Niŋdeerɔba 12
12
1Ɛfraim nuruma yaa wi ba tugurik tɔŋdɔma a ga va Zafon a weeni Jepeta ayen, <<Ka boa ate fi ga nye kpaliŋ ale Ammon alege an wi tama ayen ti va fu cheŋ? Ti za ti ju ka fi yenni a lɔnsi fi zuk.>>
2Jepeta yaa tulisi ba ayen, <<Mi ale m nuruma a jam bo ka gigelik kpieŋ po ale Ammon demma, mi wi kama alege nama an vari mu ba nisima po a basi ya. 3Mi ale nya ni kan maari la, mi yaa pai m nyuvunni a da a lo jueli a ga nye kpaliŋ ale Ammon demma ate Naawen a pai ba nyo m nisima po. Ka boa ate nama a jam jinla de a yaa ni nye kpaliŋ ale mi?>>
4Jepeta yaa wi Gilead nuruma meena ate ba tigsi chaab a nye kpaliŋ ale Ɛfraim demma. Gilead demma a jam ko ba, dii nyiŋla Ɛfraim demma a jam weeni kama ayen, <<Nama Gilead demma ka baai ate Ɛfraim ale Manasa a jɛ basi.>> 5Gilead demma jam nya pagrim suik kpeŋŋi ale nyini Jodan Benni po a taam Ɛfraim la. Diipo meena Ɛfraim a dan weeni ayen, <<Basi ate ti lo jueli.>> Gilead demma a nyiem bek kama ayen, <<Fi ka Ɛfraim denɔ?>> Wa dan tulisi ayen, <<Aaya.>> 6Ba yaa weeni ayen ku nala, be weeni ayen, <<Sɛyɛbbolet.>> Wa dan weeni ayen, <<Sibbolet,>> Dii nyiŋla wa an baga a wi wanni nalimnyiini, ba yaa yik wa a ko suik kpeŋni ale lo Jodan benni a jueli la. Ɛfraim demma tusa pisinaansi ale ŋaye (42,000) ate ba jam ko.
7Jepeta jam nya Izirali tɛŋka zuk a paari ka bena ŋayuebi. Gilead denɔwa Jepeta yaa kpi ate ba gu wa tɛŋ kanyi Gilead po.
8Wa ale kpi la ŋaaŋnyiŋ, Betiliyem denɔwa Ibzan ale jaa nya Izirali zuk. 9Wa jam ta ka nidoabilisa pisita ale lieba pisita. Wa jam pai wa liema a yalisi ka baai ale kan nyini wa buuni po la, ale faari tɛŋ sii ale kan daa wa buuni po la lieba a te wa nidoabilisa pisitawa meena. Ibzan jam nya Izirali zuk ka bena ŋayopɔi. 10Ate Ibzan a kpi ate ba gu wa Betiliyem po.
11Wa la ŋaaŋnyiŋ ka Zebulun denɔwa Elon ale jam ŋma a nya Izirali tɛŋka zuk a paari bena pi. 12Elon mɛ a jam kpi kama ate ba gu wa Aijalon ale bo Zebulun po la.
13Wa mɛ ŋaaŋnyiŋ ka Yillel nidoabinni Abdon ale nyini Piraton la ale ŋman jaa nya Izirali tɛŋka zuk. 14Wa jam ta ka nidoabilisa pisinaansi ale ŋaaŋsa pisita baai ale jam a do bonsa pisiyopɔi. Wa nya Izirali zuk ka bena naaniŋ. 15Yillel nidoabinni Abdon yaa jam kpi ate ba gu wa Piraton ale bo Ɛfraim tɛŋka ale bo guuku zuk ate ba a wi ayen Amalek demma tɛŋ la.
Currently Selected:
Niŋdeerɔba 12: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
