Jeremaya 6
6
1<<Benjamin demma ni chali a vari nidek. Ni chali nyini Jerusalem. Peeri damuniŋka Tekoa po. Zak wari Bet Yakkerem zuk. Diila kaasuŋ ale vuri nyini wiilukku geŋ, poom ka kaasuŋ kuui ale bie. 2M le kaasi Zayon Liewa, waai ale nala ale baasa. 3Naapeerisa ale ba piisa ale jam ta chaab ale wa. Ba le ti ba viita a gilim wa, ate waai meena a nya wadek kabini.>>
4<<Gomsi kpaliŋ ale wa. Yiti, basi ate ti siti wa kantueŋ suŋsuŋ. Alege, ku an niak ya, kantueŋka a muriŋ a bɛ ate junɔi yisuŋtaŋa a teeri a cheŋ. 5Dila yiti, te ti siti yok a kaasi wa jigi pagrisaŋa.>>
6Naawen Dii Ale A Dɛ Tugurik Tɔŋdɔma Niŋ La ale weeni ayen, <<Gebi tiisaŋa a dueni tɛŋ a sɛ bimbima a ta chaab ale Jerusalem. Ku a fɛ ate tɛŋka de a nya namsika, ka sueri ale ka namsika. 7Ase vili nyiam ale a nyini diila, dila dek ate wa gaasaŋa a nyini. Vakvak ale kaasuŋ ale kasim bo wa po. Wa nyiŋtuilaŋa ale wa mulaŋa a kasim bo ka mi niŋ. 8Jerusalem pai kaamka dan kan daa di m le cheem abe m ge fu abe m basi ate fi tɛŋka a doa koruk ate waai a kan baga a bo ka po.>>
9Naawen Dii Ale A Dɛ Tugurik Tɔŋdɔma Niŋ La ale weeni diila ale nna: <<Basi ate ba yiisi Izirali baai ale tali la meena ase tiisa la, ta fi nisaŋa a va naŋsaŋa zuk ŋmana ase waai ale a tigsi yona la.>>
10Ka wana ate mi ale biisi a te abe m te kaamka? Ka wana ale wa wom mi? Ba tueŋa a lik kama dila ba kan wom. Naawen wanni ka lieta a te ba. Ba kan nya masim di po. 11Alege Naawen suipuurumu ale sueri mi, mi an baga a pik a ta, <<Kpiiri bu a basi bisaŋa ale bo suitaŋa po la zuk ale nidoa paalukku ale tigsi chaab la, chorɔ ale pok meena ale boro ale ŋankpagsa, baai bena ale piisi. 12Ba yieŋa ale tulim te nuru yonta ale ba laŋsa ale ba pooba meena, ase m nin teeri m nisaŋa a ta chaab ale baai ale bo tɛŋka po la.>> Naawen ale weeni. 13<<A zaani waai ale fiisa a ga paari waai ale zuak, ba meena a ta ka butuem a yaali nyuenta, biisiteerɔba ale kaabteerɔba meena, ba meena a ta ka pimpaasima nyeka. 14Ba a tebi m nuruma mulaŋa nna ase daa ninmuna wari la. Ba a weeni ayen, <Suiyɔgni a boro, suiyɔgni a boro,> alege suiyɔgni a ka. 15Ba a chali chivie ale nyeela ŋaai ate waai a kan yaali la? Aaya, ba kan chali chivie bola. Ba poom zɛ ba le ba nye dii ale chivie la. Dila ba le lo baai ale lo la suŋsuŋ. Mi a dan namsi ba ba le siŋ tɛŋ.>> Naawen ale weeni.
16Naawen ale weeni diila ale nna: <<Zaani sui tii ale bari la a nya, bek dipo suitaŋa wari, bek suimaŋka ale bo juijui la, a cheŋ ku po, ate ni chiisaŋa ale nya vuusum. Alege ni weeni ayen, <Ti kan cheŋ ku po.> 17Mi lueri ka limisidɔba ayen ba a nya ni zuk ale weeni ayen, <Wom damuniŋka peerika.> Alege ni weeni ayen, <Ti kan wom.> 18Dila nyiŋ tɛŋsaa ni wom, ni kpesi nya, seerɔba dii ale di nye ba la. 19Tɛŋzuk a wom, m ta ka kaasuŋ a cheena nuruma de zuk, ba biem zɔŋŋa, dii nyiŋla ba an wom mi wieŋa ale zɛri mi sinsaŋŋa. 20Boa ate mi niŋ a bo Siiba ŋan baai nyum ale masa po yaase niŋ tɛŋ kaai ŋanta nyum ale masa la? Ni juka tiiritaŋa mi kan siagi. Ni kaabka kan peenti mi sui ya.>>
21Dila nyiŋ Naawen ale weeni diila ale nna: <<M le pai ŋan kasinta a kasi nuruma de. Koba ale nidoabilisa meena ale nak naŋsa. Gilagila dem ale doaba ale kpi.>>
22Naawen ale weeni diila ale nna: <<Nya, tugurik tɔŋdɔba ale nyini wiiluk geŋka tɛŋ a cheena, tɛŋ kpieŋ ate ba choaka ate ka nyini niŋ a cheena. 23Ba gomsi badek ale ka tom ale gbaluk, ba nyeka a toa kama a kan sak jiirimmoa. Ba wusumaŋa doka a nuem ase ka nyakpiem ale a wuuri la. Ba a jam ase ka nuruba ale gum chaab ayen ba siti ni la, Zayon Lie.>>
24Ti wom ni wie kama ate ti nisima a kpi nna limalima. Nyiŋdomma ale yik ti, nyiŋdomma ase nipok puuk ale a dom la. 25Kan nyini laŋsaŋa po yaase ni cheŋ suitaŋa po, diila dachiaka a ta ka gebik, ate nyigsika a bo jigi meena. 26Mi nuruma ni jo boorisa gatta a bilim buntuem po, ni kum a kaari ase ni biik meena ale kpi la, diila ku kan beni kaasirɔwa ale jam ti zuk.
27<<Mi nye fu kama ayen fi a chamsi kuta abe m nuruma a chim chiila ate ni baga a kpesi abe ni chamsi ni suitaŋa. 28Ba meena ka tuikpari nyam baai ale pagra a gilim velim a kaasi. Ba ka kutuk mɔnuŋ ale kutuk, ba meena a nye a kaasi kama. 29Ŋan fuŋtaŋa a fuk kama yega ate bolimu a de ate kutuk baasuŋku a muriŋ a bɛ alege sotika a chim kinla, gaasa nyama an soti ya. 30Ba a wi ba ayen ka kpana ŋaai ate ba zɛri, dii nyiŋla Naawen a zɛri ba kama.>>
Currently Selected:
Jeremaya 6: BWU
Highlight
Share
Compare
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
