Azaya 62

1Zayon ale Jerusalem nyiŋ, m kan sina ate ku paari diipo ate wa wayɔrisimaŋa a nyaksi ase varivientidi la, ate wa varibasika a nye ase bolim ŋiak la. 2Tɛŋ kpieŋsaŋa ale nya fi wayɔrisimaŋa, abe nalima meena a nya fi zulaŋa. Ba le wi fu yuei paali, dii ate Naawen ale wi fu la. 3Fi ale chim ka naam zutɔk naliŋ Naawen nisa po ale naam zutɔk a bo fi Wenni nisa po.

4Ba a kan ŋman wi fu ayen Abazerimi yaase ba wi fi tɛŋka ayen Atɛŋkoruwa. Alege ba ale wi fu ayen Yefziba, abe ba wi fi tɛŋka ayen Beula. Diila Naawen sui ale peenti ale fu, ate fi tɛŋka ale yali. 5Ase nidoabili ale a faari nipokbili diila dila ate fi nidoabilisaŋa ale faari fu. Ase duerɔ ale a dɛ masim wa nipok fiak zuk diila, dila ate Wen ale dɛ masim fi zuk.

6Jerusalem, m basi kama ate nuruba a nya fi parisaŋa zuk. Ku dan poom ka kantueŋ yaase yok ba kan sina. Nama baai ale a wi Naawen la ni kan te nidek vuusummoa 7abe ni kan te wa vuusum ate wa ga yik Jerusalem a zaani, abe wa nye ate wa chim pimpauk tɛŋzuk de.

8Naawen a pɛ kama ale wa juga nisaŋa ale wa ni pagrisaŋa ayen, <<M kan ŋman pai fi ŋan bieŋa ase ŋandiinta la a te fi dachaasaŋa, ate nicham a kan ŋman nyu da paalika ate fi nam bu nyiŋla, 9alege baai ale a che la ale dɛ abe ba pak Naawen, ate baai ale a tigsi yɔnaŋa la ale nyu bu m dɔkku dabaasaŋa po.>>

10Ni va taam, ni va nansuiŋtaŋa a taam. Ni gomsi suiku a te nuruma. Ni gomsi, ni gomsi suik duoku. Ni pai tanaŋa a nyini suiku po. Ni zagri tikti a te tɛŋ kpieŋsaŋa.

11Naawen a mooli kama a te tɛŋzuk de kpeglimka ayen, <<Weeni sak Zayon Liewa ayen, Nya fi Varibasidɔwa a cheena. Nya wa tutunaŋa a bo ale wa, ate wa tutunaŋa a va wa.>> 12Ba le wi ba ayen, Tuilum Nuruba ale Naawen ale Da Tuesi Baai La. Ate ba ale wi fu ayen Agisi ale Tɛŋ Kaai Ate Ba Kan Ŋman Zɛri Ka.

Currently Selected:

Azaya 62: BWU

Highlight

Compare

Copy