Azaya 63

1Ka wana ale nna a nyini Edom a cheena, a nyini Bozra ale wa garuk ate ŋan mɔnta a tiri ku? Ka wana ale nna a jɔ garuk woŋ naliŋ a nyini cheena ale zuaka ale pagrimoa? <<Ku ka mi ale a biisi wayɔrisima po, a zuak a vari a basi.>>

2Ka boa ate fi gattaŋa a muni, ase daŋmiadɔ la? 3<<Mi tabi daamu ŋmiaka jigini ka m dek m nyiini. Waai an nyini tɛŋsaŋa po a gum m po. M pai ka sui a tabi ba, m suipuurumu ate m pai a tabi ba a dueni. Ba ziimu a tagli m gattaŋa ale wari m garukku nyiŋ meena. 4Tunika danni a jam bo ka m suinum po, m da tuesika benni a jam. 5Mi nya kama, alege waai karo a maari mu. Ku cha mi kama ase nuru ale kan boro a te mu maarika la. Ate mi dek nisaŋa a tom varibasika a te mi, ate mi dek suipuurumu a maari mu. 6Mi tabi tɛŋ kpieŋsaŋa kama ale m suipuurumu. M pai ka m suipuurumu a nye ate ba nyu dam a buk ale kpiiri ba ziimu a basi tɛŋka zuk.>>

7M le weeni Naawen ŋmanteka ate wa nye la ale tuim ŋaai ate wa nye a magsi ayen ti pak wa a magsi chaab ale wie ŋaai meena ate Naawen a nye te ti la. Wensie, wie maŋsa nna yegayega ate wa nye a te Izirali yenni, a magsi chaab ale wa jiirimu ale wa ŋmanteka. 8Wa jam weeni ayen, <<Ba sum ka mi nuruba, nidoabili sii ale za ba kan chim venta a te mi la.>> Ate m yaa chim ba Varibasidɔ. 9Ba daanika meena po, ku jam maari a daani wa kama, ate maarɔwa ale jam boro la, a jam vari ba a basi. Wa va wa yaalika ale wa jiirimu nyiŋ a da ba tuesi. A nyini dila po, wa zak ba kama a zaani ale pai ba tara. 10Alege ba jam zɛri wa kama ale nye ate Naawen Chiika sui a puuri. Ate wa yaa labri a chim ba dachiak, a nye kpaliŋ ale ba.

11Ate wa nuruma jam teeri dila po wa, Moosis ale wa nuruma daaŋa. Wa waai ale jam ta ba va nyakpiemu po a taam ase naapeerik ale wa piisa la a bo ka bɛ? Waai ale te ate Naawen Chiika a bo ale ba la a bo ka be, 12Ka wana ale tom wa zula nisim pagrisaŋa ayen si bo ale Moosis juga nisaŋa, ka wana ale lab nyaataŋa ba niŋŋa ayen wa kasim chim wa tɔga taam wuu, 13Ka wa ale ta ba va liuŋku po? Ase wusum ale bo tɛŋ kaai ale lagri la po, ba an cheŋ a nak naŋŋa. 14Ase niiga ale siŋ bo viak po la. Naawen Chiika a te ba vuusum kama. Fi ale gani fi nuruma diila ale nna, ayen fi nye zula yuei a te fidek.

15Nyini wenŋmazuk a nya nyini fi weleŋsa ale fi zula naam zukpaglika zuk. Fi ninmunaŋa ale fi zuaka a bo ka bɛ? Fi yik fi yaalika ale fi jiirimu a nyini ti jigi kama. 16Alege fi ka ti ko, Abrayam a zɛ ti yaase Izirali a miŋ ti. Naawen yaa, fi ale ti Ko ale ti Da Tuesirɔ a nyini dipo ale fi yuenni.

17Ka boa, Naawen yaa, ate fi nye ate ti a tuinti a nyini fi suitaŋa ale nye ate ti suiniima a pagra ate ti kan zuli fu? Fi tomteerɔma ale fi dɔkdemma ate fi soa la nyiŋ ŋman pilim jam. 18Ku an beni ya fi nuruma a tuesi fi jigi weleŋka, alege yɔgyɔgla de ti dachaasaŋa a jam tabi fi boka jigini kama a dueni tɛŋ. 19Fi ale soa ti a nyini dila po. Alege fi an nya ti zuwa, fi an pai fi yuenni a wi ti.

Currently Selected:

Azaya 63: BWU

Highlight

Compare

Copy