Azaya 58

1<<Na ate ku jueli kan sina. Te fi lueluku a jueli ase damuniŋ la. Weeni m nuruma ba tukpanni ale Jekob yenni ba wabaataŋa. 2Daa meena ba a gisi mi. Ba nyiŋsa a zak kama ayen ba miŋ m suitaŋa, nna se ba ka tɛŋ kaai ale a nye dii ale yoarisi la ale an zɛri Wenni wieŋa la. Ba a bek mi a yaali popola ŋaai ale chim wensie ale a nya nna se ba ka baai nyiŋsa ale a zak a yaali ayen Wen jam moata ba la.

3Ba a weeni kama ayen, <<Ka boa ale soa ate ti a bobi noa, alege ate fi an nya ku? Ka boan nyiŋ ate ti zɛri tidek, alege ate fi an miŋ ya? <<Ni nɔi bobika danni ni nye ka nidek ale a yaali diila ale pai ni tuimtomdɔma meena nyiŋ a nya nyuenta. 4Ni noaŋa bobika a kpeglim ale ka chaab taka ale nakka, ate ni ale a nak chaab la, ni gurum nigua a nak chaab ale gaasa. Ni an baga bobi nɔi ase ni le nye dii jinla danni ale a yiili ayen ni luelutaŋa wom a bo wenŋmazuwa. 5Ka nɔi bobika de choa ate mi a lueri, ayen nuru a pai dai yeŋ nyiini a zɛri wadega? Ku ka fi su fi zuk tɛŋ nyiini ase wobi la, abe fi doa boorisa garuk zuk ale buntuem po? Ka dii ate ni a wi ayen nɔi bobika la, dai dii ate Naawen a siak la?

6Daa nɔi bobika de choa ate mi lueri ayen m gebi venta chɔrima abe m yeeri niiga diokku a basi, abe m tuesi baai ate ba a namsi la a basi, abe m wɛ niiga diok meena? 7Daa fi nye ŋandiinta a te waai ate kɔm a ta wa la, abe fi te jajak kaai ale nyiem a tuinti la goom jigi ya, fi dan nya chaboala nyɔnɔ te wa garuk, abe fi kan basi waai ate fi ale wa a chim ziim yem la? 8Ate fi bolimu ale na nyini ase varivientidi la, ate fi ale kpabi a nya fi tebika. Ate fi wayɔrisimaŋa ale de fi niŋ a cheŋ, Ate Naawen zulaŋa ale sum chim fi limisidɔ.

9Ate fi ale wi ate Naawen ale tulisi. Fi ale kaari a yaali maarika, ate wa ale weeni ayen, Mi bo ka dela. <<Fi a dan pai ŋiri namsika diokku a basi ale nisa dakka ale gaasa wie weenika, 10ale te baai ate kɔm a ta ba la ale pai baai ale a nam la ale a yaali ŋan baai la a te ba, dila ale te ate fi bolimu a toati legini po, ate fi yokku ale chim kantueŋ.

11Naawen ale kasim a gani fu. Wa ale te fu fi ale silim ŋan baai la kantueŋ bolim tɛŋka po, abe wa te fi kobaŋa pagrim. Fi ale nye ase ka kaduk kaai ale zaŋti nalimnyiini la, ale nye ase bulik kaai nyiam ale kaa a kpeeri la. 12Fi nuruma ale ŋman sɛ ŋiaka guuraŋa, abe ba zak nyubi kpagsaŋa a zaani. Ba ale wi fu ayen Waai ale a Tebi Parik Lueŋsa la, ale Waai ale Ŋman Yik Suik Tii Ate Nuruba A Bo Ti Po La a nye a magsi.

13<<Ase fi dan yik fidek an nye kaasi Vuusum Danni ale yik fidek a nyini mi tuilum danni ale kan nye fidek ale a yaali diila mi tuilum danni, ase fi dan wi Vuusum Danni ayen suipeentik ale a zuli di fi kan va fidek suikwa ale kan nye dii ale a peenti fi suiya yaase fi nyiem a biisi wie kayaata, 14dila fi ale nya masim Naawen po, ate m le nye ate fi kali tɛŋka kab tii ale jueli la zuk, abe fi dɛ fi kowa Jekob nitalimu.>> Ka Naawen nɔi ale biisi.

Currently Selected:

Azaya 58: BWU

Highlight

Compare

Copy