Jeremaya 3

1<<Ase nuru a dan zɛri wa pok ate wa basi wa ale yali nidoa yoŋ, wa le ŋman tuesi nipowa? Dila a kan taŋ tɛŋka? Alege fi jam ta ka nɔŋta nna yegayega. Fi le ŋmani mi jigi ya?>> Ka Naawen ale weeni.

2<<Zak a nya guuta zuima. Jigi a boro ate fi an nye ase taabuk ale nye fu la? Fi jam kali suiku niŋ a limisi nɔŋta, ase Arab denɔ ale gu doa a limisi nuruba gɔnni po la. Fi taŋ tɛŋka kama ale fi taabugni ale fi gaasaŋa. 3Dila ale soa ate ŋmottaŋa a kan ni, ate tɛŋ sim ŋmorukku an jam ya. Fi a nye ase taabuk la, fi ka chivie. 4Fi an wi mi ayen, <M Ko, m doa a nyini m bimbain po, 5fi sui ale kasim a puuri? Fi suipuurumu ale kasim boro dila taam wuu?> Fi ale a biisi diila ale nna, alege a nye biem buui meena ate fi baga la.>>

6Naab Josia naamu dɛka vaaŋa po, Naawen yaa weeni mi ayen, <<Fi nya Izirali ale kan ta siaka a nye diila? Wa jueli ka guuk meena zuk ale tiib buui meena ale teeri naŋsa la tɛŋ a nye kaboŋ dula jigini. 7Mi poli kama ayen wa le nye nnawa la meena ŋaaŋnyiŋ wa le ŋmani mi jigi alege wa an ŋmani ya, ale wa suok kuui ale kan ta wensie la Juda nya kama. 8Mi jam te Izirali le kan siaka la wa basika gbaŋka a basi ate wa cheŋ wa kaboŋsaŋa meena nyiŋ. Alege mi nya wa suoku Juda ate wa ka wensie la a kan chali yɔgsum, wa mɛ nyini a ga nye kaboŋ. 9Dii nyiŋla Izirali daŋta wieŋa daa wari a te wa, wa yaa jam taŋ tɛŋka ale nye kaboŋ ale tintain ale diok. 10Ale dila meena wa suoku Juda ate wa ka wensie an ŋmani mi jigi ale wa suinum meena, alege ka pimpaasima nyiini.>> Ka Naawen ale weeni.

11Naawen a weeni mi ayen, <<Izirali ale kan ta siaka la a chim wayɔrisima nyɔnɔ a gaam Juda ale kan ta wensie la kama. 12Cheŋ ga mooli wanni de a te wiiluk geŋ demma ayen, <Ŋmani, Izirali waai ale kan ta siaka la.> Ka Naawen ale weeni. <M kan ŋman kaasi nina ale fu, diila mi ta ka jiirim,> Naawen ale weeni. <M sui kan ŋman puuri diipo diipo. 13Tin siak fi foolaawa. Fi zɛri kama ale ta chaab ale Naawen fi Wenni, fi yarinti fi ŋmantiisaŋa a te ka bɔgluk chaŋsa tiib sii meena ale teeri la tɛŋ ale an zuli mi.> >> Naawen ale weeni.

14<<Ni ŋmani, nama nuru baai ale kan ta siaka la.>> Naawen ale weeni. <<Diila mi ka ni chorɔ. M le lueri ni, wanyi a nyini tɛŋ num wanyi mɛ a nyini yezuk a yaa ta ni jam Zayon. 15Ate m yaa te ni naapeerik sii ale doa m suinum po, baai ale ba de ni niŋ ale sebika ale miŋka. 16Da ŋala po ni nɔi ale ka diila ni le piisi yega a gum du tɛŋka po.>> Naawen ale weeni. <<Nuruba a kan ŋman weeni ayen, <Naawen nɔiyeŋ dakanni.> Ku kan maa jo ba popola po yaase ba teeri, ku kan bɛ, yaase ba nye di choa. 17Dila po ba le wi Jerusalem ayen, Naawen Naam Zukpaglika ate tɛŋ kpieŋsa meena ale tigsi Jerusalem ayen ba zuli Naawen yuenni. 18Da ŋala po Juda yenni ale gum Izirali yenni po, ate ba gum chaab a nyini wiiluk geŋ tɛŋka a jam tɛŋ kaai ate mi pai te ni kokpieŋsaŋa ase nitalim la.

19<<Mi dek ale weeni ayen, <Mi ale nye ni ale suipeentik ase m nidoabilisa la abe m te ni tɛŋ kaai ate ni a yaali la, nitalim naliŋ kaai ate tɛŋ meena a soa la.> Mi poli ayen ni ale wi mi ayen ka <Ko> abe ni kan cheem basi mi vaka. 20Alege ase nipok ale kan ta wensie ale wa chorɔ la, dila dek ate ni ka wensie mɛ, Izirali yeri ya.>> Naawen ale weeni.

21Kaarik ate ba wom guutaŋa zuk, Izirali nuruma kumsa ale saalimka, dii nyiŋla ba kaasi ba suitaŋa kama ale baŋ Naawen ba Wenni.

22Naawen weeni ayen, <<Nuru baai ale kan ta siaka la ni ŋman. M le tebi ni pilim ŋmanika.>> Izirali nuruma tulisi wa ayen, <<Mm, ti le jam fi jigi, diila fi ale Naawen ti Wenni. 23Wensie, bɔgta butimka pinaŋa ale guutaŋa zuima ka pimpaasima. Wensie Izirali varibasika a bo ka Naawen ti Wenni jigi. 24A nyini ti bimbain po chivie bɔgta ale kaasi tama koma ninam ŋanta, ba piisa ale ba niiga ale ba nidoabilisa ale ba lieba. 25Basi ate ti duak tɛŋ ale ti chivieŋa, abe ti basi ate ti kanpiintaŋa a lik ti. Ti tom kaasi Naawen ti Wenni kama, tama ale ti koma meena. A nyini bimbain po a jam paari jinla ti an zuli Naawen ti Wenni.>>

Currently Selected:

Jeremaya 3: BWU

Highlight

Compare

Copy