Azaya 7

1Diipo ate Ayazi waai ale ka Jotam nidoabili la, ate wa ko kpieŋ a chim Yuzaya la, ate wa jam chim Juda naab la, Araam naawa Arezin ale Aremaliya nidoabinni Peka waai ale jam ka Izirali naab la, a yaa gɔk santiri a jueli ayen ba nye kpaliŋ ale Jerusalem, alege ba an jam baga a nak dɛ ka.

2Yɔgyɔgla de ba jam weeni Deevid yenni demma kama ayen, <<Araam a gum ka chaab ale Ɛfraim.>> Dila nyiŋ, Ayazi ale wa nuruma kpaziita yaa jam a nak, ase viok ale a fuk gɔi tiisa diila.

3Ate Naawen a yaa weeni Azaya ayen, <<Fi ale fi nidoabinni Sear Jasub a nyini peelim ate ni ga tu chaab ale Ayazi, ni ale nya wa beli fiika Nyiam Vuuku kpeglimka jigini, suik kuui ale a cheŋ Sugridɔ Laŋka jigini la. 4Weeni wa ayen, <Wa kpesi wadek, wa basi ate wa suinum a duak abe wa kan jɔk nyiŋbiiri da gelaŋa ale a duk nyuisaŋa la nyiŋŋa. Kan basi ate Araam naawa Arezin ale Aremaliya nidoabinni suipuurumu a te fu yɔgsummoa. 5Araam ale Ɛfraim niŋdeerɔwa Aremaliya nidoabinni a nye ba popola po kama ayen ba kaasi ni, ba weeni kama ayen, 6<<Ni basi ate ti fɛ a jo Juda tɛŋka po. Ni basi ate ti yik ka a lab a te chaab, abe ti nye Tabeel nidoabinni ate wa chim naab a nya ka zuk.>> 7Alege Nyɔnɔwa Naawen weeni kama ayen. <<Dila a kan nye, ku a kan tom tuini, 8dila nyiŋla Araam niŋdeerɔwa ale chim ka Damasikus, ate Damasikus mɛ niŋdeerɔwa ale chim ka Arezin nyiini. Bena pisiyuebi ale ŋanu po, Ɛfraim demma ale waaŋ ka chaab ate ba a kan ŋman baga a chim nuru yeŋsa. 9Ɛfraim niŋdeerɔwa ale Samaria, ate Samaria mɛ niŋdeerɔwa a chim Aremaliya nidoabinni nyiini. Fi a dan kan baga a zaani ale pagrim fi siaka po, fi poom kan ŋman baga a zaani.>>

10Naawen a ŋman pilim a weeni Ayazi ayen, 11<<Bek Naawen fi Wenni ate wa te fu daana dan poom ka juijui ale limisa, yaase juijui ale bo wenzuk la.>> 12Alege Ayazi a weeni kama ayen, <<Mi a kan bek wa wari ya. Mi a kan yaali ayen m nye Naawen a nya.>>

13Ate dila ŋaaŋnyiŋ Azaya a yaa weeni ayen, <<Ni abe wom yɔgyɔgla de nama Deevid dɔkdemma. Ni ale chamsi nurubisa chichiiba a nya la an zuak ya? Ni ale chamsi mi Wenni chichiiba mɛ a nya? 14Dila nyiŋla, Nyɔnɔwa dek ale te ni daana. Nipokbili dii ale kan seba nidoa la ale yik puuk a biak nidoabili. Ate ba ale wi wa ayen Immanuel. 15Wa dan ga seba a zuak a zɛri wakaasima ale a lueri wamaŋsa, wa a dɛ ka biisim goam ale siita. 16Alege ate nidoabinni a seba zuak a zɛri wakaasima a lueri wamaŋsa la, nalima ŋayewa ate fi a chali ba la tɛŋka ale doa kinla. 17Naawen ale basi kama ate daanika a jam fi ale fi nuruma jigi, ale fi kowa yenni demma jigi. Wari dii choa ale kan jam a nya la, a zaani diipo ate Ɛfraim a poori wadek a nyini Juda po la, wa ale ta ka Assiria naawa a jam ni po.>>

18Da dila danni po, Naawen ale peeri ka wiik ate nanjuŋsa ale nyini Ejipiti beli naŋsaŋa ŋaai ale yalima la a jam, ate sie ale nyini Assiria tɛŋka a jam. 19Ŋa ale jam bo ka vooliŋ sii ale churinti la jigini ale pinaŋa muulisaŋa po ale muŋsaŋa meena zuk ale nyiam vie po meena. 20Da dila danni, Nyɔnɔwa ale pai ka poniŋ kaai ate ba cheŋ gaam Benni a ga piem a ta nyini Assiria naawa jigi ayen ba poni fi zukku ale fi naŋsaŋa kɔbtaŋa ale fi teeŋsaŋa mɛ. 21Da dila danni, nuru ale ta ka naab buui ale diem paala la ale bua ŋaye. 22Ate ba le ta biisim nna yegayega la nyiŋ, wa ale nya biisim goam a dɛ kama. Baai meena ale a wari tɛŋka po la, a za ba a dɛ ka biisim goam ale siita. 23Da dila danni, jiga meena ate tiisa sii ale a yɔn yɔna ate si a paari tusidi la, ate si a da a paari kpana boorisa dobrim tusidi la, jiga ŋala meena ale labri a chim ka muŋkangɔtisa ale muŋsa. 24Nidoaba ale ta tima ale piema a cheŋ dula, dii nyiŋla muŋkangɔtisaŋa ale muŋsaŋa ale lik tɛŋka meena kama. 25Guutaŋa meena ale toalim kpa ale kui la, ni kan ŋman cheŋ dula a chali yɔgsum ale muŋkangɔtisa ale muŋsa. Ŋa ale chim ka niiga dɛka jigi ale piisa chali vaka jigi.

Currently Selected:

Azaya 7: BWU

Highlight

Copy