Azaya 65

1<<Mi pai ka m dek a sak baai ale kan bek m wari la. Baai ale kaa gisi mi la a nya mi kama. Tɛŋ kpieŋ kaai ale kaa wi mi yuenni la, mi weeni kama ayen, <Mi ale nna, mi ale nna.> 2Danni po meena mi laari mi nisaŋa a tuesi tukpari nyam, baai ale kan va suik maŋsa po ale a nye badek ale a yaali diila, 3nuru baai ale kasim nye ate m sui a puuri m dek nina po la, a nye kaabsa tatta po ale a ju ŋan baai nyum ale masa la tanta peela kuŋkuŋta zuima. 4Ba ka baai ale a kali boosita po ale a zɔk wasusuga yokku po. Ba ka baai ale a ŋɔbi die lanta, ate ba binbili sii ate jenta ale lan tii ale kan nye cheri la a sueri la. 5Baai ale weeni ayen, <Zaani nakpiak, kan jam moata mi, diila mi ŋmasi ta tuilum kama a te fu. Nuru bala ka nyuisa m nyuevieŋa po ale bolim buui ale kasim a dɛ danni meena.

6<<Nya, ku poom ŋmarisi doa ka m niŋ. M kan sina alege m le nye ba a tuni. M le tuni ku a basi ba naŋsa zuk, 7fi ale fi koma wabaataŋa.>> Naawen ale weeni ayen, <<Ba ju kaabka guutaŋa zuk ale nak nanpaga ale mi pinaŋa zuk, m le magsi ba kɔsutaŋa zuk a tuni meena a magsi chaab ale ba nyeela kpaksaŋa.>>

8Nya kude ate Naawen a weeni, <<Ase nyiam nyiem ale diem bo yɔnsaga nyiŋ diila, ate nuruba a weeni ayen, <Kan yik kaasi, wamaŋ a diem bo ŋa po kama,> M za m nye ka dila m tomteerɔma nyiŋ. M kan kaasi ba meena. 9M le ta ŋaaŋsa a nyini Jekob ale Juda a jam, baai ale ba soa m guutaŋa la. M dek nuruma ate m lueri la ale tuesi dula, ate dula ate m tomteerɔma ale boro. 10Saaron ale chim wuyɔgsuk jigi a te piisa, ate Achor Viaka ale chim vuusum jigi a te duŋsa, a te m nuru baai ale a gisi mu la.

11<<Alege nama baai ale zɛri Naawen ale baŋ m tuilum guuku la, baai ale a gomsi jazaanim a magsi ba wena la ale dam daam a sueri taasa a magsi chum po la. 12M le gomsi ni a magsi gebika, ate ni meena ale koori a te togridɔwa. Diila mi wi kama alege ni an tulisi ya ale biisi alege ni an wom ya. Ni nye biem mi nina po ale lueri dii ale kan a peenti mi sui la.>>

13Dila la Nyɔnɔwa Naawen ale biisi diila ale nna, <<M tomteerɔma ale dɛ, alege kom ale yik ni. M tomteerɔma ale nyu, alege nyanyuila ale yik ni. M tomteerɔma ale dɛ masim, alege ni ale jo chivie po. 14M tomteerɔma ale yi yiila ale masim a nyini ba suiniima po, alege ku le daani ni suiniima po ate ni kaari abe ni a wooli ale sui kaasuŋ. 15Fi ale basi fi yuenni a te m nuruma ate fi lueri la ase kikaasa la. Nyɔnɔwa Naawen ale ko fu. Alege wa ale te wa tomteerɔma yuei yoŋ. 16Waai ale a bek niauŋ tɛŋka po la ale nye dila ka wensie Wenni nyiŋ. Waai ale a pɛ tɛŋka po la, a pɛ ka wensie Wenni nyiŋ. Diila m le baŋ daani kpagsaŋa wie abe ŋa suk ate mi a kan nya ŋa.

17<<Nya, m le nye wenŋmazuk paalik ale tɛŋ paalik. M kan teeri wakpagsa yaase ŋa poom jam m popola po. 18Alege be ta suipeentik abe fi naŋ taam wuu ale dii ate m za m nye la, diila m le nye Jerusalem ate ka chim suipeentik jigi, abe ka nuruma a ta masim. 19M le naŋ Jerusalem nyiŋ abe m ta suipeentik ale m nuruma. Ba kan ŋman wom kumsa ale kaarik ka po diipo diipo.

20<<Biluak a kan bo ka po alege wa daa an soa dii ya yaase nisɔmma a boro alege an paari wa bena. Waai ale ta bena kook ale a kpi la ba le nya ase ka bi paalik ale kpi la. Waai ale kan paari bena kook la, ale nya ase ka kikaasa ale ko wa la. 21Ba ale sɛ yie a bo ŋa po. Ba le vuk tiisa ba kaduksaŋa po a dɛ si yɔnaŋa 22Ba kan ŋman sɛ yie ate nuru yoŋta a bo ŋa po, yaase ba vuk tiisa ate nuru yoŋta a dɛ. Ase tiib daa ale a soa diila, mi nuruma daaŋa ale soa ka dila. M nuru baai ate m lueri la ale dɛ masim ate ku beni a nyini ba nisa tuima po. 23Ba kan nam kinla, yaase ba biak bisa ate ba ta zu baata. Diila ba le chim ka nuru baai ate Naawen a niak ba ale ba ŋaaŋbisa.

24M le dɛ niŋ a tulisi ba alege ate ba wi. Ba ale boro a biisi la m wom ba kama. 25Piuk ale pabiik ale dɛ ale chaab, ate gbeŋli ale ŋɔbi kinkaa ase lalik la, alege tanta ale chim waamu ŋandiinta. Ba kan nye biemmoa yaase ba yik kaasi mi tuilum guuku meena zuwa.>> Ka Naawen ale weeni.

Currently Selected:

Azaya 65: BWU

Highlight

Compare

Copy