Niŋdeerɔba 19
19
1Da ŋala po Izirali a jam ka naaba. Yɔgyɔgla de ka Livai waai ale jam bo niŋniŋ Ɛfraim tɛŋka ate guuta a bo ka po la, ale jam ta nipok a nyini Betiliyem ale bo Juda po la a jam ayen wa boro ale wa. 2Alege wa jam ka wensie ale wa. Nipowa a jam basi wa kama ale nyini ga bo wa kowa yenni ale Betiliyem ale bo Juda po la. Wa le jam bo dula paari chiisa sinaansi ŋaaŋnyiŋ la, 3wa chorɔwa a jam saŋ wa ŋaaŋ kama ayen wa ta wa a kuli. Nidoawa a jam ta ka wa tomteerɔ ale bonsa siye a cheŋ. Nipowa yaa ta wa a jo wa kowa yenni po. Ase wa ŋachobwa ale nya wa la, wa sui yaa peenti nna yegayega ate wa tuesi wa nalimnyiini. 4Wa ŋachobwa, nipowa kowa yaa weeni wa ayen wa goa, dila wa yaa jam bo dula a paari daa ŋata a dɛ ale a nyu a goa paari daa ŋata.
5Daa ŋanaansiwa danni wa yaa zue yiti gomsi ayen wa kuli, alege nipowa kowa a weeni wa chicham biika ayen, <<Wa limisi ate ba yaa nyiam ate wa nyu abe wa kuli.>> 6Dila ba nɔi bayema a yaa kali ba dɛ abe ba nyu ale chaab. Dila ŋaaŋnyiŋ nipowa kowa a ŋman weeni wa ayen, <<Jianje goa dela yokku a dɛ masim.>> 7Nuruwa ale yiti wa kuli la, wa ŋachobwa a diem va wa kama ayen wa goa, ate wa ŋman goa yok kula. 8Saluik daa ŋanuwa danni, ase nuruwa ale yiti wa cheŋ la, nipowa kowa ayen yɔgli fidek. <<A limisi ate ku paari kantueŋ.>> Dila ba nɔi bayema a ŋman dɛ ale chaab.
9Ase nidoawa ale wa powa ale wa tomteerɔwa ale yiti ba kuli la, wa ŋachobwa nipowa kowa yaa weeni ayen, <<Yɔgyɔgla de nya ku boro a paari ka junɔi. Goa dela yokku de ale vanni a moata ka veentika, ni goa dela a dɛ masim ale chaab. Chum saluik yokyokwa abe ni yaa yiti a lo suik po a kuli.>> 10Alege ba le kaa yaali ba ŋman goa yok ku choa la, nidoama a yaa nyini a duŋ Jebus nyiŋ, Jerusalem ale la, ale wa bonduensa siyewa ale wa powa.
11Ase ba le ga moata Jebus ale vanni a moata veenti ka la, tomteerɔwa yaa weeni wa kpagni ayen <<Jam basi ate ti goa Jebus demma de tɛŋka po.>>
12Ate wa kpagni a tulisi ayen, <<Aaya, ti kan jo tɛŋ chaŋ po nuru baai ale kan daa Izirali dem la tɛŋ po. Ti le cheŋ ka Gibea tɛŋka.>> 13Wa ŋman weeni a gum du ayen ni jam ate ti paari Gibea yaase Arama a goa tɛŋsaŋa de kanyi po.>> 14Dila ba yaa jam a cheŋ, wenbinni a jam boro a siŋ kama ase ba le moata Gibea ale bo Benjamin po la. 15Ba yaa jam goa dula yok kula. Ba jam ga kala ka tɛŋ kpieŋka peelimmu po, alege waai an jam ta ba a kuli wa yeri ayen ba goa.
16Junɔi dila nisɔmma ale nyini Ɛfraim tɛŋka ate guuta a bo ka po la, waai ale jam bo Gibea po la. Nuru baai ale jam bo dula la ka Benjamin dem, a nyini talim tuima jigi a jam. 17Wa le nya nyeendɔma ale ba kala tɛŋ kpieŋka peelimmu po la, nisɔmawa yaa bek ba ayen, <<Nama a cheŋ ka bɛ? Ni abe nyini ka bɛ?>>
18Wa yaa tulisi ayen, <<Ti nyini ka Betiliyem ale bo Juda po la a cheŋ tɛŋ kpaŋ ale bo Ɛfraim ate guuta a bo ka po la juijui ate mi a boro la. Mi jam bo ka Betiliyem ale bo Juda po la, yɔgyɔgla de mi cheŋ ka Naawen yenni. Waai an jam ta mi a kuli wa yeri ya. 19Ti nɔi tiyema a ta ŋandiinta a magsi ti bonsaŋa dɛka kama. Tama a ta ŋandiinta ale daam a magsi tidek, fi tomteerɔwa mi ale fi nipokbili tomteerɔwa nidoabili paalika ale va ti la. Ti kan yaali jaaboa.>>
20<<Mi a nye fi tia fi le jam m yenni la,>> ate nisɔmawa a yaa weeni ayen, <<Basi ate mi a te ni jaabuui meena ate fi a yaali la kan goa peelimmu po.>> 21Dila wa yaa ta wa a jo wa yenni po a te wa bonsaŋa ŋandiinta. Ba le sugri ba naŋsaŋa a nueri la, ba yaa dɛ ŋandiinta ale nyu.
22Ase ba le boro a dɛ la, gaasa nuruma de gela ale bo tɛŋ kpieŋka po la, a yaa jam gilim yenni. A nak tuoku ale a na nisɔmawa waai ale soa yenni la ayen, <<Ta nuruwa a nyini peelim waai ale jam fi yenni la ate ti goa ale wa.>>
23Yenni nyɔnɔwa yaa nyini peelim a weeni ba ayen, <<Aaya, m doaba. Ni kan ta gaasa dila. Ase nuruwa de ale ka mi nichaanɔ la, ni kan nye chivie wanni de. 24Nya, m lie ale nna wa zɛ nidoa ale nichaanɔwa pok ale nna. Mi ale pa ba a te ni yɔgyɔgla de, ate ni nye ba dii meena ate ni a yaali la. Alege nuruwa de ni kan nye chivieŋa de.>>
25Alege nidoama an jam wom wa. Nuruwa yaa ta wa powa, a nyini te ba ate ba fɛ goa ale wa yokku meena, ale basi wa saluik yokyok ate wa kuli. 26Vari ale veenti la nipowa yaa ŋman kuli yeri juijui ate wa kpagni a boro la, a lo doa nansuiŋku nɔi ate wenbinni pusi paari wa dula.
27Ase wa kpagni ale yiti saluiku a lak yenni tuoku a nyini wa cheŋ la, dula ale wa powa a doa, a lo doa yenni tuoku nɔi, ate wa nisaŋa a vi gaam joka jigini. 28Ate wa weeni wa ayen, <<Yiti ŋmai ate ti cheŋ,>> alege wa an tulisi ya. Ate nuruwa a yaa pa wa a kali wa bonika zuk a duŋ yeri.
29Wa le jam paari yeri la, wa yaa pa gebik a gebi wa powa bunabuna a paari pi ale buye a ta cheŋ gilim Izirali kabtaŋa meena. 30Waai meena ale jam nya dila la a weeni kama ayen, <<Ba an nya wanni de choa yaase wanni de choa a nye ya a nyini diipo ate Izirali demma a nyini Ejipiti po a nyini la. Ni poli di zuk, ni kpesi nya di, a weeni ti le ti nye diila.>>
Currently Selected:
Niŋdeerɔba 19: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
