Jeremaya 51

1Naawen ale weeni diila ale nna: <<Nya, m le choa kaasirɔ chiik ate wa ta chaab ale Babilon ale Leb Kamai nuruma. 2M le tom nicham Babilon ate ba yali ka abe ba kaasi ka, ba le ta chaab ale ka kauk meena ka kaasuŋku danni. 3Kan basi ate tɔŋdɔwa a chamsi wa tommu, yaase wa jo wa kpaliŋ kɔlimaŋa. Kan basi wa nidoa paalukku kaasi ka tugurik tɔŋdɔma chessi. 4Ba le ko ba dueni Babilon, ba le kɔni biokbiokwa suitaŋa po. 5Diila Wen dii ale ka Naawen Dii Ale A Dɛ Tugurik Tɔŋdɔma Niŋ La an zɛri Izirali ale Juda, ba tɛŋka ale sueri ale ba foolaawa la waai ale welema a bo Izirali niŋ la.

6<<Chali nyini Babilon! Ni chali ni nyuvooŋa nyiŋ! Ni kan te ba kaasi ni nyuvooŋa ka wabaataŋa nyiŋŋa. Ku paari ka diipo ale magsi Naawen tutunaŋa la, wa le tuni ka ka le magsi diila. 7Babilon jam ka ligmɔniŋ beerik Naawen nisa po, ka basi kama ate tɛŋzuk de meena a nyu buk. Tɛŋ kpieŋsaŋa a nyu ka ka daamu, dila nyiŋ ba yaa a yesim kama. 8Babilon ale deri lo a wɛ. Ni kum ka nyiŋ. Ni yaali kpaam a magsi ka domka, dai dii dai ka le nya tebika.

9<< <Ti ti le tebi Babilon, alege ka an baga a nya tebika, ni te ti basi ka ate waai meena a cheŋ wadek tɛŋ, diila ka buusaŋa a paari ka wenzukku, ŋa jueli ase ka chiŋmaaŋa la.>

10<< <Naawen a bo wensie a te ti kama, ni jam, ni te ti weeni Zayon po dii ate Naawen ti Wenni a nye la.>

11<<Ni saasi peemaŋa, ni pai ŋanchɔgsintaŋa. Naawen a choa Miidi nalimaŋa kama dii nyiŋla wa popolaŋa ale wa kaasi Babilon. Naawen ale tuni, tutuna wa yenni nyiŋ. 12Zak tikti a ta chaab ale Babilon parisaŋa. Ni ŋman te limisidɔma pagrim, ni te limisidɔma a zaani, ni gomsi magsi guduaka. Naawen ale nye wa le a poli diila, wa wanni a magsi chaab ale Babilon demma. 13Nama baai ale bo nya boari nɔi la ale jigsi ale tuilum ŋanta la, ni kpeglimka a jam ya, diipo ale magsi ni gebi basika la. 14Naawen Dii Ale A Dɛ Tugurik Tɔŋdɔma Niŋ La a pɛ kama wadek nyiŋ: M sum sueri fu ale nuruba, ase tintue boari la, ate ba le kaari nak dɛka kaarik fi zuk.

15<<Wa nye tɛŋka kama ale wa pagrim, wa nya tɛŋka kama ale wa yammu ale dari wenŋmazuimaŋa ale wa miŋka. 16Wa dan na nanpaniŋ, nyaataŋa ale bo wenŋmazuimaŋa la a wuuri kama, wa basi ate chiŋma a yiti tɛŋka kpeglimka jiga. Wa a tom nyaksika ale ŋmoruk ale ta vioku a nyini wa ŋanta yeeŋa po.

17<<Nuru meena a ka yammoa ale ka sebika, chivie ale ta chɔkudɔ meena ale wa bɔgtaŋa, wa ŋanmɛɛntaŋa ka pimpaasima, ti ka vuusum ti po. 18Ti ka kiri ya, ti ka ŋan laanta. Ti buusaŋa a dan jam ti le kaasi. 19Wa waai ale chim Jekob Charuk la daa ŋantaŋa de, diila wa le ŋanta meena Nyeerɔ a maa gum wa nitalimu buuni du. Naawen Dii Ale A Dɛ Tugurik Tɔŋdɔma Niŋ La ale wa yuenni.

20<<Fi ka mi kpaliŋ doari, mi tugurik kɔlinni, fi nyiŋ ate m wɛ tɛŋ kpieŋsa, fi nyiŋ ate mi a kaasi naata, 21fi nyiŋ ate mi a ŋɔriŋ wusum ale bu duerɔ, fi nyiŋ ate mi a wɛ toroko ale ku damdɔ, 22fi nyiŋ ate mi a kaasi nidoa ale nipok, fi nyiŋ ate mi a kaasi nuru kpak ale paalik, fi nyiŋ ate mi a kaasi nidoa paalik ale dɔklie, 23fi nyiŋ ate mi a kaasi naapeerik ale piisa, fi nyiŋ ate mi a kaasi kpaarɔ ale lalisa siyewa, fi nyiŋ ate mi a kaasi tɛŋsa kpaga ale nisɔm.

24<<Ni nimbie po m le ŋman tuni Babilon ale baai meena ale bo Babilon tɛŋka po la a magsi kaasuŋ kuui ate ba nye Zayon po la.>> Naawen ale weeni.

25<<Mi ta ka chaab ale fu, kaasuŋ guuwa, fi waai ale kaasi tɛŋka meena.>> Naawen ale weeni. <<M le teeri m nisaŋa a ta chaab ale fu, a bilim fu pinaŋa zuk a basi ate fi chim guuk kuui ale ju. 26Ba kan pai tain fi zuk a magsi gugoruk tintain ya yaase tain bola a magsi nyubi ya, diila fi le doa ka koruk taam wuu.>> Naawen ale weeni.

27<<Zak tikti tɛŋka po. Peeri damuniŋka tɛŋ kpieŋsaŋa po. Gomsi tɛŋ kpieŋsaŋa a magsi kpaliŋ ale ka, wi naataŋa de ate ti ta chaab ale ka: Ararat ale Minni ale Askenaz. Lueri kpagi ate wa ta chaab ale ka, tom wusuma ase tintue boari la. 28Gomsi tɛŋ kpieŋsaŋa a magsi kpaliŋ ale ka, Miidi nalimaŋa ale ba kpaŋŋa ale nisɔmma ale tɛŋ sii meena ate ba a nya si zuk la. 29Tɛŋka a choa kama ale ŋmeriŋ, diila Naawen ale zɔk ta chaab ale Babilon la a za kama ayen wa basi ate Babilon a duak kinla ate waai a kan bo ka po.

30Babilon tugurik tɔŋdɔma a basi kpaliŋ kama, ba wari bo ka jigi pagrisaŋa po. Ba pagrimu a nueri ya, ba yaa a nye ase ka nipooba la. Ba boka jigini a ju ka bolim, ba nansuiŋtaŋa larisaŋa a wɛ. 31Waai ate ba tom a vi m wa ate tomtomdɔ a vi m wa ayen ba mooli a te Babilon naawa ayen wa tɛŋ nummu meena ba yik kama, 32benni chali taamka a gebi, ate tɛŋ yɔgsuku a ju bolim ate tugurik tɔŋdɔma a nye yɛ.>>

33Naawen Dii Ale A Dɛ Tugurik Tɔŋdɔma Niŋ La, Izirali Wenni ale weeni diila ale nna: <<Babilon liewa a nye ase ŋanta fɔbika jigi la diipo ate ba a tabi la, diipo ate ba le che wa la ale jam mwuli.>>

34<<Babilon naawa Nebukadnezzar a ko ti kama, wa pai ti a basi butimka po, wa basi ate ti chim ka samɔn koruk. Ase waab la wa nɛ ti kama a sueri wa ponni ale ti ŋan maŋsaŋa, a yaa chiiri ti a basi. 35Vakvak kaai ale nye ti nyiŋ lammu la abe bo Babilon zuk.>> Baai ale bo Zayon la ale weeni. <<Ti ziimu a bo baai ale bo Babilon la zuk.>> Jerusalem demma ale weeni.

36Dila nyiŋ, Naawen ale weeni diila ale nna: <<Nya, m le zaani fi ŋaaŋ a kpaliŋ te fu, m le basi ate ka nyakpiemu a kpeeri abe m basi ate ka bulisaŋa a kpeeri. 37Babilon ale chim ka guura a vi chaab a doa, suemkpatta boka jigi, kaai ate ba kisa ale jalaam, juijui ate nuru a kan boro. 38Ka nuruma meena a ŋuuni ase ka gbeŋ paala la, ŋa a kum ase gbeŋ bisa la. 39Alege ba nyiŋsaŋa ale a zeenti diema la, m le gomsi tigi a te ba a basi ate ba nyu buk, ate ba kaari ale laata a yaa goa ba kan ŋman yiti diipo.>> Naawen ale weeni.

40<<M le ta ba a siŋ tɛŋ ase pabisa ale a cheŋ tɔgrika jigi la, ase padaasa ale bua la.

41<<Ba le ba yik Sesak dii, tɛŋka zuk meena kunkuulimaŋa ale basi. Ku le ku bie dii ate Babilon a bo tɛŋsaŋa po. 42Nyakpiemu ale yiti jueli Babilon zuk, bu wuurika nyamiisaŋa ale lik ka. 43Ka tɛŋ ninaŋa ale doa koruta, tɛŋ kosik ale gɔi, tɛŋ kaai ate waai a karo, ate waai a kan nyiem va ka po a taamu. 44M le namsi Bel ale bo Babilon po la a basi ate ka chiiri jabuui ate ka nɛ la. Tɛŋ kpieŋsaŋa a kan ŋman cheŋ ka jigi ya. Ate Babilon parika a lo.

45<<Mi nuruma, ni nyini ka po a nyini. Ni chali a nyini vum nyiŋ. Ni chali nyini Naawen suipuurum kpiemu po nyini. 46Kan jɔk nyiŋbiiri be kan chali yɔgsum ase ni a nin wom wie tɛŋka po, wari a jam benni de m di a jam bali benni, wɔkwɔk wie tɛŋka po ate kpagi dindi a ta chaab ale kpagi dindi. 47Ku daaŋa a sum cheen kama ate m le namsi Babilon bɔgtaŋa. Ka tɛŋka meena ale nya chivie ate ka nuru baai ate ba ko la ale doa ka jigi meena tɛŋka po. 48Ate wenŋmazuk ale tɛŋzuk ale ŋan baai meena ale bo ba po la ale kaari ale suipeentik Babilon nyiŋ, diila a nyini wiilukku geŋ kaasirɔba ale siti ka.>> Naawen ale weeni.

49<<Ku a fɛ ate Babilon a lo Izirali ko ka nyiŋ, ase dii dek ate ba ko baai ale bo tɛŋka zuk meena Babilon nyiŋla. 50Nama baai ale chali bɛ gebika la, ni cheŋ ni kan a gilim. Ni teeri Naawen niŋniŋ tɛŋka po, abe ni poli Jerusalem wari.

51<<Chivie ale yik ti, diila ba lɛ ti kama ate chivie a lik ti nimbidaasaŋa, dii nyiŋla nicham ale jo Naawen yenni jigi weleŋsaŋa.>>

52<<Alege daa cheena ate m le namsi ka bɔgtaŋa tɛŋka meena, ate baai ale koani la ale ŋusi.>> Naawen ale weeni. 53<<Babilon a dan poom jueli paari wenzukku ale basi ate ba zula boka jigini a pagra m le tom kaasirɔba ate ba ta chaab ale ka.>> Naawen ale weeni.

54<<Kaarik nuemka ale nyini Babilon a jam, kaasuŋ kpioŋ nuemka ale nyini Kaldiya demma tɛŋka a jam. 55Naawen ale kaasi Babilon, wa le te ti ka basi butimka nuemka abe ka nye diki. Dachaasa ale wuuri jam ase nya kpienta miisa la, ti luetaŋa wuurika ale kasim a kum. 56Kaasirɔ ale jam ta chaab ale Babilon, ba le yik ka tugurik tɔŋdɔma, ate ba timaŋa a wɛ. Diila Naawen ka Naawen dii ale a tuni, wa ŋman tuni meena. 57M le basi ate ka nisɔmma ale yam nyama a buk daam, ka kpaŋŋa ale niŋdeerɔma ale tugurik tɔŋdɔma mɛ, ba le goa taam wuu ba kan yiti.>> Naawa ale weeni waai yuei ale Naawen Dii Ale A Dɛ Tugurik Tɔŋdɔma Niŋ La.

58Naawen Dii Ale A Dɛ Tugurik Tɔŋdɔma Niŋ La ale weeni diila ale nna: <<Babilon parik kibini ale duak tɛŋ jassi ate nansuiŋ wɔŋtaŋa a ju bolim, ate nuruma a buk kuligi kinla nyiŋ, tɛŋ kpieŋsaŋa ninammu ale chim ka kpaam a te bolim ŋaasa.>>

59Wanni ale nna ate Jeremaya a pai te Neria nidoabinni Seraiya ale ka kpagi ate wa kokpieŋ a nye Maseiya la wa le jam cheŋ Babilon ale Juda naawa Zedekia wa naamu bena ŋanaansiwa po la. 60Jeremaya a jam ŋmarisi a nyo ka gbaŋ po kaasuŋ kuui meena ale jam cheen Babilon zuk la, dii meena ale ŋmarisi a magsi chaab ale Babilon. 61Wa weeni Seraiya ayen, <<Fi dan cheŋ Babilon, nya ayen fi kariŋ wieŋa de meena ate ku jueli. 62Yaa weeni ayen, <Naawen yaa, fi jam weeni ayen fi le kaasi dela, ate nuru yaase duŋ a kan boro, ka le chim koruk taam wuu.>>

63<<Fi dan kariŋ gbaŋka de a nueri, bobi tain a maŋ ka a yuk basi Yufiretis benni po. 64Yaa weeni ayen, <Dila ate Babilon ale siŋ a kan ŋman jueli diipo diipo kaasuŋku ate m le ta jam ka zuk la nyiŋ. Ate ka nuruma a lo.> >> Jeremaya wieŋa a nueri ka dela.

Currently Selected:

Jeremaya 51: BWU

Highlight

Copy

Compare