Niŋdeerɔba 3
3
1Tɛŋsaŋa de ale Naawen a tali basi ayen wa nye Izirali dem baai meena ale kan tu kpaliŋsa Keenan tɛŋka po la a nya. 2Wa nye kude ayen wa sak ba ka Izirali ŋaaŋbisaŋa baai ale kan seba kpaliŋ sii ale liŋ nye la wie. 3Filistia niŋdeerɔba banuwa, Keenan demma meena ale Saidon demma ale Yivi demma ale bo Lebanon guutaŋa ale nyini Baal Yermon Guuku a cheŋ Lebo Yamat la. 4Ba tali boro ayen ba nye ka Izirali demma a nya ase ba le siak te Naawen wieŋa, ŋaai ate wa ta va Moosis zuk a te ba kokpieŋsaŋa la.
5Izirali demma a yaa jam bo Keenan ale Yit ale Amori ale Perizzi ale Yivi ale Jebus demma po. 6Ba jam a faari ka ba liema ale pai badek liema a yalisi tɛŋ sila bisaŋa ale a va ba bɔgtaŋa.
7Izirali demma a yaa nye biem Naawen nimbie po, ba jam baŋ Naawen ba Wenni wari kama ale a va Baal ale Asera bɔgtaŋa. 8Ate Naawen sui a yaa puuri ale Izirali demma ate wa pai ba a nyo Kusan Arisataim, Araam Nayaraim tɛŋka naawa nisima po, waai ate Izirali demma a jam bo wa jigi a paari bena naaniŋ la. 9Alege ase ba le jam kum te Naawen la, Wa yaa yeeri varibasidɔ a ta nyini badek po. Wa yuei ale Otniel Kenaz biik, Kaleb yoa ale nye wa, wala ale jam vari ba a basi. 10Naawen Chiika yaa jam wa zuk, ate wa chim Izirali niŋdeerɔ a cheŋ kpaliŋ. Naawen a pai Kusan Arisataim, Araam naawa a nyo Otniel nisima po, wala ale jam nya pagrim wa zuk. 11Tɛŋka a yaa jam nya suiyɔgni bena pisinaansi a paari diipo ate Otniel Kenaz biika a kpi la.
12Izirali demma a ŋman nye biem Naawen nimbie po, ba le nye biemu de la nyiŋ Naawen a te Eglon Moab naawa ka pagrim Izirali demma zuk. 13Wa jam wi ka Ammon ale Amalek demma ate ba gum wa po, Eglon yaa nye kpaliŋ ale Izirali demma a tuesi Tɛŋka ale ta Kpinkpatta Tiisaŋa la. 14Izirali demma a jam bo ka Eglon Moab naawa jigi a paari bena pi ale naaniŋ.
15Ate Izirali demma a ŋman kum te Naawen ate wa te ba varibasidɔ, wa yuei ale Eyud, wa jam ka galik, Gera Benjamin denɔwa biik. Izirali demma a jam tom wa ale ka zula tiirim Eglon Moab naawa jigi. 16Eyud yaa nye gebik noa ŋaye ate ka woglimmu a paari anamagib buta, a pai ka su wa juga kɔsukku nyiŋ ate wa gattaŋa a lik ka. 17Wa yaa pai zula tiirimu a te Eglon Moab naawa waai ale jam biigi nna yegayega la. 18Eyud ale jam te zula tiirimu a nueri la ŋaaŋnyiŋ, wa yaa basi nuru baai ale ji tiirimu la suik po. 19Bɔgtaŋa ale moata Gilgal jigini la wa yaa ŋman cheŋ a weeni ayen, <<M ta ka wasusugi m weeni sak fu naaba.>> Ate naawa a yaa weeni ayen, <<Ni goori de.>> Ate baai ale tom a te wa la a yaa basi wa.
20Eyud yaa forisi paari wa ase wa le kala wadek wa nyiini wa naam yeri gboŋku zuk la a weeni ayen, <<M ta ka wari a nyini Wen jigi m te fu.>> Ase naawa ale yiti wa zukpaglika zuk la, 21Eyud yaa pai wa gala nisaŋa a yeeri gebik a ta nyini wa juga kɔsukku nyiŋ a chub naawa lɔgni. 22Gebika yikka jigini a maa feri jo kama a taam na nyini wa ŋaaŋka. Eyud an dari gebika a voori ya, ate wa nyiŋka kpaamu a lik gebika meena. 23Eyud yaa nyini peelim ale kpari dɔkku tuataŋa.
24Wa le cheŋ la ŋaaŋnyiŋ naawa tomteerɔma a yaa jam nya ŋmazuk dɔkku tuataŋa a kpari. Ba yaa weeni ayen, <<Da dii dai wa boro a basi ka yaata yenni niŋ dɔkku po.>> 25Ba yaa limisi ate chivie a ga yik ba, alege wa an diem a lak dɔkku tuataŋa, ba yaa pai saari fiik a lak ti. Dula baa yaa nya ale ba nyɔnɔwa a lo doa tɛŋ a kpi.
26Ase ba le a limisi la, Eyud yaa cheŋ. Wa jam va ka bɔgtaŋa tɛŋ a cheŋ Seira. 27Ase wa le paari dula la, wa yaa peeri damuniŋka Ɛfraim tɛŋka ate guutaŋa a bo ka po la, ate Izirali demma a va wa a nyini guuku zuk a siŋ. Wa ale jam de ba niŋ.
28Wa weeni ayen, <<Ni va mi,>> ale Naawen a pai Moab ni dachaasaŋa a nyo ni nisima po kama.>> Ba yaa va wa a siŋ a tuesi kauk kuui meena ale va Jodan benni a cheŋ Moab la, ba an jam siak ate waai a lo jueli ya. 29Dila powa ba jam ko Moab demma ase ka nuruba tusa pi (10,000) la, baai meena ale pagra la, nuru yeŋ mɛ la an jam a bɛ ya. 30Dai dila danni Moab jam siak te Izirali demma kama, ate tɛŋka a nya suiyɔgni a paari bena pinaanuŋ.
31Eyud ŋaaŋnyiŋ ka Samgar Anat biika, waai ale jam ko Filistia demma kobsiyuebi ale diok kuui nɔi ale chɔrisi la. Wa mɛ a jam vari Izirali demma a basi kama.
Currently Selected:
Niŋdeerɔba 3: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
