Azaya 64

1Mi a yaali kama ayen fi lagri wenŋmazukku a siŋ jam tɛŋ ate guutaŋa ale choa fi niŋ! 2Ase bolim ale toati daata tiye a nye ate nyiam a vaasi diila, be siŋ jam ate fi dachaasa a seba fi yuenni, abe fi nye ate tɛŋ kpieŋsa a choa fi niŋ! 3Ate fi jam nye wakperikaliisa ate tama a jam ka yiila ale ŋa. Fi siŋ jam kama ate guutaŋa a choa fi niŋ.

4A nyini ŋiaka nuru karo a wom yaase waai turi a chelsi wom, yaase waai nina a nya Wen di choa a gum fi po, fi waai ale tom a te baai ale a limisi wa la. 5Fi a maari baai ale nye a magsi ale popeentik la kama baai ale a teeri fi suitaŋa la. Alege tama ale jam nye a kaasi ba la, fi sui a jam puuri kama. Tama abe le nye ka sɛ a nya varibasika?

6Ti meena nye ase ka baai ale daŋ la, ate ti wayɔrisimaŋa a nye ase ka garuk cha daŋtisa la. Ti meena kɔ kama ase vaata la, ate ti wabaataŋa a nye ase viok la a ji ti a basi. 7Nuru waai karo a wi fi yuenni, yaase waai a nye ayen wa paari a yik fu. Diila fi suk ka fidek a nyini ti jigi, ale nye ate tama a ka kiri ya ti wabaataŋa nyiŋ.

8Alege Naawen yaa, fi ale ti ko. Tama ale yakka, ate fi a chim mɛɛrɔwa. Ti meena ka fi nisa tuima. 9Naawen yaa, kan te fi sui a puuri ale ti a gaam taam. Kan teeri ti wabaataŋa taam wuu. Ti a puusi kama ayen fi zak a nya ti, dii nyiŋla ti meena ka fi nuruba. 10Fi tuilum tɛŋsaŋa a jam chim ka gɔi. Zayon mɛ a jam chim gɔi. Jerusalem a jam ka tɛŋ koruk. 11Ti tuilum ale zula Wen yenni juijui ate ti koma a jam a pak fu la, bolim ale jam dɛ di, ate nitalim buui meena ate ti pai basi du la a kaasi.

12Naawen yaa, kude meena ŋaaŋnyiŋ, fi diem za kama? Fi ale nye ka chim abe fi namsi ti a gaam taam mu?

Currently Selected:

Azaya 64: BWU

Highlight

Compare

Copy