Azaya 66

1Naawen ale weeni diila ale nna, <<Wenŋmazuk ale mi naam zukpaglika, ate tɛŋzuk de a chim m naŋsa tabika jigi. Yenni ate fi ale sɛ a te mi la a bo ka bɛ? M vuusumu jigini a bo ka bɛ? 2Daa mi nisa ale nye ŋantaŋa de meena ate ba boro?>> Naawen ale weeni. <<Waai ate mi a yaali la ale nna: waai ale a zaab wadek ale a siak wa kaasuŋ ate wa nyiŋ a gɔk ale m wanni la. 3Alege waai ale a nye lalik kaabka la a nye ase ka waai ale ko nuru la, waai mɛ ale a nye pabiik kaabka la, a nye ase ka waai ale wɛ biak ŋiri la. Waai ale a nye ŋandiinta tiirim la a nye ase ka waai ale pai deri ziim te la, waai ale a ju ŋan baai nyum ale masa ase teerika la, a nye ase ka waai ale a kaabi bɔgluk la. Ba lueri ka badek suita, ate ba chiisaŋa a mariŋ ba kisita wie. 4Dila mi mɛ lueri nyeka tuem ayen m tebi ba, abe m ta dii ate ba a chali yɔgsum la a jam ba zuk. Mi ale jam wi la, waai an tulisi ya, mi ale biisi la, waai an wom ya. Ba nye ka biem mi nina po ale lueri dii ale kaa peenti mi sui la.>>

5Wom Naawen wanni, nama baai nyiŋsa ale a gɔk ale wa wanni la, <<Ni suataŋa baai ale kisi ni ale gaari ni mi yuenni nyiŋla, a weeni kama ayen, <Te Naawen a nya zula, ate tama nya ni masimu. Alege ba ale jo chivie po.

6Wom kaarika tɛŋ nummu po, wom nuemka ale nyini Naawen yenni po la, Ku nyini ka Naawen jigi a tuni wa dachaasaŋa dii ale magsi ba la.

7<<Ate wa piilim wa puuka domka la ale wa poom biak kama. Ate nyiŋdomma a jam wa nyiŋka po la ale wa poom biak ka nidoabili. 8Ka wana ale maa wom wieŋa de chaaba? Ka wana ale maa nya wieŋa de chaaba? Ba ale baga a biak tɛŋ kpieŋ dai yeŋ po yaase ba biak tɛŋ kpieŋ nna kadi? Alege Zayon ale biak wa bisaŋa kama ale an poom dom ya. 9Naawen ale weeni ayen, <<Mi ale ta biam jam ale kan basi ate ba a biagi?>> Fi Wenni a weeni kama ayen, <<Mi a dan ta biam jam, mi a lik biam luikku kama?>>

10<<Dɛ masim ale Jerusalem abe fi sui a peenti wa nyiŋ, nama baai meena ale a yaali wa la. Dɛ masim yegayega ale wa, nama baai meena ale a kum wa nyiŋla. 11Diila wa le nya ni zuk ate ni chak abe ni sue yɔk ale wa biisaŋa ŋoosika. Ni le nyu chak abe ni sue peenti ale wa ŋantaŋa.>>

12Dila nya kude ate Naawen a weeni ayen: <<M le te suiyɔgni a teeri paari wa ase benaŋ la ale tɛŋ kpieŋsa jigsika ase nyiam ale sueri benaŋ a waaŋ la. Wa le nya ni zuk abe wa pai ni ale wa nisa a yuk a kali wa naŋsaŋa zuk. 13Ase ma ale a yɔk wa biik sui diila, mi mɛ ale yɔk ni sue. Ate ni sue ale yɔk Jerusalem nyiŋ.>>

14Ni dan nya kude, ni sue ale peenti ate ni le busum ase wuuk la. Naawen tomteerɔma ale miŋ wa nisaŋa, alege wa ale sak wa suipuurumu ale wa dachaasaŋa. 15Nya, Naawen a cheen kama ale bolim ate wa wusuma torokoma a nye ase va pagrik la. Wa siŋ cheen kama ale wa suipuurumu ale wa toariŋka ale bolim ŋaasa. 16Naawen a ta ka bolim ale wa gebi woŋka ayen wa pai sak wa buusaŋa nuru meena zuk, nuruba yega ate Naawen a za wa ko.

17<<Baai ale gaari badek a te ale sugri badek ayen ba jo kaduksaŋa po la ale va waai ale bo ale baai ale a ŋɔbi die lanta ale dawuita ale kisita ŋanta la, ba ale tu ba kpeglimka.>> Ka Naawen ale weeni.

18<<Ba nyeelaŋa ale ba popolaŋa nyiŋ, ate mi za m tigsi tɛŋ kpieŋsa ale buura meena ate ba jam nya mi zulaŋa.

19<M le nye wari ba po ate ba nya, ate m le tom baai ale vuuk la ate ba cheŋ tɛŋ kpieŋsaŋa de, Tarsis ale Libia ale Liidiya, baai ale ta yuei ase tɔŋdɔba la ale Tubal ale Girik tɛŋka ale tɛŋ sii ate nyiam a gilim si ate si yalima la, sii ale kan wom mi yuei yaase si nya m zulaŋa la. Ba le mooli m zulaŋa wie tɛŋ kpieŋsaŋa po. 20Ate ba ale ta ni suataŋa meena a nyini tɛŋ kpieŋsaŋa meena po a jam m tuilum guuku Jerusalem po ase tiirim la a te Naawen wusuma ale wusuma torokoba ale wusum bonsa ale laalaakomiba zuk: Naawen weeni kama ayen, <<Ba ale ta ba jam ase ka Izirali demma ale ta ba ŋanbie tiiritaŋa a jam Wen yenni po la ate ba pai nyo ŋan naliŋsaŋa ate ba ta tom tuima la po. 21Ate m le lueri ba gela ate ba chim kaabteerɔba ale Livaiba. >> Ka Naawen ale weeni.

22<<Ase wenŋmazuk paalukku ale tɛŋ paalika ate m za m nye ate ka bo m niŋ la, fi yuenni ale fi ŋaaŋbisaŋa ale boro ka dila mɛ. 23A nyini Chiik Paalik a ga paari ka choa ale Vuusum Dai ga paari di choa, saalɔ meena ale jam koori mi niŋ,>> Ka Naawen ale weeni. 24<<Ate ba ale nyini peelim a nya baai ale nye tukpari ale mi a kpi la nyiŋsaŋa, ba nanzueŋa a kan kpi yaase ba bolimu a kpi, ate saalɔ a kan yaali ba.

Currently Selected:

Azaya 66: BWU

Highlight

Compare

Copy