Azaya 49

1Ni wom mi, nama tɛŋ sii ate nyiamu a gilim la, ni wom kude, nama tɛŋ kpieŋ sii ale bo niŋniŋ la, ni wom nya kude. Alege ate ba biak mi la Naawen a wi mi kama. A nyini m biam po ate wa wi mi yuenni. 2Wa nye m nɔnni ase ka gebik kaai ale ta nɔi la ale pai mu a suk wa nisa yisuŋku po. Wa nye mu ase ka pein dii ale a nyaksi la ale pai mu a su wa namarika po. 3Wa weeni mu ayen, <<Izirali, fi ka m tomteerɔ, waai po ate m le sak m nalimu.>> 4Alege mi weeni kama ayen, Mi tom kama nna kinla. M pai m pagrimu a tom ka koruk ale an nya jaaboa. Alege mi ale magsi ayen m nya diila a bo ka Naawen nisa po, ate m tutunaŋa a bo ale m Wenni.>>

5Ate yɔgyɔgla de Naawen a weeni kama, ayen wa waai ale nye mi m mawa ponni po, ayen m chim wa tomteerɔ la, a ŋman ta Jekob a jam te wa abe wa tigsi Izirali a ta jam wadek jigi dii nyiŋla mi nya zula kama Naawen nina po, ate m Wenni a chim m pagrim. 6Wa weeni kama ayen, <<Ku ka wa fiik ate fi chim m tomteerɔ ayen fi ŋman pai Jekob dɔkdemma a zaani ba nyiem ale ka diila po, abe fi ŋman ta Izirali baai ate m ta la a jam. M le ŋman nye ate fi chim bolim a te baai ale kan daa Izirali dem la, ate fi ale ta m varibasika a jam tɛŋzuk de meena.>>

7Nya kude ate Naawen, Da Tuesirɔwa ale Waai ale Welema Izirali po la a weeni a te waai ate tɛŋ kpieŋ a zɛri wa ale kisi wa la, a weeni a te kpaŋŋa tomteerɔwa ayen, <<Nalima ale nya fu a yiti zaani ŋmai, nabisa ale nya fu a koori tɛŋ, Naawen ale ka wensie nyɔnɔ la nyiŋ. Waai ale Welema Izirali po la, wala ale lueri fu.>>

8Naawen ale weeni diila ale nna: <<M ŋmanteka vaaŋa po m le tulisi fu, ate varibasika danni po m le maari fu. M le yik fu a tara abe m nye ate fi chim nɔiyeŋ a te nuruma, ate m ŋman sɛ tɛŋka a te fu ale ka ŋantaŋa meena ate fi ŋman kali kaai ale chim tɛŋ koruk la po, 9a weeni baai ate ba yik ba la ayen, <Nyini peelim a jam.> Ate baai ale bo legi po la ayen, <Ni nye fasiyaa.> Ba ale de suitaŋa nɔi abe ba nya wuuk yɔksuk gu tii ale kan ta jaab la zuk. 10Kɔm yaase nyanyuila a kan yik ba, yaase gɔnni tuilukku a nak ba yaase wenbinni a nak ba zuk. Waai ale ta jiirim ale ba la ale kasi ba abe wa de ba niŋ a ta ba cheŋ nya buui ale a buli la jigi. 11M le labri m guutaŋa meena ate ti chim suita, abe m zak m sui doataŋa ate ti jueli ŋmai. 12Nya ba ale nyini niŋniŋ a jam. Ba gela ale nyini wiilukku geŋsa, ate ba gela ale nyini yeniŋka geŋsa, abe gela ale nyini Aswan tɛŋka.>>

13Wenŋmazukku a nuem ale masim. Tɛŋzuk de a de masim. Guutaŋa abe lɔnsi yiili mobi? Diila Naawen a yɔk wa nuruma sue kama, ale ta jiirim ale wa nuru baai ale a nam la.

14Alege Zayon a weeni kama ayen <<Naawen a zɛri mi kama, Nyɔnɔwa a baŋ mi kama.>> 15Ma ale baga a baŋ wa biluak kuui ale a ŋoosi la wari a ka jiirim ale biika ate wa biak la? Dai dii dai wa baga a baŋ kama, mi a kan baŋ fu. 16Nya, m ŋmarisi Jerusalem a nyo ka m nitanni po. Fi saasaŋa a kasim bo ka m niŋ. 17Fi nidoabilisaŋa a kpabi ŋman cheena ka fi jigi, ate baai ale nye ate fi doa jassi la a cheŋ ale ge fu. 18Lak fi ninaŋa a nya gilagilawa. Fi nidoabilisaŋa meena a tigsi kama a jam fi jigi. Naawen a weeni kama ayen, Ase mi ale sum vua la, fi le su ba meena ase ŋiri sotta la, fi le su ba ase nipok fiak la. 19Fi tɛŋka a kaasi kama ale doa kɔruk ale ka kiri ya, yɔgyɔgla de fi le fiisa kama a te fi nuruma ate baai ale jam a nɛ fu la, ale yalima ale fu. 20Bi sii ate ba biak ba diipo ate ku ko fu la ale weeni ate fi wom ayen, <<Dela jigini a fiisa kama a te ti. Te ti peelim yega ate ti boro.>> 21Ate fi ale weeni fi suinum po ayen, <<Ka wana ale biak bade a te mi? Ku jam ko mi kama ate m ŋman chim kirik. Ba jam yiak mu kama ale zɛri mu. Ka wana ale wuuk bade? Ku jam tali ka mi dek nyiini, alege bade a nyini ka be?>>

22Nyɔnɔwa Naawen ale a weeni diila ale nna. <<Nya m le nye wari a dak baai ale kan daa Izirali dem la, ate m le zak m tiktiwa a sak nuruma. Ba ale pai ni nidoabilisaŋa ale ba nisima a ta jam abe ba pai ni liema a vi ba ŋmankpalaŋa a ta jam. 23Nalima ale chim ni koba, ate nalima pooba ale chim ni maba a nya ni zuk. Ba ale kpi duna ni niŋ ate ba dieŋa ale kpi tɛŋ. Ba ale leeli ni naŋtaata paasuk. Ate ni ale miŋ ayen mi ka Naawen. M kan paasi baai ale ta yiila ale mi la.>>

24Ba baga a kɔlim ŋanta tugurik tɔŋdɔba jigi ya yaase baai ate ba yik la nakdeerɔ jigi ya? 25Alege Naawen ale weeni diila ale nna. Mm, ba le tuesi baai ate ba yik kpaliŋ po la tugurik tɔŋdɔba jigi, ale tuesi ŋan baai ate ba kɔlim la nakdeerɔ jigi. M le kpaliŋ ale baai ale a kpaliŋ ale ni la, abe m vari ni bisaŋa a basi. 26Mi ale nye ate baai ale a namsi ni la a ŋɔbi bade nyiŋlam. Ba ale nyu badek ziim ase daam la. Ate nurubiik meena ale miŋ ayen mi, Naawen, m ka ni Varibasidɔ ale ni Da Tuesirɔ Waai Ale Ka Jekob Pagrim Nyɔnɔwa la.

Currently Selected:

Azaya 49: BWU

Highlight

Compare

Copy