Jeremaya 50
50
1Wanni de ate Naawen a biisi a ta va biisiteerɔwa Jeremaya jigi a magsi chaab ale Babilon ale nuruma ale bo tɛŋka po la. 2<<Mooli abe fi biisi tɛŋsaŋa po, zagri tikti a mooli, kan peri wari ya, alege weeni ayen, <Ba le yik Babilon, ba le pai Bel a nyo chivie po, kpazinagsuk ale jo Marduk. Wa ŋanmɛɛntaŋa ale jo chivie po ate ka bɔgtaŋa kpaziita ale nak.> 3Tɛŋ ale nyini wiilukku geŋ a jam siti ka ate ka tɛŋka a duak koruk. Waai a kan bo ka po, nuruba ale duŋsa meena ale chali.
4<<Da ŋala po, Naawen ale weeni, Izirali nuruma ale Juda nuruma a gum chaab ale nyiem kum ninyaata a gisi Naawen ba Wenni. 5Ba le bek suik kuui ale a cheŋ Zayon a cheem ba nina a tuk ka nyiŋ. Ba le jam bobi badek a maŋ Naawen ale taam wuu nɔiyeŋ kaai ate ba kan baŋ la.
6<<Mi nuruma a chim ka pa ŋaai ale bei, ŋa naapeerisaŋa a ta ŋa a cheŋ a bɛ kama a basi ate ŋa bo guutaŋa zuk a nyiem. Ŋa a tuinti guuk ale piuŋ meena zuk ale baŋ ŋa dek vuusumu jigini wari. 7Waai meena ale a nya ŋa la a ko ŋa kama, ba dachaasaŋa a weeni ayen, <Ti an nye foolaa, diila ba nye kaasi Naawen kama, ba wensie dɛka jigini, Naawen, ba koma yiilaŋa.>
8<<Ni chali nyini Babilon po a nyini, ni basi Babilon demma tɛŋka, abe ni nye ase booŋa ale a de piisaŋa niŋ la. 9Diila m le choa tɛŋ kpieŋsa a gum chaab ate si nyini wiilukku geŋ tɛŋka ate si jam ta chaab ale Babilon. Ba le zaani ba zaana jigi a ta chaab ale ka, a nyini wiilukku geŋ ba le yik ka. Ba peemaŋa ale nye ase baai ale sebi kpaliŋ la a kan ŋmani ale ni koruta la. 10Dila ba le koalim Babilon, baai meena ale a koalim ka la ale chak.>> Naawen ale weeni.
11<<Ni le a naŋ alege ate ni sue peenti la nyiŋ, nama baai ale zu mi nitalimu kpaliŋ po la, ni le a chali a naŋ ase naasari ale a fɔbi ŋanbie la ale a siŋti ase wusum duata la nyiŋ, 12ni mawa ale nya chivie yegayega, wa waai ale biak ni la ale nya chivie. Wa le wa fiisa tɛŋsaŋa meena po, gɔi ale tɛŋ kosik, ale tɛŋ tuilik. 13Naawen suipuurumu nyiŋ waai a kan kali ka po alege ka le chim ka koruk. Baai meena ale va Babilon a taam la ale kisi ka abe ba a la, ka kɔnika meena nyiŋ.
14Ni zaani ni zaana a gilim Babilon, nama baai meena ale gbeeri tommu la. Ni tɔŋ ka. Ni kan tali peema, diila wa tom kaasi Naawen kama. 15Ni na kauk meena a ta chaab ale ka, ka siak a te, ka yewɔŋtaŋa a lo, ka parisaŋa a wɛ lo. Ase ku le toalim ka Naawen tutuna la, ni tuni ka, ni nye le ka ase ka ale nye tɛŋ yonsa diila. 16Ni gebi boridɔwa Babilon po a basi, ale ŋaridɔwa ale wa gɔtuku ŋarika po a basi. Namsidɔwa gebika nyiŋ basi ate waai meena a ŋmani wadek nuruba jigi, basi ate waai meena a chali cheŋ wadek tɛŋ.
17Izirali ka pa ŋaai ale waaŋ chaab ate gbeŋma a vi ate ŋa chali. Waai ale dɛ niŋ a kaasi ka la ale Assiria naawa. Waai ale kpeglim a ŋɔriŋ ka kobaŋa la ale Babilon naawa Nebukadnezzar.
18Dila nyiŋ Naawen Dii Ale A Dɛ Tugurik Tɔŋdɔma Niŋ La, Izirali Wenni ale weeni diila ale nna: <<M le namsi Babilon naawa ale wa tɛŋka ase m le namsi Assiria naawa diila. 19Alege m le ta Izirali a ŋman jam ka dek wuuku po, ate ka de Karmel ale Basan po. Ka le ko ka kɔrisa Ɛfraim ale Gilead guutaŋa zuk. 20Da ŋala po, dila po, Naawen ale weeni, <<Gisika ale boro a magsi Izirali foolaawa, alege waai a kan boro, gisika ale boro a magsi Juda wabaataŋa alege ba kan nya waai ya, diila m le vɔŋ a te baai ale tali ate m vari basi la.
21Siti Merataim tɛŋka ale baai ale bo Pekod la. Ni vi, a ko abe ni kaasi ba chessi.>> Naawen ale weeni. <<Nye dii meena ate m weeni ni la. 22Kpaliŋ nuemka ale bo tɛŋka po, kaasuŋ kpioŋ nuemka. 23Tɛŋzuk meena gunni ale wɛ ale mobi yisayisa dii. Babilon ale doa koruk tɛŋsaŋa po dii. 24Babilon, mi dueni ka baruk a magsi fu, ate ku yik fu alege ate fi seba, ba nya fu a yik fu dii nyiŋla fi jam ta ka chaab ale Naawen.
25<<Naawen a lak kpaliŋ ŋanta duenika jigini kama a ta wa suipuurum kpaliŋ kɔlimaŋa a nyini, diila Nyɔnɔwa Naawen Dii Ale A Dɛ Tugurik Tɔŋdɔma Niŋ La a ta ka tuima ayen wa tom Babilon demma tɛŋka po. 26Nyini niŋ a jam ta chaab ale wa. Wɛ a lak ka ŋanbie yenni, pai ka a vi chaab ase ŋanbie ale vi chaab la. Kaasi ka chessi a basi ate ka kan tali nuruma. 27Ko ka lali paalisaŋa meena, basi ate si cheŋ tɔgrika jigi. Ku le tua a te si. Si danni a jam kama, diipo ale magsi ayen ba namsi si la. 28Wom baai ale chali bɛ la ale baai ale nyini Babilon a yaali likka la a weeni a nyini Zayon Naawen ti Wenni a pai ka tutuna, tutuna a magsi wa yenni.
29<<Wi tɔŋdɔba ate ba ta chaab ale Babilon, baai meena ale gbeeri tommu la. Ni tigsi a gilim ka, ni kan te waai a bɛ. Ni ŋman tuni wa wa tuimaŋa nyiŋ, ni nye wa ase wa le nye diila. Diila ka nyini kama a zɛri Naawen, Izirali Waai Ale Welema La. 30Dila nyiŋ, ka nidoa paalukku ale lo suitaŋa niŋ, ka tugurik tɔŋdɔma meena ale nye diki dai dila danni.>> Naawen ale weeni.
31<<Nya, mi ta ka chaab ale fu, kanjanta nyɔnɔ.>> Nyɔnɔwa, Naawen Dii Ale A Dɛ Tugurik Tɔŋdɔma Niŋ La ale weeni. <<Diila fi danni a jam kama, diipo ale magsi ba namsi fu. 32Kanjanta nyɔnɔwa ale nak naŋ a lo ate waai a kan maari wa ate wa yiti, m le fuk bolim wa tɛŋsaŋa po ate bu dɛ waai meena ale gilim wa la.>>
33Naawen Dii Ale A Dɛ Tugurik Tɔŋdɔma Niŋ La ale weeni diila ale nna: <<Ba a namsi Izirali demma kama ale Juda demma mɛ. Ba yigrɔma meena a yik ba ka giŋgiŋ, a zɛri kan basi ate ba a cheŋ. 34Alege ba Da Tuesirɔwa a pagra kama, Naawen Dii Ale A Dɛ Tugurik Tɔŋdɔma Niŋ La ale wa yuenni. Wa le vari ba basi ale pagrim ate wa ta vuusum a jam ba tɛŋka po, alege daa vuusum a te baai ale bo Babilon la.
35<<Gebik ale ta chaab ale Babilon demma.>> Naawen ale weeni. <<A ta chaab ale baai ale bo Babilon la ale ka kpaŋŋa ale yam nuruma. 36Gebik ale ta chaab ale ka venta biisiteerɔma. Ba le chim betta. Gebik ale ta chaab ale ka tugurik tɔŋdɔma. Yɔgsum kpiem ale yik ba. 37Gebik ale ta chaab ale ka wusumaŋa ale torokoma ale nichamma meena ale bo ka po la. Ba le chim nipooba. Gebik ale ta chaab ale ka tuilum ŋantaŋa. Ba le koalim ba. 38Tɛŋ kosik ale doa ni nyaataŋa zuk. Ti le kpeeri. Diila ka ka bɔgta tɛŋ, bɔgluk tii ale ti yesim ale yɔgsum.
39<<Dila gɔi ŋanta ale piina ale ŋa bo dula, ate viita ale bo dula mɛ. Nuruba a kan bo ka po yaa ba kali ka po a nyini gaŋ a ga paari gaŋ kinka. 40Ase Naawen ale jam yuk yiak Sodom ale Gomora ale tɛŋ sii ale moata ka la.>> Naawen ale weeni. <<Dila waai a kan bo dula, nuru a kan kali dula.
41<<Nya, tugurik tɔŋdɔba ale nyini wiilukku geŋ a cheena, tɛŋ kpieŋ ale nalim boari ate Naawen choa ba ate ba nyini tɛŋka kpeglika jiga a cheena. 42Ba gomsi badek kama ale tima ale gbatta, ba nyeka toa kama a ka jiirimmoa. Ba a nuem ase ka nyakpiemu ale a wuuri la ase ba le do ba wusumaŋa. Ba a jam ase ka nuruba ale tigsi a magsi kpaliŋ ayen ba siti, Babilon demma.
43Babilon naawa a wom ba wie kama, ate wa nisa a kpi limalima. Nyiŋdomma ale yik wa, nyiŋdomma ase nipok puuk ale a dom la. 44Nna ase gbeŋli ale nyini Jodan tiuku po a nyini a cheŋ wuuk maŋ jigi la, m le vi Babilon demma ba tɛŋka po nna kadi. Ka wana ate ba lueri ate mi ale pai wanni a te? Ka wana ale a nye ase mi la be ka wana ale baga a nak nanpaga ale mi? Be ka naapeerik boa ale baga a zaani ale mi?>>
45Dila nyiŋ, wom Naawen ale zɔk dii a ta chaab ale Babilon la, dii ate wa poli a ta chaab ale Babilon demma tɛŋka la. Ba le ji pabisaŋa ta cheŋ, wa le kaasi ŋa wuuku chessi ba nyiŋ. 46Babilon yikka chioku ale basi ate tɛŋzuk de a choa, ka kumsaŋa ale kum chɔgsi tɛŋ kpieŋsaŋa po.
Currently Selected:
Jeremaya 50: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
