Jeremaya 2
2
1Naawen wanni a jam mi jigi ayen, 2<<Cheŋ a ga mooli ate Jerusalem demma a wom. <Mi a teeri ni bi paalukku pa teka kama, nama le jam yaali mi dii ase nipok fiak la ale va mi vuri gɔnni po, a va tɛŋ kaai ale kan bori po. 3Izirali jam ta tuilum kama a te Naawen, baai ale chim wa cheka niŋ yɔna. Baai meena ale kaasi ba la a nye ka foola ate kaasuŋ a laari pai ba.> >> Naawen ale weeni.
4Wom Naawen wanni, Jekob yeri demma, nama Izirali yezuimaŋa meena.
5Naawen ale weeni diila ale nna: <<Ka boan kaasuŋ ate ni koma a nya mi jigi ya, ate ba cheŋ bɛ a yalima ale mi? Ba va bɔgluk kayaata a yaa chim ŋan kayaata badek. 6Ba an bek ayen, <Naawen a bo ka bɛ, waai ale ta tama a nyini Ejipiti a jam la ale ta tama a va gɔi koroku po la, a va tɛŋ kosik ale vaasa po, tɛŋ kaai ale koi ale nye legi, tɛŋ kaai ate nuru an nyiem ka po ate nuru an bo ka po?> 7Mi ta ni jam ka tɛŋ kaai ale poak la po ayen ni dɛ ka yɔnaŋa ale ka ŋandiin maŋsaŋa ate ka ta la. Alege ni jam taŋ mi tɛŋka ale nye ate mi nitalimu a chim kisuk ŋanta. 8Kaabteerɔma an begi ayen, <Naawen a bo ka bɛ?> Baai ale a nye ale wanni la a zɛ mi. Niŋdeerɔma a zɛri ka mi nɔi. Biisiteerɔma a va ka Baal a mooli, ba va ka bɔgluk kayaata.
9<<Dila m ta ka ŋmiŋmaasa a jam ta chaab ale fu ŋmana.>> Naawen ale weeni. <<Abe m ta ŋmiŋmaasa a jam ta chaab ale fi bisaŋa bisa. 10Gaam taam Kittim nyiamu geŋsa a nya, te tomtomiŋ Kedar a kpesi nya paari. Nya ase wari a boro ase nnala la. 11Tɛŋ kpieŋ a diem tagri ka wenaŋa? Alege ŋa daa wena bola. Alege mi nuruma a pai ba zulaŋa a tagri bɔgluk kayaata. 12Te kude choa fu, wenŋmazuk wa, abe fi a choa ale kpazinagsuk,>> Naawen ale weeni.
13<<Mi nuruma a nye ka wabaata tiye: Ba zɛri mi, nyuvuri nyiam bulika, ale tu badek vila. Vili ŋaai ale wɛ a kan yik nyiam a tara. 14Izirali ka tomteerɔ, ka yɔma ate ba biagi? Be ka boa ate wa chim jakoalimoa? 15Gbeŋma a ŋuuni a na, ŋa a ŋuuni wa. Ŋa basi ate wa tɛŋka a doa kinla, a ju wa tɛŋsaŋa ale zɛri si. 16Memfis ale Tayapanes nidoama mɛ a chiiri fi zukku zuisaŋa. 17Ni an ta kude a jam daa nidek zuwa ni ale zɛri Naawen ni Wenni wa le dɛ ni niŋ suiku po la? 18Yɔgyɔgla de ka boa ale soa ate ni a cheŋ Ejipiti a nyu nyiam a nyini Siyor Benni? Ate boan soa ate ni a cheŋ Assiria a nyu nyiam a nyini Benni po? 19Ni gaasaŋa ale namsi ni, ni pilim ŋmanika ale toariŋ ni. Ni poli abe ni miŋ ku le bie ale tua dii a te ni ase ni a nin zɛri Naawen ni Wenni ale ka yɔgsum chalika ale mi.>> Nyɔnɔwa, Naawen Dii Ale A Dɛ Tugurik Tɔŋdɔma Niŋ La ale weeni.
20<<Dila powa ni wɛ niiga diokku kama ale gebi ni chɔrimaŋa. Ni weeni ayen, <Ti kan tom a te fu!> Chekki guuk meena zuk ale tiib buui meena ale teeri tɛŋ ni doa kama ase taabuksa la. 21Mi jam vuk fu kama ase tiib maŋ la. Fi nye ka sɛ a tulim a ta chaab ale mi, a chim tiib poosukwa? 22Fi dan poom sugri fidek ale chiuk kuui ale ta nɔi la, m le diem nya fi foolaawa ale maŋ fu la.>> Nyɔnɔwa Naawen ale weeni.
23<<Fi le nye ka sɛ weeni ayen, <Mi an taŋ ya. Mi an chali vi Baal bɔgtaŋa?> Nya fi ale nye dii viaka po la. Poli fi le nye diila. Fi a nye ase ka gɔi laalaakomi la a chali dɛ ale dɛ, 24boniŋ waarik kaai ale maliŋ gɔnni la, a vuusi vioku ale ka yaalika. Ka tuilum po ka wana ale baga a peri ka? Bon duok kuui ale a yaali ka la a kan daani ka dega. Juelika wen ka kasim boro kama. 25Kan chali ate fi naŋtaata a ga toariŋi, yaase fi basi ate fi tutɔk a ga ko. Alege fi weeni ayen, <Ku ka kiri. Mi a yaali ka bɔgluk chaŋsa, ku be a fɛ ate m va ti.>
26<<Ase ba dan yik zue chivie ale a ta wa diila, dila dek ate chivie a ta Izirali. Badek ale ba nalimaŋa ale ba kpaŋŋa ale ba kaabteerɔma ale ba biisiteerɔma. 27Ba a weeni diok ayen, <Fi ka m ko,> ale a weeni tintain ayen, <Fi ale biak mu.> Ba cheem ba ŋaaŋsa a te mi alege daa ba nina, alege ba daanika po, ba weeni ayen, <Jam a vari ti a basi.>> 28Bɔgluk tii ate ni nye a te nidek la abe bo ka bɛ? Ni basi ate ba jam ase ba nin baga a vari ni a basi ase ni a nin bo daanika po. Juda, ni ta bɔgta piisi ase ka ni ale ta tɛŋsa a piisi diila.
29<<Ka boa ate ni a ta ŋmiŋmaasa a jam ta chaab ale mi? Ni meena a zɛri mi nɔi kama,>> Ka Naawen ale weeni.
30<<Mi namsi ni nuruma ka kinla nyiŋ, ba an siak mi sinsaŋŋa. Ni gebika a ko mi biisiteerɔma kama ase kɔm gbeŋli la.
31<<Nama gaŋka de, ni poli Naawen wanni. Mi chim ka gɔi a te Izirali yaase tɛŋ kaai ale chim legi kpitɔ? Ka boa ate mi nuruma a weeni ayen, <Ti ta fasiyaa kama a nyiemu, ti kan ŋman jam fi jigi diipo diipo?> 32Nipok kaliak ale baŋ wa nifelima ale baŋsa yaase nipok fiak a baŋ wa gatta? Alege mi nuruma a baŋ mi wari da boari a ka chiina. 33Fi seba nɔŋta chali vi yaalika kama. Nipok baai ale ŋmasi bie a baga a zamsi fi suitaŋa kama. 34Fi gattaŋa nyiŋ nidoaba a nya ŋanjak sii ale kan kaasi wari la ziim, alege fi an poom yik ba ale ba wɛ a jo. Alege kude meena 35fi a weeni ayen, <Mi an kaasi wari ya, wa sui kan puuri ale mu.> Alege mi ale bo fi buusa dii nyiŋla fi a weeni ayen, <Mi an nye wabiowa.> 36Ka boa ate fi a cheŋ nna yegayega a tagri fi suitaŋa? Ejipiti ale piinti fu ase Assiria ale jam piinti fu diila. 37Fi mɛ ale basi dula a pai nisa a ji zuk, diila Naawen a zɛri baai ate fi mariŋ la kama, ba kan maari ba.
Currently Selected:
Jeremaya 2: BWU
Highlight
Share
Compare
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
