Niŋdeerɔba 10
10
1Abimelek daaŋa ŋaaŋnyiŋ, nuru ale nyini Isaka dɔkku, wa yuei ale Tola, Pua nidoabinni ate Dodo chim wa ko kpieŋ la. Tola yaa yiti ayen wa vari Izirali a basi. Wa jam bo ka Samir po, Ɛfraim ate guuta a bo ka po la. 2Wa jam dɛ Izirali demma niŋ ka bena pisiye ale ŋata ale kpi ate ba gu wa Samir po.
3Wa jam basi ate ka Jair ale nyini Gilead la a va wa, waai ale jam de Izirali demma niŋ a paari bena pisiye ale ŋaye la. 4Wa jam ta ka nidoabilisa pisita baai ale jam a do bonsa pisita. Ba jam a nya ka tɛŋsa pisita zuk Gilead po sii ate jinla ba a wi ayen Yavvot Jair la. 5Jair ale jam kpi la, ba jam gu wa ka Kamon po.
6Izirali demma a ŋman jam nye ka biem Naawen nimbie po. Ba jam va ka Baal ale Astoret ale Araam demma ale Saidon demma ale Moab demma ale Ammon demma ale Filistia demma wenaŋa. Izirali demma ale jam zɛri Naawen ale an ŋman tom a te wa la nyiŋ. 7Wa sui yaa jam puuri ale ba. Ate wa pai ba a nyo Filistia demma ale Ammon demma nisa po, 8baai ale jam namsi ba ale ŋɔriŋ ba. Bena pi ale naaniŋ, ba jam namsi Izirali demma meena ale bo Jodan ate ka bo Gilead po la kori geŋsa Amori demma tɛŋka po. 9Ammon demma a jam lo Jodan beni a jueli a nye kpaliŋ ale Juda ale Benjamin ale Ɛfraim yenni demma ate Izirali a jam bo daanika yegayega po. 10Ate Izirali demma a jam kaari a te Naawen ayen, <<Tama nye ka biem a kaasi fu, a zɛri ti Wenni ale tom a te Baal bɔgtaŋa.>>
11Naawen yaa tulisi ayen, <<Ejipiti ale Amori ale Ammon ale Filistia 12ale Saidon ale Amalek ale Maon demma ale jam a namsi ni la ate ni kum te mi a yaali maarika la, mi an jam vari ni a ta nyini ba nisa po a basi ya? 13Alege ni jam zɛri mi kama ale va bɔgluk yoŋta, dila mi a kan ŋman vari ni a basi. 14Ni cheŋ a ga kaari a te bɔgluk tii ate ni lueri la. Ni basi ate ŋala a vari ni a basi diipo ate ni bo daanika po la.
15Alege Izirali demma a weeni Naawen ayen, <<Tama a nye ka biem. Nye ti dii ate fi a poli ayen ku nala la, alege ti a saalim vari ti a basi yɔgyɔgla.>> 16Ate ba yaa kpiti bɔgluk chaŋsaŋa a basi ale tom a te Naawen. Wa an jam bag a ta niniŋŋa ŋmana.
17Ase ba le jam wi Ammon demma ayen ba gomsi badek ate ba ga tigsi Gilead la, Izirali demma a jam tigsi bo ka Mizpa. 18Gilead nuruma niŋdeerɔma a yaa weeni chaab ayen, <<Nuru waai ale wade niŋ a siti Ammon demma la, ale wa chim kpagi baai meena ale bo Gilead po la zuk.>>
Currently Selected:
Niŋdeerɔba 10: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
