guuk tii ate tiisa karo la zuk. Diila Naawen a zɛri kama ale basi beŋka de ate wa sui a puuri ale ba.
30<< <Juda demma a nye ka biem mi nina po. Naawen ale weeni. Ba pai ka bɔgluk tii ate mi kisa la a zaani yenni ale ta mi Yuenni la po ale taŋ di. 31Ba sɛ Tofet tangbanaŋa Ben Yinnom Viaka po ayen ba ju ba nidoabilisaŋa ale ba liema ale bolim, wa dii ate mi an weeni yaase di jo mi popola po. 32Dila seba, daaŋa cheena, Naawen ale weeni, ate nuruba a kan ŋman wi Tofet yaase Ben Yinnom Viaka, alege ka Tɔgrika Viak, diila ba le gu kpieba Tofet ate jigi a kan boro. 33Nuruma de nyiŋsaŋa yaa le chim ŋandiinta a te wenzuk nuinsa ale tɛŋzuk duŋsa, ate waai a kan boro a nyigsi ate si cheŋ. 34M le ta masim ale suipeentik nuemka a jam kpeglimka jigi. Nipok ale wa chorɔ lueluta Juda tɛŋsaŋa ale Jerusalem suitaŋa po ale nye diki, diila tɛŋka ale chim tɛŋ koruk.
Currently Selected:
Jeremaya 7: BWU
Highlight
Share
Compare
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
