Niŋdeerɔba 4
4
1Eyud ale kpi la ŋaaŋnyiŋ Izirali demma a ŋman nye biem Naawen nimbie po. 2Ate Naawen a pai ba nyo Jabin nisima po Keenan naawa waai ale a nya Yazor tɛŋka la. Wa tugurik tɔŋdɔma kpagni a jam le Sisera, waai ale jam bo Yaroset Yaggoyim la. 3Dii nyiŋla wa jam ta ka kuta torokoba kobsaneok ale namsi Izirali demma a paari bena pisiye, ate ba kum a te Naawen a yaali maarika.
4Debora nipok biisiteerɔwa, Lappidot powa ale jam dɛ Izirali demma niŋ dipo. 5Wa jam a bo buusa ka Debora kpinkparukku ale bo Arama ale Betel suŋsuŋ, Ɛfraim po ate guuta a bo ka po la tɛŋ, ate Izirali demma a jam wa jigi ate wa a biisi ba biisaŋa a te ba. 6Wa yaa jam wi Barak Abinoam biika ate wa nyini Kades ale bo Nafitali po la a weeni wa ayen. <<Naawen Izirali Wenni Naawen a weeni fu ayen, cheŋ ta nuruba tusa pi (10,000) a nyini Nafitali ale Zebulun a de ba niŋ a cheŋ Tabor Guuku. 7Mi ale bari yik Sisera Jabin tugurik tɔŋdɔma niŋdeerɔwa ale wa torokoma ale wa tommu Kison Benaŋka a pai nyo fi nisima po.>>
8Barak yaa weeni wa ayen, <<Fi dan va mi a cheŋ, m le cheŋ alege fi dan kan va mi a cheŋ, m kan cheŋ.>>
9Debora a yaa weeni ayen, << Ku nala.>> Mi ale cheŋ ale fu. Alege fi le a nye dii wanni de zuk la, zulaŋa a kan chim fi zula, Naawen ale pai Sisera a nyo ka nipok nisima po.>> Dila nyiŋla Debora yaa cheŋ Kades ale Barak, 10kauk kuui ate wa tigsi Zebulun ale Nafitali nuruba la. Nuruba tusa pi (10,000) ale jam va wa. Debora mɛ a jam maa va wa cheŋ kama.
11Ɛba Ken denɔwa a jam basi wa Ken dem chaama kama, Yobab waai ale ka Moosis chee la ŋaaŋbisaŋa, ale ti wa viuku a moata ti kpiemu ale bo Zaanannim a moata Kedes la.
12Ase ba le ga weeni Sisera ayen Barak Abinoam biika a jueli Tabor Guuku zuk la, 13Sisera yaa tigsi wa kuta torokoba kobsaneok ale nuruma meena ale bo ale wa a nyini Yaroset Yaggoyim a ta ga paari Kison Benaŋka.
14Debora yaa weeni Barak ayen, <<Cheŋ danni ale nna ate Naawen ale pai Sisera a nyo fi nisima po. Yaa Naawen an dɛ fi niŋŋa?>> Ate Barak a yaa nyini Tabor Guuku zuk a siŋ ate nuruba tusa pi (10,000) a vi wa ŋaaŋ. 15Ase Barak ale kasim a jueli ba zuk la, Naawen yaa basi ate yɔgsum a yik Sisera ale wa tugurik tɔŋdɔba ate Sisera a basi ba torokowa ale chali naŋtabie. 16Alege Barak a vi ba torokoma ale tugurik tɔŋdɔma a paari Yaroset Yaggoyim. Sisera tommu meena ba jam ko ba kama ale gebik, nuru yeŋ mɛ la an tali ya.
17Sisera a jam chali ka naŋtabie a cheŋ Jael viuku Ken denɔwa Ɛba pok ale la, dii nyiŋla nyemagsika ale jam bo Jabin Yazor naawa ale Ken denɔwa buuni suŋsuŋ.
18Jael yaa nyini tu Sisera a weeni wa ayen, <<Jam m nyɔnɔ, jam jo. Kan chali yɔgsummoa.>> Ate wa yaa jo nipowa viuku po ate nipowa a pai wa suk.
19Wa weeni ayen, <<Nyanyuila ale ta mu.>> Mi a saalim te mu nyiam.>> Wa yaa lak bunlɔk ale biisim a te ate wa nyu ale ŋman pai wa a suk.
20Sisera yaa weeni nipowa ayen, <<Zaani viuku nansuiŋku nɔi.>> <<Ase waai a dan jam bek fu ayen, nuru a bo dela?>> Weeni ayen, <<Aaya.>>
21Alege Jael Ɛba powa a yaa pai viuku kpaasini le janakferim a cheŋ wa jigi nna diki alege wa jiak a doa. Nipowa pai kpaasini a nak feri wa ponni a vuri paari tɛŋka ate wa kpi.
22Barak yaa jam vi Sisera ŋaaŋ ate Jael yaa tu wa. Wa weeni ayen, <<Jam.>> <<M le dak nuru waai ate fi a gisi la a sak fu.>> Wa yaa va wa jo ga a paari la ale ka viuk kpaasiri ale feri wa ponni ate wa kpi doa.
23Dai dila danni Wen a pai Jabin Keenan naawa a te Izirali demma. 24Izirali demma a yaa ŋmasi nya pagrim nna yegayega Jabin Keenan naawa zuk a ga paari diipo ate ba ko wa la.
Currently Selected:
Niŋdeerɔba 4: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation