Niŋdeerɔba 2

1Naawen maarɔwa a yaa nyini Gilgal a cheŋ Bokim ayen, <<Mi ale ta ni nyini Ejipiti po a jam a ta ni jo tɛŋ kaai po ate m pɛ ayen m te ni kokpieŋsaŋa la. M weeni ayen, <M kan kaasi m nɔiyeŋka ate m nye ale ni la, 2ate nama a kan nye nɔiyeŋ ale tɛŋka de nuruma, alege ni kpiti ba kuŋkuŋtaŋa a basi. Alege ni an wom m nɔi ya, ka boa ate ni nye nna? 3Dila nyiŋ mi a weeni ni kama ayen m kan yiak ba a basi te ni, ba le chim ka munsa ni ganaŋa abe ba bɔgtaŋa a chim baruk a te ni.>>

4Ase Naawen maarɔwa ale jam biisi wieŋa de a te Izirali demma meena la, nuruma a yaa kum nna yegayega, 5ale wi jigini yuei ayen Bokim. Dula jigini ba yaa nye kaabka a te Naawen.

6Josua ale basi Izirali demma ate ba cheŋ la ŋaaŋnyiŋ, ba yaa cheŋ ba tuesi tɛŋka, waai meena ale wadek nitalim. 7Nuruma a jam va Naawen kama nalimnyiini diipo ate Josua a diem vua la ale nisɔm baai ale jam goa beni gaam wa la, baai meena ale nya wakpiema ŋaai ate Naawen a nye te Izirali demma la.

8Naawen tomteerɔwa Josua waai ale ka Nun nidoabinni a jam ta ka bena kook ale pi ale kpi. 9Ate ba gu wa tɛŋ kaai ale ka wa nitalim la po, Timnat Yeres ale bo guuku ale bo Ɛfraim la, Gaas Guuku wiilukku geŋsa.

10Gaŋ kala meena ale kpi la ŋaaŋnyiŋ, gaŋ ka choa ale yiti a zɛ Naawen yaase wa le nye dii a te Izirali demma la. 11Izirali demma a yaa nye biem Naawen nimbie po a tom a te Baal bɔgtaŋa. 12Ba yaa zɛri Naawen, ba koma Wen dii ale ta ba nyini Ejipiti po a nyini la. Ba jam va ale a puusi nuruba tɔgatɔga wenaŋa ale gilim ba la. Ba jam nye kama ate Naawen sui a puuri, 13dii nyiŋla ba zɛri wa kama ale tom a te Baal ale Astoret wenaŋa. 14Wa suipuurumu po wa yaa ta chaab ale Izirali demma ate Naawen yaa pai ba a te baai ale siti ba la ate ba vari ba. Wa yaa pai ba a da te ba dachaasaŋa ale gilim ba la, baai ate ba an ŋman jam baga a zɛri. 15Diipo meena Izirali demma a dan nyini peelim ba nye kpaliŋ Naawen ale namsi ba ate ba nak dɛ ba ase Wa le pɛ a te ba la. Ba jam bo ka ninam kpiem po.

16Naawen a yaa lueri niŋdeerɔba baai ale vari ba a ta nyini baai ale siti ba la nisima po a basi. 17Alege ba an diem a wom ba niŋdeerɔma nɔi ale pai badek a te bɔgluk yoŋta a puusi ti. Ba an jam a nye ase ba koma la, ba deri kpabi pai ba koma suiku a basi kama, suik kuui ale a te Naawen sinsaŋŋa zula la. 18Diipo meena Naawen a dan te ba niŋdeerɔ, wa bo ale ba ka di a tom vari ba a ta nyini ba dachaasaŋa nisima po a basi ase niŋdeerɔwa ale vua a paari diipo la. Dii nyiŋla Naawen a ta jiirim ale ba kama ase ba le bo baai ale a namsi ba la jigi a kum la. 19Alege niŋdeerɔwa a dan kpi, nuruma a nyiem pilim ŋmani kama a ŋmasi tom kaasi a gaam ba kokpieŋsaŋa, a va bɔgluk yoŋta a tom a te ale a puusi ti. Ba jam zɛri ba biem nyeelaŋa ale ba tukpari suitaŋa basika kama.

20Dila nyiŋ Naawen sui yaa puuri nna yegayega ale Izirali demma ate wa weeni ba ayen, <<Dii nyiŋla tɛŋka de a zɛri nɔiyeŋka ate m dueni ale ba kokpieŋsaŋa la kama ale an wom mi, 21Mi a kan ŋman yiak tɛŋsaŋa de kanyi a te ba, sii ate Josua a kpi alege la. 22M le pai si kama a nye Izirali demma a nya ase ba ta Naawen suiku ale a cheŋ ku po ase ba kokpieŋsaŋa la ya.>> 23Naawen a basi tɛŋ sila ayen si tali boro kama, Wa an jam yiak si a basi bunyi dekki a pai si a nyo Josua nisima po.

Currently Selected:

Niŋdeerɔba 2: BWU

Highlight

Copy

Compare