Jeremaya 14

1Naawen wanni ale nna a jam Jeremaya jigi a magsi chaab ale tɛŋ kosikka: 2<<Juda a kum kama, ka tɛŋsaŋa a kpi, ba a wooli a te tɛŋka, ate kumsa a nyini Jerusalem a jueli wen. 3Nuru kpientaŋa a tom ba tomteerɔma ayen ba ta nyiam jam te ba. Ba cheŋ viliŋa alege an nya nyiamoa. Ba ŋmani ale samɔn koruta, ba jɔk nyiŋbiiri ale tuim, a yaa lik ba nimbieŋa. 4Tɛŋka a na ka mulisa dii nyiŋla ŋmoruk an ni tɛŋka zuwa, kpaarɔma a jɔk nyiŋbiiri a lik ba nimbieŋa. 5Laŋka po walik nubini a basi di biika dii nyiŋla wuuk a karo. 6Bon waarisa a za guutaŋa zuima a vuusi a kpeeri ase suemkpatta la, si nina a kan ŋmaa nya wuuk ale kan boro la nyiŋ.>>

7Ti wabaataŋa a poom a bo seerɔ a mini ti kama, Naawen yaa, nye wari fi yuenni nyiŋ. Diila ti pilim ŋmanika a zuak kama. Ti tom a kaasi fu kama. 8Fi nyiini ale Izirali Yiila, ka Varibasidɔ ninam po, ka boa ate fi a nye ase nichaanɔ la tɛŋka po, ase nyeendɔ ale a goa jigi yok yeŋ la? 9Ka boa ate fi a nye ase nuru ate ku diiri wa la, ase tugurik tɔŋdɔ wobsik ale kan baga a vari a basi la? Fi bo ka tama po, Naawen yaa, tama abe ta ka fi yuenni, kan zɛri ti.

10Naawen ale weeni nuruma de wie diila ale nna: <<Ba a yaali tuintika ka nna yegayega. Ba kan yik badek ale ba chelimu. Dila Naawen a kan siak ba. Yɔgyɔgla de wa le teeri ba gaasaŋa a namsi ba ba wabaataŋa nyiŋ.>>

11Ate Naawen yaa weeni mi ayen, <<Kan puusi a yaali nuruma de nye niaka. 12Ba a bobi ka nɔi, m kan wom ba kumsa, ba a te juka tiirita ale ŋanbie tiirita, m kan siak ba. M le goanti a ko ba ale gebika ale kɔm ale nyiŋtuila.>>

13Alege mi weeni ayen, <<Nyɔnɔ Naawen yaa, biisiteerɔma kasim a weeni ba kama ayen, ba kan nya gebika yaase ba nam ale kɔmmoa. <Chekki, m le te fu suiyɔgni dii ale di beni dela jigini.> >>

14Naawen yaa weeni mi ayen, <<Biisiteerɔma a mooli ka venta ale mi yuenni. Mi an tom ba yaase m lueri ba yaase m biisi ale ba. Ba a mooli ka venta gɔdaasima wie ale venta sampoporinni ale venta bɔgta wie ale badek popola wie. 15Dila la, Naawen ale weeni dii a magsi chaab ale biisiteerɔ baai ale a mooli mi yuenni nyiŋla ale nna: Mi an tom ba, alege ba a weeni ayen, <Gebik yaase kɔm a kan tiri tɛŋka de.> Biisiteerɔ bala dek ale kpi ale gebika ale kɔm. 16Ate nuru baai ate ba mooli a te la ba le yuk ba a basi Jerusalem suitaŋa po kɔmmu ale gebika nyiŋ. Waai a kan boro a gu ba yaase ba pooma ale ba nidoabilisaŋa ale ba liema. M pai kaasuŋ kuui ale magsi ba la a basi ba zuk.

17<<Biisi wanni de a te ba ayen, <Basi ate m ninaŋa ninyaata sueri a chali yok ale kantueŋ a kan gebiri a te m liewa kaliaka. M nuruma a nam kama ale kɔni biok, niguri dii ale a ŋɔriŋ. 18M dan jo tɛŋ kpieŋka po, mi a nya baai ate gebika a ko ba la, m dan jo tɛŋ nummu po, mi a nya kɔmmu ale a viiri nuruba diila. Biisiteerɔ ale kaabteerɔ meena a cheŋ ka tɛŋ kaai ate ba zɛ la.> >>

19Fi zɛri Juda ka chessi? Fi banti Zayon kama? Ka boa ate fi kɔni ti ate ti kan baga a nya tebika. Ti yiili kama a yaali suiyɔgni alege wamaŋ an jam ya, diipo ale magsi tebika alege ka nyinyigsa nyiini. 20Naawen yaa, ti siak ti wabaataŋa ale ti koma foolaawa kama, ti sum a tom kaasi fu kama. 21Fi yuenni nyiŋ kan zɛri ti a basi, kan te fi zula yuenni chivie. Teeri fi nɔiyeŋka ale ti abe fi kan yik a kaasi. 22Tɛŋsaŋa bɔgluk tii ale kan ta kiri la a ta ŋmoruk a jam? Wenŋmazuimaŋa dek a te ŋmoruk bie a jam? Aaya, ka fi Naawen ti Wen yaa. Dila nyiŋ ti yiilaŋa a bo ka fi jigi, diila ka fi ale a nye kude meena.

Currently Selected:

Jeremaya 14: BWU

Highlight

Compare

Copy