Niŋdeerɔba 11
11
1Jepeta Gilead denɔwa jam ka tugurik tɔŋdɔ pagrik. Wa mawa jam ka nidoa yaalik. Wa kowa jam le Gilead. 2Gilead powa mɛ a jam biak ka nidoabilisa a te wa. Ase ba le jam a pak la ba yaa yiak Jepeta a basi. Ba jam weeni kama ayen, <<Fi kan nya nitalim a ta nyini ti dɔkdemma po dii nyiŋla fi ka nipok yoŋ nidoabili.>> 3Dila Jepeta yaa jam chali nyini wa suataŋa jigi a ga kali Tob tɛŋka po, juijui ate nuru kayaata a kala gilim wa a yaa va wa.
4Ku ale beni maga dek la Ammon demma ale jam nye kpaliŋ ale Izirali demma. 5Ase Ammon demma ale siti Gilead nisɔmma la, ba yaa cheŋ Tob tɛŋka ayen ba yik Jepeta. 6Ba Jam weeni wa kama ayen, <<Jam de ti niŋ ate ti nye kpaliŋ ale Ammon demma.>>
7Jepeta yaa weeni ba ayen, <<Daa nama ale kisi mi a yiak mi m kowa yenni po la? Ka boa ate ni cheena mi jigi yɔgyɔgla, diipo ate ni bo daanika po la?>> 8Gilead nisɔmma yaa tulisi ayen, <<Ku dan poom ka dii ya, ti tulim a jam ka fi jigi yɔgyɔgla de. Jam ate ti cheŋ a ga nye kpaliŋ ale Ammon demma, ate fi ale chim ti niŋdeerɔ a nya baai meena ale bo Gilead po la.>> 9Jepeta yaa tulisi ayen, <<Ase nama a dan ta mi a ŋmani ayen m kpaliŋ ale Ammon demma, ate Naawen a pai ba a te mi, mi ale sum chim ni niŋdeerɔ?>>
10Ate Gilead nisɔmma yaa tulisi ayen, <<Naawen ale tama seerɔ, tama ale nye fi le weeni diila.>> 11Dila Jepeta yaa va Gilead nisɔmma a cheŋ ate nuruma a nye wa niŋdeerɔ ale kpaliŋka niŋdeerɔ. Ate wa ŋman pilim biisi wa wie ŋaai dek ate wa liŋ biisi Naawen niŋ la Mizpa tɛŋka po la.
12Jepeta yaa tom nuruba Ammon naawa ale bega ayen, <<Ka boan wari ate fi ta ale tama ate fi a siti ti tɛŋka?>> 13Ate Ammon naawa yaa tulisi Jepeta nuruma ayen, <<Izirali demma ale jam basi Ejipiti tɛŋka la, ba jam tuesi ka m tɛŋka a nyini Arnon benni a ga paari Jabbok benni, a ta dila a ga paari Jodan benni. Yɔgyɔgla ŋman pai te ti ale suiyɔgni.>>
14Jepeta ŋman tom nuruba Ammon naawa jigi ayen, 15<<Jepeta ale weeni diila ale nna. Izirali demma an vari Moab yaase Ammon tɛŋsaŋa kanyi mɛ. 16Ba le nyini Ejipiti la ba cheŋ va ka gɔnni po a ga paari Nyakpiem Mɔnuŋku a taam cheŋ Kades. 17Izirali demma yaa tom nuruba Edom naawa jigi ayen, te ti suik ate tama a va fi tɛŋka po a taam, alege Edom naawa an wom ba. Ba maa cheŋ Moab naawa jigi ate wa mɛ a zɛri. Dila nyiŋ Izirali demma jam bo ka Kades.
18<<Ba yaa cheŋ va gɔnni po, a gilim Edom ale Moab tɛŋsaŋa, a sali va Moab tɛŋka kori geŋ, a ga kali vuusi maga Arnon benni kauk kunkula. Ba an jam jo Moab tɛŋ banni po, dii nyiŋla ka Arnon benni ale jam chim ka banni. 19Izirali demma a ŋman tom nuruba Siyon Amori demma naawa jigi, waai ale jam a nya Yesbon la zuk ayen, Basi ate tama a va fi tɛŋka po a taam tidek jigini. 20Siyon a jam ka siaka ale Izirali demma alege ka ba va wa tɛŋka po taam. Wa jam basi ate wa nuruma a tigsi ka chaab Jayaz a nye kpaliŋ ale Izirali demma.
21<<Ate Naawen, Izirali Wenni yaa pai naab Siyon ale wa nuruma meena a nyo Izirali demma nisima po ate ba nak dɛ ba. Izirali demma yaa tuesi Amori demma tɛŋsaŋa meena, 22a nya pagrim ba meena ale bo Arnon benni la a ga paari Jabbok benni a nyini gɔnni a ga paari Jodan Benni.
23<<Naawen, Izirali Wenni a yiak Amori demma a basi a te Izirali demma kama, ka wana ale ta suik a baga a tuesi ka ba jigi ya? 24Fi wenni Chemos a dan te fu jaab fi baga a ta kama. Ku ka dila mɛ Naawen ti Wenni ale a te ti jabuui la, ti le soa. 25Fi zunchoŋ Zippor biika Belak Moab naawa kama? Wa an jam poom nye kpaliŋ ale Izirali demma. 26Bena kobsita ate Izirali demma a jam bo Yesbon ale Aroer ale tɛŋ sii meena ale gilim si la po. Ka boa ate nama an ŋman tuesi si da ŋala po? 27Mi an nye kaasi ni, alege nama a nye a kaasi mi a nye kpaliŋ ale mu. Basi ate Naawen Boteerɔwa a nya wanni de zuk a te Izirali ale Ammon demma.>>
28Ammon naawa an jam wom Jepeta ale tom weeni wa diila.
29Ate Naawen Chiika yaa jam Jepeta jigi. Ate Jepeta jam va Gilead ale Manasa tɛŋsaŋa po a taam ga va Mizpa ale bo Gilead po la, a nyini dula wa gum du a cheŋ wa chaab ale Ammon demma. 30Jepeta yaa jam puulim ale Naawen ayen, <<Fi dan pai Ammon demma a nyo m nisima po, 31jabuui meena ale nyini m yenni po a tu mu ase m nin nak de Ammon demma a ŋman cheen yeri la, ka Naawen ale soa, m le pai jabula kaabi ase juka tiirim la a te fu.>>
32Jepeta yaa ga nye kpaliŋ ale Ammon demma ate Naawen a pai ba nyo wa nisima po. 33Wa jam kaasi ka tɛŋsa pisiye a nyini Aroer a ga paari Minnit a ta dila ga paari Abel Keramim. Dila Izirali yaa nya pagrim Ammon zuk.
34Jepeta ale pilim ŋman tuak wa yenni Mizpa la, waai ale nyini tu wa la ka wa lie, a gɔk a magsi chaab ale sinyaara yegsika. Wa biik meena jam le la. Dan kan daa wa la la, wa jam ka nidoabili yaase lie. 35Ase wa le nya wa liewa la, wa yaa dari wa gattaŋa a cheeri ale kaari ayen, <<M dek lie fi nye ate ku daani mu dii nyiŋla mi nye ka pumpuulima ale Naawen waai ate mi an baga a zɛri ale kan nye.>>
36Wa liewa yaa tulisi ayen, <<M koa fi weeni fi wanni a te Naawen kama. Nye mu ase fi ale puulim diila, Naawen a basi ate fi nya pagrim fi dachaasaŋa Ammon demma zuk kama.>> 37Wa yaa weeni wa kowa ayen, <<Alege te mu suik ate m bek wayeŋ ka de, te mu chiisa siye ate m nyiem tɛŋ sii ale bo guutaŋa zuima la a kum ale m doama dii nyiŋla mi a kan yali nya.>>
38Kowa yaa tulisi liewa ayen, <<Fi baga a cheŋ kama.>> Ate wa yaa cheŋ ate wa ale nipokbilisaŋa yaa bo tɛŋ sii ale bo guutaŋa zuk la yaa jam a kum dii nyiŋla wa kan a yali nya. 39Chiisa siye ale paari la wa yaa ŋmani kuli wa kowa jigi ate wa nye wa ase wa le puulim diila. Wa diem jam zɛ nidoa. Ku nyini ka dela ate Izirali ate ku bo Izirali ŋiak wieŋa 40po ayen, ben meena Izirali nipokbilisaŋa a nyini peelim daa ŋanaansi a teeri Gilead denɔwa Jepeta liewa wari.
Currently Selected:
Niŋdeerɔba 11: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
