Jeremaya 12
12
1Naawen yaa, fi kasim ka wayɔrisima nyɔnɔ, ase m nin ta biik a jam fi jigi. Alege m le biisi fi nyemagsika wari. Ka boa ale soa ate wabanyeerik wari a nye a niagi? Ka boa ale soa ate baai ale kan ta siaka la a boro ale suiyɔgni? 2Fi ale vuk ba, ate ba feri naŋsa, ate ba chim a yɔni yɔna. Fi kasim bo ka ba nɔngbanvaataŋa alege yalima ale ba suiniimaŋa. 3Alege fi seba mi, Naawen yaa. Fi a nya mi kama a chamsi mi popolaŋa ale fu ale ka diila. Dari ba ta cheŋ ase piisa la ate ba che ba. Gaari ba a magsi da dii dai ate ba a tɔgri la. 4Tɛŋka ale ko beni soa ka sɛ ate wuuku ale bo laŋ meena po la a kpi. Dila meena, nuruma a weeni kama ayen, <<Wa kan nya dii ale di nye ti la.>>
5<<Fi daa chali chala ale nuruma naŋta ate ba nye ate fi jiak fi le nye ka sɛ a nak nanpaga ale wusuma? Fi dan nak naŋ a lo tɛŋ kaai ate wari a kan nye fu, fi le nye ka sɛ a maari fidek Jodan Benni tiisaŋa po? 6Fi suataŋa, fidek dɔkdemma a poom a pa fu a da kama, ba kaari kama ate ku jueli a ta chaab ale fu. Kan mariŋ ba, ba le poom a biisi fi wamaŋsa la mɛ.
7<<M le zɛri m yenni, a banti m nitalimu. M le pai waai ate mi a yaali la a nyo wa dachaasaŋa nisima po. 8Mi nitalimu a yaa nye mi nna ase ka gbeŋli ale bo tiisa po la. Wa a na mi, dila nyiŋ mi kisi wa kama. 9Mi nitalimu a nye mi jigi nna ase piina ale nuin sii ale a dɛ lanta la ale gilim a dɛ mi nuruma ate mi lueri a te m dek la. Ga tigsi gɔi duŋsaŋa meena, a ta si jam ate si dɛ. 10Naapeerisa yega ale kaasi m kadukka a tabi m laŋka. Ba le tulim m laŋka ate m sui peenti ale ka la ate ka chim laŋ koruk kinla. 11Ka le chim tɛŋ kaai ale kan ta jaaboa, tɛŋ kosik ale tɛŋ koruk mi niŋ, tɛŋka meena ale doa kinla dii nyiŋla waai niŋ a karo. 12Guutaŋa meena zuk gɔnni po kaasirɔba ale tigsi diila Naawen gebika ale ko a nyini tɛŋka kpeglim kinka a ga paari m kala, waai a kan vuugi. 13Ba le bori ŋanbie alege ŋari munsa. Ba le jiak badek alege kan nya jaaboa. Dila ni ta ni cheka chivieŋa Naawen suipuurumu nyiŋ.>>
14Naawen ale weeni diila ale nna: <<Mi gaasa gilagila nyama ale vari nitalimu ate mi te Izirali demma la, m le dari ba a voori ba tɛŋsaŋa po abe m voori Juda yenni ba suŋsuŋ. 15Alege m dan voori ba ku ŋaaŋnyiŋ, m le ta jiirim ale ba abe m ta waai meena a ŋman jam wadek nitalim jigi ale wadek tɛŋ po. 16Ate ba dan zamsi nalimnyiini mi nuruma suitaŋa ale pɛ mi yuenni nyiŋ ayen, <Chekki Naawen ale vua la nyiŋ,> alege ba poom jam sak mi nuruma ayen ba a pɛ Baal nyiŋla ba yaa le kali paari mi nuruma po. 17Alege tɛŋ kaai a dan kan wom ya, m le dari ka a voori a kaasi ka chessi.>> Naawen ale weeni.
Currently Selected:
Jeremaya 12: BWU
Highlight
Share
Compare
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
