Jeremaya 1

1Wieŋa de ka kaabteerɔma wanyi ate ba a wi ayen Yilkia ate wa nyini Anatot ate ka bo Benjamin po la nidoabinni Jeremaya ale weeni. 2Naawen wanni yaa jam wa jigi bena pi ale ŋatawa po ate Amon nidoabinni Josia a dɛ naam Juda la, 3a ta ga paari Josia nidoabinni Jeyoiakim Juda naawa a ŋman ga paari bena pi ale dinyiwa chiisa sinuwa po ate Josia nidoabinni Zedekia a chim Juda naab la, ate ba yik Jerusalem nuruma ta cheŋ.

4Naawen wanni a jam mi jigi ayen, 5<<Alege ate m daani fu bisa luikku po la ale mi seba fu kama, alege ate ba biak fu ale mi poori fu kama fi tɔga. Mi lueri fu ase biisiteerɔ la a te tɛŋ kpieŋsaŋa.>>

6Mi yaa weeni ayen, <<M Nyɔnɔwa Naawen mi zɛ biiga. Mi ka biik.>>

7Alege Naawen a weeni mi ayen, <<Kan weeni ayen, <Mi ka biiga.> Ku a fɛ ate fi cheŋ waai meena jigi ate mi a tom fu la abe fi weeni dii meena ate mi a weeni fu la. 8Kan chali ba yɔgsummoa, diila mi a bo ale fu kama m be le vari fu a basi.>> Naawen ale weeni.

9Ate Naawen yaa laari nisa a tiri mi nɔnni ale weeni mi ayen, <<Yɔgyɔgla de m pai m wieŋa a nyo fi nɔnni po. 10Nya, jinla m lueri fu kama ayen fi a nya tɛŋ kpieŋsa ale naata zuk fi dari voori abe fi cheeri lɔnsi, fi kaasi abe fi yuk basi, fi sɛ abe fi vuk.>>

11Naawen wanni a jam mi jigi ayen, <<Fi nya ka boa, Jeremaya?>> Mi yaa tulisi ayen, <<Mi nya ka almond tiib#1:11 Almond tiib a nye ase ka kangbegi tiib la. naŋ.>>

12Naawen yaa weeni mi ayen, <<Fi nya kama chekki, diila mi a kpesi kama ayen m nya m wanni nyeka.>>

13Naawen wanni a ŋman jam mi jigi ayen, <<Fi nya ka boa?>> Mi yaa tulisi ayen, <<Mi nya ka samɔniŋ ale a vaasi, a gbeliŋ a nyini wiilukku.>>

14Naawen yaa weeni mi ayen, <<A nyini wiilukku kaasuŋ ale jam waai meena ale bo tɛŋka zuk la zuk. 15M boro a yaali ayen m wi ka na tii meena ale bo wiiluk geŋka la nuruma.>> Ka Naawen ale weeni. <<Ba nalimaŋa ale jam zaani ba naam zukpagliksaŋa Jerusalem nansuiŋtaŋa po, ba le jam ta chaab ale parik sii meena ale gilim la ale Juda tɛŋsaŋa meena. 16M le mooli m buusaŋa a basi m nuruma zuk ba gaasaŋa nyiŋ ate ba zɛri mu la, ale ju ŋan baai nyum ale masa a te wen yona ale a puusi ba nisima ale nye ŋan baai la.

17<<Gomsi fidek a magsi. Yiti zaani ate fi weeni ba dii meena ate mi a weeni fu la. Kan chali yɔgsum ale ba, kan daa di mi ale basi ate yɔgsum a yik fu ba niŋ. 18Jinla mi a nye fu ka tɛŋ parik, kutuk zaŋi ale kutuk mɔnuŋ parik ayen fi zaani a ta chaab ale tɛŋka meena, a ta chaab ale Juda nalimaŋa, ka kpaŋŋa, ka kaabteerɔma ale tɛŋka nuruma. 19Ba le nye kpaliŋ ale fu alege ba kan nya pagrim fi zuwa, diila mi a bo ale fu kama m be le vari fu a basi.>> Ka Naawen ale weeni.

Currently Selected:

Jeremaya 1: BWU

Highlight

Compare

Copy