Niŋdeerɔba 18
18
1Da ŋala po Izirali a jam ka naaba. Da ŋala powa mɛ Dan dɔkku buuni a jam diem a gisi ka badek jigi ayen ba kali, dii nyiŋla ba an diem jam nya charuk Izirali buuni po. 2Dila Dan demma a yaa jam tom kpaliŋ nyeerisa banu a nyini Zoraya ale Estaol ayen ba kpesi nya tɛŋka. Nuruma de a jam za ka ba yezuimaŋa meena naŋkula po. Ba jam weeni ba ayen, <<Ni cheŋ ga kpesi nya tɛŋka.>> Nidoama yaa jam jo Ɛfraim tɛŋka ate guuta a bo ka po la a jam paari Maika yenni, dula ate ba jam goa. 3Ase ba le jam moata Maika yenni la, ba yaa miŋ Livai nidoa paalika lueluku, dila ba yaa mobi jo dula a bek wa ayen, <<Ka wana ale ta fi a jam dela? Ka boa ate fi a nye dela? Boan nyiŋ ate fi bo dela?
4Wa yaa weeni ba Maika ale nye dii a te wa la, wa weeni ayen, <<Wa pa mu kama a tuni mu ate mi chim wa kaabteerɔ.>>
5Ate ba weeni wa ayen, <<Ti a saalim kpesi bek Wen a nya ase ti chelimu ale cheŋ nalimnyiini ya.>>
6Kaabteerɔwa yaa tulisi ba ayen, <<Ni cheŋ ale suiyɔgni. Naawen a seba ni chelimu nɔi po kama.>>
7Dila nidoaba banuwa yaa basi dula ale jam Lais, dula ate ba yaa nya ale nuruma a boro ka fasiyaa, ase Saidon demma la, ba boro ale ka suiyɔgni ale boro boka dek. Ase ba tɛŋka ale kan jam a silim la, ba jam jigsi kama. Ba ŋman yalima kama ale Saidon demma, ale ka wari ale waai ya.
8Ase ba le ŋman jam Zoraya ale Estaol tɛŋsaŋa la, ba suataŋa yaa bek ba ayen, <<Nama nya wie ka sɛ?>>
9Ate ba tulisi ayen, <<Ni jam ate ti nye kpaliŋ ale ba, tama ale nya la tɛŋka a ŋmasi nala kama. Ni kan yaa ni nye wari ya? Ni kan beni ale ka ga tuesi ka. 10Ni dam paari dula, ni le nya nuru baai ate ni zɛ ba wari la ale tɛŋ kaai ale lagri ate Wen a pa nyo ni nisima po, tɛŋ kaai ale kaa silim jaab la.>>
11Ate nidoaba kobsiyuebi a nyini Dan yezukku a gomsi magsi kpaliŋ, a nyini Zoraya ale Estaol. 12A nyini dula, ba yaa jam kala moata ka Kiriat Jearim ale bo Juda po la. Kude nyiŋ ale soa ate jigi dii ale bo Kiriat Jearim yeniŋ geŋsa la yuei a te ayen Mayane Dan a jam paari jinla de la. 13A nyini dula ba jam cheŋ ka Ɛfraim tɛŋka ate guutaŋa a bo ka po la a jam Maika yenni.
14Nidoaba banuwa baai ale ga kpesi nya Lais tɛŋka la yaa weeni ba suataŋa ayen, <<Nama a seba ayen yeeŋa de dinyi a ta ka garuk geli, wena gela, a peesi ŋanta ase jameem la ale kutuk bɔgluwa? Yɔgyɔgla de ni seba ni le ni nye diila kama.>> 15Dila ba yaa viriŋ cheŋ Livaiwa nidoa paalika yenni ale bo Maika jigini la a puusi wa. 16Nidoaba kobsiyuebiwa ale nyini Dan demma po, a gomsi magsi kpaliŋka la, a yaa jam zaani nansuiŋku nɔi. 17Nidoaba banuwa baai ale ga kpesi nya tɛŋka la yaa jo a pai jameemmu ale garuk genni ale wena gela ale kutuk bɔgluk alege ate kaabteerɔwa ale nidoaba kobsiyuebiwa ale gomsi a magsi kpaliŋ la a jam za nansuiŋku nɔi.
18Ase nidoama de ale jam jo Maika yenni po a pai jameemmu ale garuk genni ale wena gela ale kutuk bɔglukku la, kaabteerɔwa yaa weeni ba ayen, <<Ka boa ale la ate ni a nye?>>
19Ba yaa tulisi wa ayen, <<Nye diki, kan weeni wari ya. Va ti a jam, chim ti ko ale ti kaabteerɔ. Fi a dan tom a te Izirali buuni ale yezuk ase kaabteerɔ la a zunchoŋ fi le tom a te nuru yeŋ dɔkdemma kama la?>> 20Kaabteerɔwa sui yaa jam peenti. Ate wa yaa pa garuk genni ale wena gela, ŋan mɛɛntaŋa a va nuruma a cheŋ. 21Ba yaa piilim ba chelimu ŋmana, ate ba bi fiisaŋa ale ba duŋsaŋa ale ba ŋantaŋa meena a jam de ba niŋ.
22Ase ba le cheŋ ate ku yalima magadek ale Maika yenni la, nidoama baai ale jam kala moata Maika yenni la, ba jam wi ba ka jigi yeŋ ate ba cheŋ paari Dan demma. 23Ase ba le na a vi ba la, Dan demma yaa viriŋ weeni Maika ayen, <<Ka fi wanni ale boa ate fi nidoama ayen ba nye kpaliŋ ale ti?>>
24Wa yaa tulisi ayen, <<Fi pa wenaŋa ate mi nye la, ale m kaabteerɔwa a ta cheŋ. Ka boa ate mi a ŋman tara? Fi ale nye ka sɛ a bek ayen di nya mu ka be?>>
25Ate Dan demma a yaa tulisi ayen, <<Kan nak nanpaga ale ti, fi dan nye dila nidoa baai sue ale kaa daliŋ puurika la ale nye kpaliŋ ale fu ate fi ale fi dɔkdemma ale jɔk ni nyuvooŋa.>> 26Dila Dan demma yaa cheŋ, ase Maika ale nya ale ba ŋmasi pagra gaam wa la, wa yaa ŋman kuli yeri.
27Ba yaa jam pai Maika ale nye ŋan baai la ale wa kaabteerɔwa a cheŋ Lais a ga tu chaab ale suiyɔgni nuru baai ate ba zɛ ba nɔi po la. Ba jam nye ka kpaliŋ ale ba ale ju ba tɛŋka. 28Waai a jam karo a vari ba a basi dii nyiŋla ba jam yalima kama ale Saidon demma ale kan jam a nye ale nuruba ba chaaba. Tɛŋ kpieŋka a jam bo ka viak po moata Bet Areyob. Dan demma a ŋman jam se tɛŋ kpieŋka kama a bo ka po. 29Ba jam te ka yuei ayen ka Dan, ka ba kokpieŋka yuei ate ba pai te ka, waai ale ka Izirali nidoabili la. Tɛŋ kpieŋka yuei kpakka jam le Lais. 30Dula jigini Dan demma a jam se ka bɔgta a te badek, ate Gersom nidoabinni Jonatan, Manasa ŋaaŋbiika ale wa nidoabilisaŋa a jam ka kaabteerɔba ate Dan dɔkku buuni a ta ga paari diipo ate ba chim yɔm tɛŋka po la. 31Ba diem jam a kaab bɔgluk tii ate Maika a jam se la kama diipo meena ate Wen yenni a diem jam bo Siilo po la.
Currently Selected:
Niŋdeerɔba 18: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
