Azaya 56

1Naawen ale weeni diila ale nna, <<Kasim ta nyemagsika nyeela abe fi nye dii ale magsi la, diila m varibasika a moata kama ate m wayɔrisimaŋa a kan beni ale peelim nyinika. 2Suipeentik a bo le nuru waai ale a nye kude la, nuru waai ale yik ŋa ta giŋgiŋ la, waai ale ta Vuusumu Danni ale kan kaasi di ale yeeri wa nisa a nyini biem nyeka po la.>>

3Kan basi ate nichaanɔ ale pai wadek a te Naawen la a weeni ayen, <<Naawen ale gaari mi a nyini wa nuruma po.>> Abe fi kan basi ate ba le jɛ waai la a fɔbili ayen, <<Mi ka tiib kosik nyiini.>>

4Naawen ale weeni diila ale nna, <<A te waai ate ba jɛ wa ate wa ta m Vuusumu Daaŋa la, waai ale a lueri dii ale a peenti m sui la ale yik m nɔiyeŋka a ta giŋgiŋ la, 5bala m yenni ale parisaŋa po m le te ba ka teerika ale yuei ate di gaam nidoabilisa ale lieba. Mi ale te ba yuei dii ale boro taam wuu ate di kan bɛ. 6Ate nicham baai ale pai badek a te Naawen ayen ba tom a te wa, abe ba yaali Naawen yuenni abe ba a puusi wa la, baai meena ale ta Vuusumu Danni ale kan kaasi di, ale baai ale ta m nɔiyeŋka giŋgiŋ la, 7bade ale m ta a jam m tuilum guuku zuk a te ba masim m puusa yenni po. M le tuesi ba juka tiiritaŋa ale ba kaabka m kuŋkuŋku zuk, diila mi yenni yuei ale puusa yeri a te tɛŋsa meena. 8Nyɔnɔwa Naawen a weeni kama ayen, wa ale waai ale tigsi Izirali demma ale bo yɔntini po la. <<Mi ale diem tigsi ba chaab a gum du a te ba, baai ale poom ŋaam tigsi la ba tɔga.>>

9Ni jam, nama duŋ sii meena ale bo gɔnni po la, ni jam nɛ, nama duŋ sii meena ale bo gɔnni po la. 10Izirali limisidɔma ka yeoba, ba meena a silim ka yam. Ba ka bagaanta, ba kan wosi. Ba doa kama a gilim a gɔdaasim, ba kasim a yaali ka goom. 11Ba ka ba sii ale ta koarisa nna yegayega, jaab kan paari ba. Ba ka naapeerik sii ale a silim miŋka. Ba meena a va ka badek suik, wanyi meena a gisi wadek paaruŋ. 12Waai meena a kum a weeni kama ayen, <<Jam, te m nya daam! Basi ate ti nyu daam a chak! Ale chum ale nye ase jinla la yaase ku poom a gaam dila.>>

Currently Selected:

Azaya 56: BWU

Highlight

Compare

Copy