Jeremaya 11
11
1Wa dii ale nyini Naawen jigi a jam Jeremaya jigi la ale nna: 2<<Wom nɔiyeŋka nyemagsika abe fi weeni Juda nuruma ale baai ale bo Jerusalem la. 3Weeni ba ayen dii ate Naawen, Izirali Wenni a weeni la ale nna: <Kikaasa a bo nuru waai ale kaa va nɔiyeŋka nyemagsika de la, 4nye magsi kaai ate mi weeni ni kokpieŋsaŋa diipo ate mi ta ba nyini Ejipiti a nyini la, a nyini kuta nyaliŋka bolimu po a nyini la.> Mi jam weeni kama ayen, <Ni a zuli mu abe ni a nye dii meena ate m weeni la, ate ni chim m nuruba ate mi chim ni Wen. 5Ate mi yaa nye dii ate mi a pɛ ale ni kokpieŋsaŋa, ayen m le te ba tɛŋ ate biisim ale siita a chali ka po la,> tɛŋ kaai ate ni soa jinla la.>> Mi yaa tulisi ayen, <<Ku be nye dila, Naawen yaa.>>
6Naawen a weeni mi ayen, <<Mooli wieŋa de Juda tɛŋsaŋa ale Jerusalem suitaŋa po. <Wom nɔiyeŋka nyemagsika de a va ŋa. 7A nyini diipo ate mi ta ni kokpieŋsaŋa a nyini Ejipiti a jam paari jinla la, mi kaam ba kama a tulim ayen, <<Ni zuli mu.>> 8Alege ba an wom ya yaase ba popola a boro. Alege ba goanti va ka ba tuikpanni ale ba suiniim baataŋa ale a yaali diila. Dila mi yaa ta nɔiyeŋka kikaasaŋa meena a jam ba zuk mi ale weeni ba ayen ba va nɔiyeŋka alege ba an va la.> >>
9Naawen yaa weeni mi ayen, <<Biem zɔga ale bo Juda nuruma ale baai ale bo Jerusalem la suŋsuŋ. 10Ba pilim ŋmani ka ba kokpieŋsaŋa wabaataŋa po, baai ale jam zɛri an wom mi wieŋa. Ba va ka wen yona a tom a te ŋa. Izirali yenni ale Juda yenni meena a kaasi nɔiyeŋka ate mi a nye ale ba kokpieŋsaŋa la kama. 11Dila nyiŋ Naawen ale weeni diila ale nna: <M le ta kaasuŋ a jam ba zuk ate ba kan bɛ. Ba le kaari a wi mi m kan wom ba. 12Juda tɛŋsaŋa ale Jerusalem nuruma ale kaari a wi wena ŋaai ate ba ju ŋan baai nyum ale masa a te la alege ŋa kan maari ba ase kaasuŋ a nin zi. 13Juda demma, ni ta wena ka nna yega ase ni ale ta tɛŋsaŋa diila ale ni kuŋkuŋtaŋa ate ni sɛ a ju ŋan baai nyum ale masa a te chivie wenni Baal la a piisi ase ka Jerusalem suitaŋa la.>
14<<Kan puusi a te nuruma de yaase fi saalimu yaase juisi te ba, dii nyiŋla ba dan wi mu a nyini ba ninammu po m kan wom ba.
15<<Nuru baai ate mi a yaali la a nye ka biem wie. Ka boa ale soa ate ba a jo mi yenni po? Ba a poli kama ayen pumpuulima nyeka ale kaabka tiirita ale kasi ba kaasuŋ po. Ba kaa naŋi.>>
16Naawen a jam a wi ni ayen ka kpaam tiib buui ale ta va yɔgsa a ta yɔn naliŋsa, alege yɔgyɔgla wuurika ase nanpansa la ale ju bu vaataŋa ale bolim abe bu naŋsaŋa a wɛ.
17Naawen Dii Ale A Dɛ Tugurik Tɔŋdɔma Niŋ La ale vuk ni la, ale dueni kaasuŋ a magsi ni dii nyiŋla Izirali yenni ale Juda yenni a nye ka biem ale nye ate mi sui a puuri ba le ju ŋan baai nyum ale masa a te Baal la.
18Naawen ale pai ba biem zɔŋŋa a sak mi la nyiŋ, mi jam seba kama, diila dila po wa sak mi kama dii ate ba jam boro a nye la. 19Mi jam nye ase ka pabiik kaai ale nye ŋmam ate ba ta a cheŋ tɔgrika la. Mi jam zɛ ayen ba zɔk kama a ta chaab ale mi, a weeni ayen, <<Ni te ate ti kaasi tiimu ale bu yɔnaŋa. Ni te ate ti gebi wa ŋanvuta tɛŋka po a basi, ate ba kan ŋmaa teeri wa yuenni diipo diipo.>> 20Alege Naawen Dii Ale A Dɛ Tugurik Tɔŋdɔma Niŋ La, fi waai ale a bo buusa a yɔrisi la ale a chamsi suinum ale popola, basi ate mi a nya fi tutuna ba zuk, diila fi ate mi pai m wanni a te.
21<<Dila nyiŋ Naawen ale weeni dii a magsi chaab ale Anatot nuruma baai ale a gisi ba ko fu la ale a weeni ayen, <Kan mooli Naawen yuenni nyiŋŋa kan daa di ti le ko fu.> 22Dila nyiŋ Naawen Dii Ale A Dɛ Tugurik Tɔŋdɔma Niŋ La ale weeni diila ale nna: <M le namsi ba. Gebik ale ko ba nidoa paalukku, kom ale ko ba nidoabilisaŋa ale ba liema. 23Nuruba magadek mɛ la a kan poom tali a te ba, dii nyiŋla m le ta kaasuŋ a jam Anatot nuruma zuk ba namsika benni.> >>
Currently Selected:
Jeremaya 11: BWU
Highlight
Share
Compare
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
