Jeremaya 13
13
1Naawen ale weeni mi diila ale nna: <<Cheŋ a ga da chiak gbain naliŋ a bobi fi chiaka, alege kan te di tiri nyiamoa.>> 2Dila mi yaa jam da chiak gbain, ase Naawen ale dak diila, a pai bobi mi chiaka.
3Naawen wanni a ŋman jam mi jigi a nye buye: 4<<Pai chiak gbain dii ate fi da a bobi fi chiaka la a cheŋ Perat yɔgyɔgla a suk di dula pinaŋa vie po.>> 5Dila mi yaa cheŋ a ga suk di Perat ase Naawen ale weeni mu diila.
6Daa yega ale taam la Naawen yaa weeni mi ayen, <<Cheŋ Perat yɔgyɔgla a ga pai gbanni ate mi weeni ate fi suk la.>> 7Dila mi yaa cheŋ Perat a tu yeeri gbanni juijui ate mi a pai di a suk la, alege yɔgyɔgla de di kaasi a ŋman ka kiri ya.
8Naawen wanni yaa jam mi jigi ayen, 9<<Naawen ale weeni diila ale nna: <M le kaasi Juda kanjantaŋa ale Jerusalem kanjauŋ kpientaŋa ka dila dek. 10Wabaata nyama de, ale zɛri an wom mi wieŋa, ale va ba tuikpanni yaalika a va wen yona a tom a te ŋa ale a puusi ŋa la ale nye ase ka chiak gbanni de la a ka kiri ya. 11Ase gbain ale a bobi nuru chiak diila, dila dek ate mi bobi Izirali yenni meena ale Juda meena a te mi dek. Mi nye nna kama ayen ba chim mi nuruba a ta pimpauk ale zula a jam te mi yuenni, alege ba an wom mi.> Naawen ale weeni.
12<<Weeni ba ayen, <Naawen, Izirali Wenni a weeni ayen, daam bunlɔk meena a sueri ale daam.> Ate ba dan weeni fu ayen, <Tama zɛ ayen daam bunlɔk meena a magsi ku sueri ale daamoa?> 13Yaa weeni ba ayen, <Naawen ale weeni diila ale nna: Mi a yaali ayen m buk waai meena ale bo tɛŋka de po la a gum nalima ŋaai ale kali Deevid naam zukpaglika zuk la, ale kaabteerɔma ale biisiteerɔba ale baai meena ale bo Jerusalem la. 14M le ŋɔriŋ ba a gum chaab, koba ale bisa wayeŋ. Naawen ale weeni. M kan te ate ŋmanteka yaase jiirimmoa yaase vɔŋteka a kasi mu ate m kan kaasi ba.> >>
15Chiib kpesi abe ni wom ni kan ta kanjanta, diila Naawen a biisi kama. 16Ni pai zula a te Naawen ni Wenni alege ate wa ta legi a jam, alege ate ni a nak naŋsa guutaŋa zuk legini po. Ni yiili a yaali ka bolim alege wa le tulim ate bu chim legi nna kpitɔ a tagri ate ku nye birim. 17Alege ni dan kan wom ya, m le kum digdig ni kanjantaŋa nyiŋ. Mi nina ale kum tuotuowa ate ninyaata a chali, dii nyiŋla Naawen piisaŋa ba le yik ŋa.
18Weeni naawa ale naab mawa ayen, <<Ni nyini ni naam zukpagliksaŋa zuk a siŋ diila ni zula naam zutɔksaŋa a lak ni zuimaŋa a lo kama.>> 19Tɛŋ nina ŋaai ale bo Negev la a lik kama, waai abe kan boro a lak si. Juda meena ba le ji ba a ta cheŋ tɛŋ yoŋ, ba ji a ta cheŋ ferr.
20Ni zak zuima a nya baai ale nyini wiilukku geŋ a cheena la. Pa ŋaai ate ba jam pai te fu la, a bo ka be, pa ŋaai ate fi kuulim ŋa wie la? 21Ni le weeni ayen ka boa ase nuru baai ate nama poli ayen ba jam ka ni doaba la a nin nak de ni a nya ni zuwa? Ni nyiŋsa ale dom ase nipok puuk ale a dom ayen wa biak la. 22Ate fi dan bek fidek ayen, <<Ka boa ate kude nye mi?>> Ka fi waba boanni nyiŋ ale soa ate fi mankutaŋa a cheeri ale fɛ a goa ale fu. 23Kus denɔ a baga a tagri wa nyiŋ gbaŋka yaase yɔŋni di soblaŋa? Ni be an baga a nye wamaŋsa mɛ ni ale malim ale biem nyeka diila.
24<<M le kati ni waaŋ ase vɔtta ate tɛŋ kosik viok a ji la. 25Ni charuku ale nna, charuk kuui ate mi gomsi dueni ni la, dii nyiŋla ni baŋ mi kama ale ta sebchakka ale venta wena. Naawen ale weeni. 26<<M le dari ni mankutaŋa a ta jueli ni ninaŋa ate ba nya ni chivie 27ale ni kaboŋsaŋa ale kɔrisaŋa ale a kan chali chivie taabugni. Mi nya ni nyeela ŋaai ate mi a kisa la kama guutaŋa zuk ale laŋsaŋa po. Kikaasa a bo ni zuk Jerusalem demma! Ni le daŋ a paari ka dimpo?>> Naawen ale weeni.
Currently Selected:
Jeremaya 13: BWU
Highlight
Share
Compare
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
