Jeremaya 49
49
1A magsi chaab ale Ammon demma: Naawen ale weeni diila ale nna: <<Izirali a ka nidoabilisa? Ka ka baai ale ba tuesi ka? Ka boa abe le soa ate Milkom a tuesi Gad? Ka boa ale soa ate ka nuruma a bo tɛŋsaŋa po? 2Naawen ale weeni, <<Alege daaŋa a cheena, ate m le kaari kpaliŋ kaarik a ta chaab ale Arabba ale bo Ammon po la, ka le chim guura a tigsi doa ate ka tɛŋ kpaŋ sii ale gilim la a ju bolim. Ate Izirali yaa yiak baai ale yiak ka la.>> Naawen ale weeni.
3<<Yesbon a wooli, diila Ai a kaasi kama! Baai ale bo Arabba a kaari! Ni jo boorisa gatta a kum. Ni a kpabi de ale de parisaŋa po, diila Milkom ba le yik ta cheŋ tɛŋ yoŋ ale ka kaabteerɔma ale kpaŋŋa meena. 4Ka boa ale soa ate ni a kuulim ni vaasaŋa nyiŋŋa, a kuulim ni vaasaŋa ale ta ŋanta nyiŋŋa, nama baai ale kan ta wensie la ni ta sebchakka ale ka ni jigsika ale a weeni ayen, <Ka wana ale wa siti tama?> 5M le ta kpazinagsuk a nyini baai meena ale gilim fu la jigi a jam fi zuk.>> Nyɔnɔwa, Naawen Dii Ale A Dɛ Tugurik Tɔŋdɔma Niŋ La ale weeni. <<Nama waai meena m le yiak a basi, ate waai a kan tigsi baai ale a yaali likka la.
6<<Alege ku ŋaaŋnyiŋ, m le basi ate Ammon demma a ŋman nya badek.>> Naawen ale weeni.
7A magsi chaab ale Edom: Naawen Dii Ale A Dɛ Tugurik Tɔŋdɔma Niŋ La ale weeni diila ale nna: <<Yam a ŋman ka Teman po? Sinsaga a bɛ kama yam nyama jigi ya? Ba yammu a kpi kama? 8Cheem a chali, suk pina vie ŋaai ale limisa po, nama baai ale bo Dedan, diila m le ta kaasuŋ a jam Iisɔ zuk diipo ate mi a namsi wa la. 9Baai ale a pisi yɔna la a dan jam fi jigi, ba kan tali yɔna maga? Zueba a dan jam yok, ba kan zu daa ba ale a yaali a soa diila. 10Alege m le yeeri Iisɔ abe m ge chaboala, m le lak wasusuga jiŋŋa, ate wa kan baga a lik wa dega. Wa bisaŋa ale wa suata ale baai ale moata wa ale kpi, ate wa kan ŋman boro. 11Basi fi kpiŋsaŋa, m le lik nyuvooŋa. Fi pukɔŋŋa mɛ a baga a ta sebchakka ale mi kama.>>
12Naawen ale weeni diila ale nna: <<Baai ale kan magsi ba nyu beerika la a dan nyu, boa ale soa ate fi kan nya namsika? Fi kan cheŋ ale kan nya namsika, ku a fɛ ate fi nyu. 13Mi a pɛ ka m dek nyiŋ Naawen ale weeni ayen, Bozra ale chim ka guura ale ja laam ale jaab ate ba peesi a dak ale kikaasa, ate ka tɛŋsaŋa meena ale doa guura taam wuu.>> Naawen ale weeni.
14Mi wom ka biik Naawen jigi: Nuruba ate wa tom tɛŋsaŋa jigi ayen, <<Ni tigsi nidek a siti ka! Ni vaari yiti a magsi kpaliŋ.>>
15<<Yɔgyɔgla de m le basi ate fi fiisa tɛŋsaŋa po, ate nuruba a zɛri fu ba suŋsuŋ. 16Kpazinagsuk kuui ate fi a choa ate fi suinummu kanjantaŋa a paasi fu, fi waai ale bo pinaŋa zuima, fi waai ale tuesi guuku zukparuk a boro la. Fi yɔk fi tukku ka ŋmai niŋniŋŋa ase jiiruk la, m le ta fu a nyini dula a siŋ.>> Naawen ale weeni.
17<<Kaasuŋ kuui ale cheena Edom zuk la ale bie ate waai meena ale a taam la ku le cha wa abe wa kpaziim a nak wa le kɔni la nyiŋ. 18Ase Sodom ale Gomora ale jam kaasi diila ale tɛŋ sii ale moata si la, dila waai a kan bo dula, waai a kan kali ka po.>> Naawen ale weeni.
19<<Ase gbeŋli ale nyini Jodan tiisa po a nyini a cheŋ tɛŋ kaai ale ta wuuk la, m le vi Edom a nyini ka dek tɛŋka po nna kadi. Ka wana ate ba dak ate mi ale lueri a magsi kude? Ka wana ale a nye ase mi la ale baga a nak nanpaga ale mi? Naapeerik boa abe le baga a zaani ale mi?>> 20Dila nyiŋ, wom Naawen ale zɔk dii a ta chaab ale Edom la, wa le poli dii a ta chaab ale baai ale bo Teman: Ba le dari piisaŋa bisaŋa a ta cheŋ, wa le kaasi ŋa wuuku chessi ba nyiŋ. 21Ba loka kumsaŋa ale basi ate tɛŋka a choa, ba kaarika ale kum chɔgsi paari Yam Suf. 22Nya! Jiiruk ale yiti a jueli a fuuri a siŋ, a lak ku kinkaŋŋa Bozra zuk. Dai dila danni Edom tugurik tɔŋdɔma suiniima ale nye ase ka nipok ale a dom lɔgi la.
23A magsi chaab ale Damasikus: <<Ku cha Yamat ale Arpad kama, diila ba wom ka wapaali baata. Ba sue le kaasi, ale a daani ase nyakpiem ale a choa la. 24Damasikus a yaa chim ka jawobsik, wa cheem kama ayen wa chali ate wa nyiŋ a gɔk, ate suidomsik ale nyiŋdomma a yik wa, domka ase nipok ale a dom lɔgi la. 25Ka boa ale soa ate tɛŋ kaai yuei ale yiti la ba an zɛri ka, tɛŋ kaai ate mi mariŋ la? 26Wensie, ka nidoa paalukku ale lo suitaŋa niŋ, ka tugurik tɔŋdɔma meena ale nye diki dai dila danni.>> Naawen ale weeni.
27<<M le ju Damasikus parisaŋa bolim, bu le dɛ Ben Yadad jigi pagrisaŋa.>>
28A magsi chaab ale Kedar ale Yazor naataŋa ate Babilon naawa Nebukadnezzar a siti la: Naawen ale weeni diila ale nna: <<Vaari a yiti a siti Kedar abe ni kaasi kori geŋka nuruma. 29Ba le pai ba viitaŋa ale ba piisaŋa a ta cheŋ, ba kusuŋtaŋa ba le ji ta cheŋ ale ba ŋantaŋa ale ba laalaakomima. Nuruba ale kaari a weeni ba ayen, <Kpazinagsuk jigi meena!>
30<<Chali mwuli a cheŋ! Nama baai ale bo Yazor la ni wari pina vie ŋaai ale limisa po. Naawen ale weeni. Babilon naawa Nebukadnezzar a zɔk kama a ta chaab ale ni, wa ŋman tagri ka zɔga a ta chaab ale ni.
31<<Vaari yiti a siti tɛŋ nna chaalima, kaai ale boro ale sebchakka la.>> Naawen ale weeni. <<Tɛŋ kaai ale kan ta nansuiŋta yaase taperisa, ka nuruma a boro ka badek ba nyiini. 32Ba le koalim ba laalaakomima ale ba niiŋa yega ase kuuruk la. M le kati baai ale bo niŋ la a waaŋ a te vaataŋa abe m ta kaasuŋ a nyini jigi meena a jam ba zuk.>> Naawen ale weeni. 33<<Yazor ale chim ka suemkpatta jamka jigi, jigi koruk kasim a cheŋ. Waai a kan bo dula, nuru a kan kali dula.>>
34Wanni ale nna a nyini Naawen jigi a jam biisiteerɔwa Jeremaya jigi a magsi chaab ale Iilam, Juda naawa Zedekia naamu liŋ dɛka vaaŋa po.
35Naawen Dii Ale A Dɛ Tugurik Tɔŋdɔma Niŋ La ale weeni diila ale nna: <<Nya, m le wɛ Iilam tommu, ba pagrimu nummu jigini. 36M le ta vaata tinaansiwa a jam ta chaab ale Iilam, a nyini wenŋmazuimaŋa kabta bunaansiwa, m le kati ba waaŋ a te vaata tinaansiwa, ate tɛŋ a kan ŋman boro juijui ate Iilam demma ba yik la a kan cheŋ. 37M le kaasi Iilam ba dachaasaŋa niŋ, baai ale a gisi ba nyuvooŋa la niŋ. M le ta kaasuŋ a jam ba zuk, poom daa m suipuurum pagrika.>> Naawen ale weeni. <<M le vi ba ale gebik ate m ga ko ba meena. 38M le zaani m naam zukpaglika Iilam abe m kaasi ka naawa ale wa niŋdeerɔma.>> Naawen ale weeni.
39<<Alege daa a cheena m le basi ate Iilam a ŋman nya badek.>> Naawen ale weeni.
Currently Selected:
Jeremaya 49: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
