Niŋdeerɔba 9

1Abimelek Jerub Baal biika yaa cheŋ wa mawa suataŋa ale bo Sikiim la jigi a weeni ba ale wa mawa yezukku meena, ayen, 2<<Bek Sikiim demma meena ayen, <<Ka din ale zunchoŋ a te fu. Ka Jerub Baal nidoabilisa pisiyopɔiwa a nya ni zuk yaase nuru yeŋ a nya ni zuwa? Ni teeri mi ka ni nyiŋ lam ale ni ziim.>>

3Ase wa suataŋa ale ŋman pilim weeni kude meena a te Sikiim demma meena la, ba yaa jam siak ayen ba va Abimelek, ba weeni ayen wa ka ti suok. 4Ba jam te wa ka kpana ligbie dobrim a paari pisiyopɔi a ta nyini Baal Berit puusika yenni po, ate Abimelek a pai a da tugurik tɔŋdɔba, baai yaa le jam chim wa ŋaaŋviirɔba. 5Wa jam cheŋ wa kowa yenni ale bo Ofra la po, a ko wa suataŋa Jerub Baal bisa pisiyopɔiwa tintain yeŋ zuk. Alege Jotam Jerub Baal bi baaŋka a jam suk kama wa an nya wala. 6Ate Sikiim demma ale Bet Millo demma meena a yaa tigsi chaab a bo tiib kpiemu ale bo Sikiim la ayen ba bobi Abimelek naab.

7Ase Jotam ale jam wom kude la, wa yaa jueli Gerizim Guuku zuk a na ba ayen, <<Ni wom mi Sikiim demma, ate Wen a wom ni. 8Dai yeŋ ate tiisa a cheŋ si bobi naab a te sidek. Si yaa jam weeni kpaam tiimu ayen, <<Chim ti naab.>>

9<<Alege ate kpaam tiimu a tulisi ayen, <<Mi a basi m kpaamu buui nyiŋ ate wena ale nuruba a ta zula la abe m bo tiisa zuk a yugi?>> 10<<Tiisaŋa a yaa ŋman weeni kiŋkaŋka ayen, <<Jam chim ti naab.>>

11Alege ate kiŋkaŋka a tulisi ayen, <<Mi a basi m yɔnaŋa ŋaai ale masa la abe m bo tiisa zuk a yugi?>> 12Ate tiisaŋa yaa weeni tunuku ayen, <<Jam chim ti naab.>>

13Alege ate tunuku a tulisi ayen, <<Mi a basi m daamu, buui nyiŋ ate wena ale nuruba a mariŋ badek la abe m bo tiisa zuk a yugi?>>

14Kpeglimka tiisaŋa meena a yaa weeni kangbegini ayen, <<Jam a chim ti naab.>>

15<<Kangbegini a yaa weeni tiisaŋa ayen, <Ase ni dan sum a yaali ayen ni bobi mi naab ate mi a nya ni zuk, ni be jam a suk mi yɔgsummu po, alege kan daa di, bolim abe nyini kangbegini po a de Lebanon nyunyoŋtaŋa meena.>>

16<<Yɔgyɔgla de ase nama a dan nye ka zula nyeela ale wensie maŋsa a bobi Abimelek naab, ale nye Jerub Baal ale wa dɔkdemma a magsi, ase ni dan poom nye wa ka dii ale magsi wa la, 17ale poli ayen m kowa a jam kpaliŋ a te ni, wa an kpaliŋ wa nyuvunni nyiŋŋa, a vari ni a ta nyini Midian demma nisima po a basi, 18alege jinla ni ta ka chaab ale mi kowa dɔkdemma, a ko wa nidoabilisa pisiyopɔiwa tintain yeŋ zuk ale bobi Abimelek wa nipokbili yɔmawa biika, naab ate wa nya Sikiim demma zuk dii nyiŋla wa ka ni suok la nyiŋ, 19ase ni dam poom nye ka zula ale wensie nyeela a te Jerub Baal ale wa dɔkdemma jinla, Abimelek ate le chim ni mariŋka abe nama mɛ a chim wa mariŋka. 20Alege ni a dan kan nye dila, basi ate bolim a nyini Abimelek jigi a dɛ nama Sikiim demma ale Bet Millo demma abe bu dɛ Abimelek.>>

21Jotam yaa chali ga suk Beer tɛŋka po, dii nyiŋla wa jam a chali ka yɔgsum ale wa suoku Abimelek.

22Abimelek ale jam nya Izirali tɛŋka zuk a paari bena ŋata la ŋaaŋnyiŋ, 23Wen yaa tom chichirik biok Abimelek ale Sikiim demma jigi, kaai nyeka ale jam ŋmasi toa a te Abimelek la. 24Naawen a jam nye kude kama ayen kaasuŋ kuui ate ba nye Jerub Baal a ko nidoabilisa pisiyopɔiwa la, ba ziimu ale nyini la, ayen ku chim tutuna a bo ba suoku Abimelek ale Sikiim demma zuk, baai ale jam maari wa ate wa ko wa suataŋa la. 25Ate ba zɛri wa nɔi la, Sikiim demma de yaa basi ate ka nidoaba a ga suk guuku zuk ayen ba zu waai meena ale va dula a taam la, ate kude a jo Abimelek turi.

26Gaal Ebed biika yaa va wa suoku a cheŋ Sikiim po, ate ka nuruma a pai ba sebchakka meena a basi wa jigi. 27Ba ale jam cheŋ tattaŋa po a tigsi ba yɔnaŋa a pai da la ŋaaŋnyiŋ, ba yaa jam dɛ tigi ba wenni dɔkku po. Ase ba le jam boro a dɛ ŋandiintaŋa ale a nyu la, ba yaa ka kikaasa a te Abimelek. 28Gaal Ebed biika yaa weeni ayen, <<Ka wana ale Abimelek, wana ale Sikiim ayen tama a siak a te wa? Wa daa Jerub Baal biik yaa, daa Zebul ale paasaŋ wa yaa? Tom a te Ayaamo nidoama, Sikiim kowa. Ka boa ate tama ale tom a te Abimelek? 29Nuruma de a dan va mi ale weeni diila. Mi ale ko wa. Mi ale weeni Abimelek ayen, <<Wi fi tugurik tɔŋdɔma meena.>>

30Ase Zebul tɛŋ kpieŋka niŋdeerɔwa ale wom dii ate Gaal Ebed biika a weeni la, wa sui yaa ŋmasi puuri. 31Wa yaa tom a weeni Abimelek ayen, <<Gaal Ebed biika ale wa suataŋa a jam Sikiim a choa tɛŋka ba ta chaab ale fu, 32yok fi ale fi nidoama a jam suk doa tattaŋa po a limisi. 33Saluik wenbinni pusika po, dɛ niŋ a jo tɛŋka po. Gaal ale wa nidoama a dan nyini peelim ba nye kpaliŋ ale fu, nye dii ate fi nisaŋa a baga a nye la.>>

34Dila Abimelek ale wa tommu meena a yaa nyini yok a cheŋ Sikiim a lab bunaansi a suk za. 35Yɔgyɔgla de, Gaal Ebed biika a jam nyini ka peelim a za tɛŋka nansuiŋku nɔi diipo ate Abimelek ale wa tugurik tɔŋdɔma a nyini ba sukka jigini a nyini la.

36Ase Gaal ale jam nya ba la, wa yaa weeni Zebul ayen, <<Nya nuruba ale nyini guutaŋa zuima a siŋ cheena,>> ate Zebul a tulisi ayen, <<Fi pai ka guutaŋa yisuŋtaŋa a chim nuruba.>>

37Alege Gaal a ŋman biisi ayen, <<Nya, nuruba ale nyini tɛŋka suŋsuŋ a cheena, ate tom bunyi a nyini baanɔma tiimu jigini a cheena.>>

38Ate Zebul a weeni wa ayen, <<Fi bagbiika yegayega a bo ka be yɔgyɔgla de, <Fi waai ale weeni ayen Abimelek ka wana ayen ti siak a te wa la? Daa nuruma de ate fi koosi a la la? Nyini peelim a kpaliŋ ale ba.>>

39Dila Gaal yaa jam dɛ niŋ a ta Sikiim demma a ga nye kpaliŋ ale Abimelek. 40Abimelek yaa jam vi wa, ate ba yega a lo suiku po a koani a ta ga paari nansuiŋku nɔi. 41Abimelek a jam bo ka Aruma, ate Zebul a jam yiak Gaal ale wa suataŋa ate ba nyini Sikiim po a nyini.

42Dai dii ale pasaŋ la Sikiim demma a yaa jam nyini tattaŋa po, ate kude a jo Abimelek turi. 43Dila wa yaa jam ta wa nidoama, a lab ba buta ate ba jam suk doa tattaŋa po. Ase wa le jam nya ale nuruma a nyini tɛŋka po a cheena la, wa yaa yiti wa nye kpaliŋ ale ba. 44Abimelek ale wa tommu a yaa yiti cheŋ niŋ nyiŋ nna nwuli a zaani tɛŋka nansuiŋku nɔi. Ate tommu buyewa la yaa kpabi nwuli a jueli baai ale bo tattaŋa po la zuk a ko ba. 45Dai dila meena Abimelek a jam kparinti wa tugurik tɔŋdɔma a basi ka tɛŋka zuk ate ba nya pagrim ka zuk a ko ka nuruma. Wa jam kaasi tɛŋka kama ale kati yesa a waaŋ ka zuk.

46Ase Sikiim demma ale ga wom kude la, ba yaa chali ga suk ba wenni El Berit yenni parisaŋa po. 47Ase Abimelek ale wom ayen ba jam tigsi ka dula la, 48Wa ale wa ni nidoama meena a yaa jam jueli Zalmon Guuku zuk. Wa yaa pai liak a che tiib naŋsa a vi wa ŋmankpalaŋa. Wa weeni wa nuruma ale bo wa jigi la ayen, <<Nwuli ni nye dii ate ni nya ale mi a nye la.>> 49Dila nuruma meena a yaa jam che tiib naŋsa a saŋ Abimelek ŋaaŋ. Ba jam pai si a vi ka yenni parisaŋa zuk a ju ale bolim a lik nuruma a basi du. Dila nuruma meena ale jam bo Sikiim parisaŋa po la, ase tusidi la, nidoaba ale nipooba a jam kpi kama.

50Abimelek a ŋman jam cheŋ ka Tebez a nye kpaliŋ ale ba a nak yik ka. 51Tɛŋka po, parik woŋ ale jam boro, juijui ate nidoama ale nipooma ale nuruma meena a jam chali ga suk du. Ba jam kpari badek a basi du kama a jueli bo gboŋku zuk. 52Abimelek yaa jam ga lik parik woŋka a za. Ase wa le diem cheŋ tuak parika nɔnni ayen wa ju ka ale bolim la, 53nipok yaa jam pai niri a lɔnsi wa zukku zuk a kabri wa zukobini.

54Wa nye nwuli a weeni waai ale a ji wa kpaliŋ kɔlimaŋa la ayen, <<Yeeri fi gebika a ko mu, ate dila ale basi ate ba kan weeni ayen, <Nipok ale ko wa.> >> Dila wa tomteerɔwa a yaa jam chub wa, ate wa kpi. 55Izirali demma ale jam wom ayen Abimelek a kpi la, ba yaa kuli yeri.

56Ayen Wen a ŋman pa gasii ate Abimelek a nye wa kowa, a ko wa suataŋa pisiyopɔiwa la a tuni wa. 57Wen a ŋman jam nye ate Sikiim demma a tuni ba gaasaŋa meena nyiŋ. Kika sii ale jam va Jotam Jerub Baal biika la a jam ka ba zuk.

Currently Selected:

Niŋdeerɔba 9: BWU

Highlight

Copy

Compare