Jeremaya 4
4
1<<Izirali demma, ni daa ŋmani, ni be ŋmani mi jigi.>> Naawen ale weeni. <<Ni dan yeeri ni bɔgluk tii ate mi kisa la mi nina po ale an ŋman cheŋ bɛ ya, 2ale pɛ ale wensie ale nyemagsika ale wayɔrisima suiku po, <Naawen ale sum vua la,> tɛŋ kpieŋsaŋa yaa le nya niaka wa nyiŋ abe wa nyiŋ ba nya zula.>>
3Dii ate Naawen a biisi a te Juda nuruma ale Jerusalem nuruma la ale nna: <<Ni guti ni tɛŋ kaai ale kan kpa nya la abe ni kan bori munsa po. 4Ni ta nɔiyeŋ ale mi, Naawen abe ni pai nidek a te mi, nama Juda nuruma ale Jerusalem nuruma, dan kan daa di m suinni ale na pusi a dɛ ni ase bolim la biem buui ate ni tom la nyiŋ. Bu le dɛ ate waai a kan boro a kpimsi bu.
5<<Mooli Juda ale Jerusalem a weeni ayen, <Peeri damuniŋka tɛŋka po meena.> Kaari ate ku jueli a weeni ayen, <Tigsi a gum chaab. Ni basi ate ti chali a cheŋ tɛŋ pagrisaŋa po.> 6Sak suik kuui ale a cheŋ Zayon la. Ni chali vari nidek basi ni kan beni. Diila m ta ka kaasuŋ a nyini wiilukku a cheena, poom ka kaasuŋ kuui ale bie.>>
7Gbeŋli ale nyini di sukka jigi a nyini, tɛŋ kpieŋsa kaasirɔ a nyini ya. Wa basi wa jigini ayen wa te ti ni tɛŋka a duak koruk. Ni tɛŋ ninaŋa ale duak guura ate waai a kan boro. 8Dila ni jo boorisa gatta, ni kum abe ni a wooli, diila Naawen suipuurumu an basi ti.
9Naawen a weeni ayen, <<Dai dila danni, naawa ale kpaŋŋa ale jɔk nyiŋbiiri, ku le cha kaabteerɔma ate biisiteerɔma a nye nna yɛ.>>
10Mi yaa weeni ayen, <<M Nyɔnɔ Naawen yaa, nya fi le paasi nuruma de ale Jerusalem nna meena ayen, <Ni le ta suiyɔgni,> alege gebika a tiik tama tutɔgta.>>
11Dila po nuruma de ale Jerusalem ba le weeni ba ayen, <<Va tuiluk ale nyini guutaŋa zuima gɔnni po a fuk tuak mi nuruma jigi, alege daa ku yali ba yaa ku sugri ba, 12ka va pagrik diila ku nyini ka mi jigi. Yɔgyɔgla de mi mooli mi buusaŋa kama a ta chaab ale ba.>>
13Nya! Wa a duŋ ka niŋ ase chiŋma la, wa torokoma a cheena ase ka va kiliŋ la, wa wusumaŋa a kpabi a gaam jiirita. Niniga a bo tama zuk. Tama ŋɔriŋ ya. 14Jerusalem, sugri biemu fi suinummu po a vari fidek. Fi le ta biem fi popolaŋa po a beni soa ka sɛ? 15Lueluk ale mooli a nyini Dan, a mooli kaasuŋ a nyini Ɛfraim guutaŋa.
16<<Weeni kude a te tɛŋ kpieŋsaŋa, mooli a te Jerusalem. <Tugurik tɔŋdɔ baai ale a gilim la ale nyini niŋniŋ tɛŋ a cheena, a kaari kpaliŋ kaarik a ta chaab ale Juda tɛŋ ninaŋa. 17Ba gilim ka ase ka nidoaba ale a limisi laŋ diila, dii nyiŋla ka zɛri ka mi nɔi.> >> Naawen ale weeni.
18<<Fidek nyeelaŋa ale ta kude a jam fi zuk. Fi namsika ale nna. Ku le tua nna katikati dii! Ku le a ju suinum dii!>>
19Aao, m zudomisuku m zudomisuku. Mi a viriŋ ale ka domka. Aao, m suinum ale a dom. M suinum ale a nak. Mi an baga a nye diki. Diila mi wom damuniŋka peerika kama. Mi wom kpaliŋ kaarika kama. 20Kaasuŋ ale a vi kaasuŋ, tɛŋka meena a doa ale ka guura. Mi viita a deri kaasi ka nna kadi, mi kusuŋku nna mwuli. 21Mi ale nya kpaliŋka magsa a beni ka sɛ abe m wom damuniŋka kumsa?
22<<Mi nuruma ka betta, ba zɛ mi. Ba ka bi sii ale ta popola, ba ka miŋka. Ba kperi kama ale biem nyeka, ba zɛ wamaŋ nyeka.>>
23Mi jam nya tɛŋka, ate ka ka magsa ale chim tɛŋ koruk, ate wenŋmazuimaŋa ale ba bolimu a cheŋ. 24Mi jam nya guutaŋa, ate ti a choa, pinaŋa meena a yuk. 25Mi jam nya, ate nuruba a ka, nuim meena ale bo wenzuk la a jam yiti cheŋ. 26Mi jam nya, ate tɛŋ kaai ale ka tɛŋ maŋ la a chim tɛŋ kaasuŋ, ate ka tɛŋ ninaŋa meena a doa guura, Naawen niŋ, wa suipuurumu yega wa niŋ.
27Naawen ale weeni diila ale nna. <<Tɛŋka meena ale duak guura, alege m kan kaasi ka chessi. 28Dila nyiŋ tɛŋzuk ale kum ate wenŋmazuimaŋa a chim legi, dii nyiŋla mi biisi kama m kan basi, m nye m popola kama ate m kan ŋmani ŋaaŋ ŋa.>>
29Wusum duerɔma ale tɔŋdɔma a dan nuem tɛŋ meena ale chali. Ba gela ale jo tiisa po, ba gela ale jueli pina zuk. Tɛŋsaŋa meena ba zɛri si, waai a ka si po.
30Fi a nye ka sɛ, fi waai ale kaasi la? Ka boa ate fi jo ja mɔnuŋŋoa ale su ligmɔniŋ ŋanta? Ka boa ate fi dueni chelimmoa? Fi a gobi fidek ka kinla. Fi nɔŋtaŋa a zɛri fu kama, ba a gisi ka fi nyuvunni.
31Mi wom ka kaarik ase nipok ale a dom lɔgi la, ŋusika ase waai ale piilim a biak wa biik la, Zayon Liewa kaarik, a vuusi a jɔk, ale teeri wa nisa a weeni ayen, <<M beya, mi a cha kama, nuru koorisa ale cheena ayen ba ko mu.>>
Currently Selected:
Jeremaya 4: BWU
Highlight
Share
Compare
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
