Jeremaya 5

1<<Ni cheŋ va Jerusalem suitaŋa a jueli abe ni cheŋ siŋ, ni nya gilim abe ni poli, ni gisi ka gugottaŋa po. Ni a nin baga a nya nuru yeŋ ate wa a nye a magsi ale a yaali wensie, m le vɔŋ a te tɛŋka de. 2Ba poom a weeni ayen, <Ase Naawen ale sum vua la,> ba diem a pɛ ka venta pɛka.>>

3Naawen yaa, fi nina a kan nya daa wensie? Fi nak ba, alege ba zɛ ayen ba nyiŋsa a dom. Fi ŋɔriŋ ba alege ba zɛri sinsaga. Ba basi ate ba nina a pagra a gaam tintain ale zɛri tagrika. 4Mi poli ayen, <<Bade ka ŋanjaksa nyiini, ba ka betta, diila ba zɛ Naawen suiku, ba Wenni ale a yaali wa ŋaai la. 5Dila m le cheŋ niŋdeerɔma jigi a biisi ale ba, wensie ba seba Naawen suiku kama, wa ŋaai ate Wen a yaali la.>> Alege ba nye ka nɔiyeŋ a wɛ niiga diokku ale gebi ŋanbobintaŋa. 6Dila nyiŋ gbeŋli ale siti ba tiisaŋa po, piuk ale nyini gɔnni po a te ba tuem, yɔŋni ale doa a moata tɛŋsaŋa a limisi ate waai ale a nyini la di dari wa a passi bunabuna, diila ba ale a zɛri mi nɔi la a zuak ka yega ate ba le a basi mi vaka la a piisi.

7<<Ka boa ale soa ate m vɔŋ a te ni? Ni bisaŋa a basi mi kama ale pɛ wen ŋaai ale kan daa wena. Mi te ni ni ŋan silimta meena, alege ba tom kaboŋsa ale tom chaab a jo tabuksa yie po. 8Ba chak kama ase wusum doata ale chak diila, a ta kɔrisa, ate waai meena a yaali wa vaanchoa pok. 9M kan namsi ba kude nyiŋŋa?>> Naawen ale weeni. <<M dek kan zaani a tuni tɛŋka de kude nyiŋŋa?

10<<Ni cheŋ va wa tiisaŋa po a che si, alege ni kan kaasi si chessi. Che naŋsaŋa meena, diila nuruma de daa Naawen ale soa ba. 11Izirali yenni ale Juda yenni a bola ka wensie ale mi.>> Naawen ale weeni.

12Ba velim Naawen wie kama. Ba weeni ayen, <<Wa kan nye jaaboa. Biem a kan jam ti jigi. Ti kan maa nya gebiga yaase kɔmmoa. 13Biisiteerɔma a nye ase ka viok la ate wanni a ka ba po, dila basi ate ba le a weeni diila a nye ba.>>

14Dila nyiŋ Naawen, Wen Dii Ale A Dɛ Tugurik Tɔŋdɔma Niŋ La ale weeni diila ale nna: <<Nuruma ale biisi wieŋa de la nyiŋ, m le basi ate m wieŋa ale bo fi nɔnni po la a chim bolim abe nuruma de a chim daata ate bu dɛ. 15Izirali yeri yaa.>> Naawen ale weeni. <<Mi ta ka tɛŋ kpieŋ kaai ale yaalima a cheena ayen ka ta chaab ale ni, tɛŋ kpak ale chichiiba tɛŋ, nuru baai biik ate ni zɛ, baai tɔga ate ni kan miŋ. 16Ba peemaŋa pakka a nye ase ka vɔrup ale lak doa. Ba meena ka tugurik tɔŋdɔ pagrisa. 17Ba le dɛ ni ŋancheentaŋa ale ni ŋandiintaŋa, a yik ni nidoabilisaŋa ale ni liema. Ba le yik ni piisaŋa ale ni niiŋa, a kaasi ni tiisa ale ni kinkaŋsaŋa. Ba le kaasi ni tɛŋ pagrisaŋa ate ni ta sebchakka la.

18<<Dan poom ka da ŋala po m kan kaasi ni chessi.>> Naawen ale weeni. 19<<Ate nuruma a dan bek ayen, <Ka boa ate Naawen ti Wenni a nye ti kude meena?> Ni weeni ba ayen, <Ase ni ale zɛri mi la ale puusi wen chaŋsa nidek tɛŋka po la, dila ni le tom a te nuru chaŋsa tɛŋ kaai ale kan daa nidek tɛŋ la po.>

20<<Mooli kude a te Jekob yenni abe fi biisi a te Juda ayen, 21<<Ni wom kude, nama betta ale a ka popola nuruma, baai ale ta nina ale kan nya la, baai ale ta tue ale kan wom la. 22Ni an magsi ni a chali mi?>> Naawen ale weeni. <<Ni an magsi ni nyiŋsa a gɔk mi niŋŋa? Mi nye tintain busuŋku ka bain a te nyakpiemu, taam wuu jakasim ate bu an baga a gaamu. Nya miisaŋa ale vilinti, alege kan nya pagrimoa, si le wuuri alege a kan gaamu. 23Alege nuruma de suiniimaŋa a lik a kan tagri. Ba cheem ka nakpiak a cheŋ. 24Ba kan weeni badek ayen, <Te ti a chali Naawen ti Wenni yɔgsum, waai ale a te fanɔi ŋmoruk ale teŋsim ŋmoruk la. Waai ale basi ate ti sebi cheka ale ŋarika daa a chak.> 25Ni nye kaasika ale kasi wieŋa de a basi, ni wabaataŋa ale kasi ni wamaŋsa nyeka.

26<<Nuru baata ale bo mi nuruma suŋsuŋ baai ale gu doa ase nuruba ale bari nuinsa la ale baai ale bari batta ayen ba yik nuruba la. 27Nna ase geruk ate nuinsa a sueri la, pimpaasima ale sueri ba yieŋa. Ba chim ka jigsirɔba ale pagra 28ale biigi a nyaksi. Ba biem nyeelaŋa a ka magsa. Ba kan sak nyemagsika ale baai ale kan ta koba la. Ba kan nya ŋanjaksa wensie a vari ba a basi. 29M kan namsi ba kude nyiŋŋa?>> Naawen ale weeni. <<M kan zaani m dek a tuni tɛŋka de choawa?

30<<Wa dii ale bie ale ta chakka ale nye tɛŋka de po. 31Biisiteerɔma a mooli ka venta. Kaabteerɔma a dɛ niŋ ale badek pagrim, ate mi nuruma a yaali ku nnawa. Alege ni le nye ka sɛ kpeglimka?

Currently Selected:

Jeremaya 5: BWU

Highlight

Compare

Copy