Niŋdeerɔba 17
17
1Yɔgyɔgla de nuru, wa yuei a jam le Maika a nyini Ɛfraim tɛŋka ate guuta a bo ka po la, 2a yaa weeni wa mawa ayen, <<Kpana ligbie tusidi ale kook (1,100) ate ba tuesi fi jigi ate dila a basi ate fi ka kikaasa la, ŋa boka mi jigi, ka mi ale pai ŋa.>> Ate wa mawa yaa weeni ayen, <<Naawen a niak fu m nidoabili yaa.>> 3Ase wa le ŋman pilim pai kpana ligbie tusidi ale kook (1,100) a te wa mawa la, wa weeni ayen, <<Mi pa kpanaŋa de a te Naawen m nidoabinni nyiŋ ate wa nye jameem ale bɔgluk. Mi ale pilim pa ku a te fu.>>
4Wa le ta ligraŋa a ŋman ga te wa mawa la, wa yaa gaari kpana ligbie kobsiye a te choabiik ate wa kuri ŋa a nye jameem ale bɔgluk. Ate ba pa ti a zaani Maika yenni po. 5Maika wade a jam ta ka tangbain a nye garuk geli ale bɔgta a bobi wa nidoabilisaŋa wanyi ase kaabteerɔ la. 6Da ŋala po Izirali demma a jam ka naaba. Waai meena a jam a nye ka wa ale a yaali diila.
7Livai bi paalik ale jam nyini Betiliyem ale bo Juda po la, waai ale jam bo Juda yezukku po la, 8yaa basi tɛŋ kpieŋka ale a gisi jigi ayen wa boro. Wa le bo suiku po a cheŋ la, wa yaa paari Maika yenni ale bo Ɛfraim tɛŋka ate guutaŋa a bo ka po la.
9Maika yaa bek wa ayen, <<Fi nyini ka be? Ate wa mɛ a tulisi ayen, <<Mi ka Livai a nyini Betiliyem ale bo Juda po la, mi a gisi ka jigi ayen m boro.>>
10Maika yaa weeni wa ayen, <<Boro ale mi a chim m ko ale m kaabteerɔ, ate mi a te fi kpana ligbie pi bein meena, fi gatta ale ŋandiinta mi ale nya dila zuk. 11Ate Livaiwa yaa siak a boro ale wa. Nidoa paalika de a jam boro kama ase nuruwa dek nidoabili la. 12Maika a sum jam basi ate Livaiwa de a chim ka wa kaabteerɔ ale bo wa yenni po. 13Ate Maika a weeni ayen, <<Mi seba ayen Naawen a nala kama a te mi, Livaiwa ale chim m kaabteerɔ la nyiŋ.>>
Currently Selected:
Niŋdeerɔba 17: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
