Jeremaya 15

1Naawen yaa weeni mi ayen, <<Moosis ale Samuel a dan poom za mi niŋ, m suinum a kan bo nuruma de jigi ya. Te ti ba cheŋ mi niŋ. Basi ate ba cheŋ. 2Ate ba dan bek fu ayen, <Ti cheŋ bɛ?> Weeni ba ayen, <Naawen ale weeni diila ale nna: Baai ale magsi kum la ba kpi, baai ale magsi gebika la gebika a ko ba, baai ale magsi viirika a viiri, baai ale magsi yik ta cheŋka la, ba yik ta cheŋ.>

3Naawen ale weeni ayen, <<M le tom kaasirɔba tɔgatɔga banaansi ate ba ta chaab ale ba, gebika a ko ba ate baasaŋa a dari ta cheŋ, ate wenzuk nuinsaŋa ale tɛŋzuk duŋsaŋa a kaasi abe si ŋɔbi. 4M le nye ate tɛŋzuk naataŋa a kisi ba Azekaya nidoabinni Manasa waai ale ka Juda naab la ale nye dii Jerusalem po la nyiŋ.>>

5<<Ka wana ale wa ŋmani te ni, Jerusalem demma? Ka wana ale wa kum ni nyiŋŋa? Ka wana ale wa baga a puusi ni? 6Ni zɛri mi kama,>> Naawen ale weeni. <<Ni kasim pai mi vaka a basi. Dila m le pai nisa a yik ni a kaasi ni. M kan ŋman baga a sak jiirimmoa. 7M le yali ni ale jayalim buui ale ta nyina la tɛŋka nansuiŋtaŋa nɔi. M le basi ate ku ko ba abe m kaasi m nuruma diila ba an tagri ba suitaŋa. 8M le basi ate ba pukɔŋŋa a piisi ase nyakpiemu tintain busuŋku la. Kantueŋ suŋsuŋ m le ta kaasirɔ a jam ate wa ta chaab ale ba bi paalukku mama. M le ta sui kaasuŋ ale kpazinagsuk a jam ba zuk nna mwuli. 9Bisa bayopɔi ma ale cha abe wa vuusi wa vuusum buui ale a kpegli. Wa wenbinni ale siŋ ale ku diem ka kantueŋ. Wa le nya chivie ale valiŋsa. Baai ale vuugi la m le ko ba ale gebik ba dachaasaŋa niŋ.>> Naawen ale weeni.

10Mi daa suipeentik nuru. Mi zɛ dii ate mi mawa a biak mi a basi tɛŋka po la. Mi nye ka kpaliŋsa ale nak nanpaga ale waai meena tɛŋka po. Mi an piem waai ligra yaase m piem ligra a te waai ya, alege waai meena a ka a te mi.

11Naawen a weeni ayen, <<Chekki m le vari fu a basi wamaŋ nyiŋ. Wensie m le basi ate fi dachaasaŋa a saalim fu kaasuŋ ale ninam daaŋa po.

12<<Nuru a baga a wɛ kutuwa. Kutuk kuui ale nyini wiiluk geŋ ŋa yaase kutuk mɔnuŋŋoa? 13Ni jigsika ale ni tuilum ŋantaŋa m le basi ate ba koalim a ta cheŋ ni wabaataŋa tɛŋka po meena nyiŋ. 14M le basi ate ni chim ni dachaasaŋa yɔm tɛŋ kaai po ate ni zɛ, diila mi suipuurumu ale fuk bolim toati buui ale bu de ni.>>

15Naawen yaa, fi a miŋ wie kama, teeri m wie abe fi nya m zuk. Tuni m dachaasaŋa a te mu. Fi ka waai ale a duŋ sui, kan ta mu a cheŋŋi. Poli m le nam ale lieta fi nyiŋ diila. 16Fi wieŋa ale jam la, mi dɛ ŋa kama. Ŋa jam ka mi masim ale suinum mariŋka, diila mi ta ka fi yuenni, Naawen Dii Ale A Dɛ Tugurik Tɔŋdɔma Niŋ La, Wen yaa. 17Mi an maa kali nuruba suŋsuŋ a la ale a dɛ masim ale ba, mi kali ka m dek m nyiini dii nyiŋla fi nisa ale jam bo mi zuk ate fi sueri mi ale suipuurum. 18Ka boa ate mi domka a kan kpeglim ate mi kɔnika a bie a ka tebika? Fi le chim ka pimpaasima beli a te mi, ase bulik kaai ale kpeeri ya?

19Dila nyiŋ Naawen ale weeni diila ale nna: <<Fi dan laŋ nyeka, m le ta fu ŋmani ate fi tom a te mu. Ase fi a nin biisi wamaŋsa alege daa wakayaata, fi le chim m biisiteerɔ. Basi ate nuruma de a tulim jam fi jigi, alege ku a fɛ ate fi a kan tulim cheŋ ba jigi ya. 20M le basi ate fi chim siak a te nuruma de, kutuk mɔnuŋ parik pagrik, ba le kpaliŋ ale fu alege ba kan nya pagrim fi zuwa, diila mi bo ale fu kama ayen m vari fu a basi.>> Naawen ale weeni. 21<<M le vari fu gaasa nyama nisa po a basi abe m yeeri fu gaasa nyama bobika po a ta nyini.>>

Currently Selected:

Jeremaya 15: BWU

Highlight

Copy

Compare